116
ሀይቁዋፐ አቴዳ አሳ ጋላታ
1 እ ታ ኮሻነ ታ ዋትዋቱዋ ስሴዳ ድራዉ፥
ታን መꬍና ጎዳ ሲቃይ።
2 እ ባረ ሀይꬃ ታኮ የጌዳ ድራዉ፥
ታን ፓጻ ደኤዳ ኬናን ኡባን አ ጼሳና።
3 ሀይቁ ጲርያዳን ታና ኦይቃናዉ ሀኔዳ፤
ሞገታና ህርጋይ ታና ኢሴዳ።
ታና ኡንአይ ቶሌዳ።
4 ሄ ዎደ ታን፥ “አቤት መꬍና ጎዳዉ፥ ሀዳራ!
ታና አሻ” ያጋደ መꬍና ጎዳ ሱንꬃ ጼሳድ።
5 መꬍና ጎዳይ ኬካነ ጽሉዋ፤
ኑ ጾሳይ ቃረትያዋ።
6 መꬍና ጎዳይ አሽከ ዎዛናይ ደእያዋንታ ናጌ፤
ታን መቶቴዳ ዎደ፥ እ ታና አሼዳ።
7 ታ ሸምፓቴ፥ ስም ዎፑ ጋ፤
አያዉ ጎፐ፥ መꬍና ጎዳይ ነዉ ኬኬዳ።
8 መꬍና ጎዳይ ታና ሀይቁዋፐ፥
ታ አይፍያ አፎꬃፐ፥
ታ ገድያካ ꬉብያፐ አሼዳ።
9 ሄዋ ድራዉ፥ ታን፥
ፓጻ ደእያዋንቱ ግዶን፥
መꬍና ጎዳ ስንꬃን ሀመታይ።
10 ታን፥ “ታና ኡንአይ ቶሌዳ” ግያ ዎደካ፥
ታ አማኑዋ አጋበይከ።
11 ታን ዳጋማደ፥ “አሳይ ኡባይ ዎርዱዋ” ያጋድ።
12 እ ታዉ ኬኬዳ ኬካተꬃ ድራዉ፥
ታን መꬍና ጎዳዉ አይ ጭጋናዉ ዳንዳያይታ?
13 ታን ጹኣ ዎይንያ ኤሳ ጋላታዉ ሺሻደ፥
እ ታና አሾ ድራዉ፥
መꬍና ጎዳ ሱንꬃ ጼሳና።
14 አ አሳ ኡባ ስንꬃን
ታን ቃንግያ መꬍና ጎዳዉ ጋꬃና።
15 ጌሻቱዋ ሀይቁ መꬍና ጎዳ ስንꬃን፥
ሎይꬅ ዳሮፐ ቦንቼቴዳዋ።
16 አቤት መꬍና ጎዳዉ፥ ታን ነ ቆማ፤
ኤ፥ ታን ነ ቆማ፥ ነ ቆማት ናኣ።
ታና ቃሹዋፐ ኔን ብላዳ።
17 አቤት መꬍና ጎዳዉ፥
ታን ጋላታ ያርሹዋ ነዉ ያርሻና፤
ነ ሱንꬃ ጼሳና።
18 አሳ ኡባ ስንꬃን፥
ታን ቃንገቴዳ ቃንገꬃ መꬍና ጎዳዉ ጋꬃና።
19 ሄዋካ ታን ጋꬃናዌ፥
የሩሳላመን ደእያ መꬍና ጎዳ ጎልያ ዳባባና።
መꬍና ጎዳ ጋላትተ!