115
እት ቱሙ ጾሳ
1 አቤት መꬍና ጎዳዉ፥ ኑ ግሻ ግደና፤
ኑ ግሻ ግደናን፥ አገና ነ ሲቆዉነ
ነ ቱማተꬃ ድራዉ፥ ነ ሱንꬃ ቦንቻ።
2 ካዉተꬃቱ አያዉ፥
“ኡንቱንቱ ጾሳይ ሀቃን ደኢ?” ጊኖ?
3 ኑ ጾሳይ ሳሉዋና፤
እ ባረ ዶሴዳዋ አይ ግዶፐካ ኦꬄ።
4 ሽን ኡንቱንቱ ኤቃቱ ብራነ ዎርቃ፤
ኡንቱንቱ አሳ ኩሽያን መቴዳዋንታ።
5 ኡንቱንቶ ዶናይ ደኤ፤ ሽን ሃሳይክኖ፤
አይፊ ደኤ፤ ሽን ጼልክኖ።
6 ኡንቱንቶ ሀይꬃይ ደኤ፤ ሽን ስስክኖ፤
ሲꬊ ደኤ፤ ሽን ስንግክኖ።
7 ኡንቱንቶ ኩሺ ደኤ፤ ሽን ኦይቂ ኤርክኖ፤
ገዲካ ደኤ፤ ሽን ሀመትክኖ፤
ኡንቱንቱ ባረንቱ ፕላንቲያና ኮሻ ስስክኖ።
8 ኡንቱንታ መꬍያዋንቱነ፥
ኡንቱንቱን አማነትያዋንቱ ኡባይ ኡንቱንቱ ማላ ግድኖ።
9 ህንተኖ፥ እስራኤልያ አሳቶ፥
መꬍና ጎዳን አማነትተ!
እ ህንተና ማድያዋነ ህንተ ጎንዳልያ።
10 ህንተኖ፥ አሮና ጎልያ አሳቶ፥
መꬍና ጎዳን አማነትተ!
እ ህንተና ማድያዋነ ህንተ ጎንዳልያ።
11 ህንተኖ፥ መꬍና ጎዳዉ ያይያዋንቶ፥
መꬍና ጎዳን አማነትተ!
እ ህንተና ማድያዋነ ህንተ ጎንዳልያ።
12 መꬍና ጎዳይ ኑና ቆፔ፤ እ ኑና አንጃና።
እ እስራኤልያ አሳቱዋ አንጃና።
እ አሮና ጎልያ አሳቱዋ አንጃና።
13 መꬍና ጎዳዉ ያይያዋንታ፥
ጉꬃቱዋካ ግታቱዋካ እ ጋꬆ አንጃና።
14 መꬍና ጎዳይ ህንተናካ ህንተ ናናቱዋካ ዳርሶ!
15 ሳሉዋነ ሳኣ መꬌዳ መꬍና ጎዳን አንጀትተ!
16 ቦላ ꬎቃ ሳሉ መꬍና ጎዳዋ፤
ሽን ሳኣ እ አሳዉ እሜዳ።
17 ሀይቄዳዋንቱ፥ ዱፉዋን ጮኡ ጌዳዋንቱ፥
መꬍና ጎዳ ጋላትክኖ።
18 ሽን ኑን፥ ፓጻ ደእያዋንቱ፥
ሀቼፐ ዶሚደ
መꬍና ጋካናዉ መꬍና ጎዳ ጋላቴቶ።
መꬍና ጎዳ ጋላትተ!