40
Yosefu kofambula Nzozi
1 Viyafosile yayo mwikagoya ving'waji na mokaji magate wa mfalume wa Misili wamuhasanya mfalume wa Misili.
2 Mfalume kawawonela ludoko walangulizi wake waidi, mwikagoya ving'waji na mokaji magate
3 na kawaguma muna ichifungo muna ikaye ya mkulu wa wakalizi, hanhu hoyafungigwe Yosefu.
4 Wanhu wawo wakala muna ichifungo kwa lusita, na mkulu wa wakalizi kamwing'ha ukulu Yosefu yawalolese.
5 Ikala chilo chimwe, mwikagoya ving'waji na mokaji magate wa mfalume wa Misili wowafungigwe muna ichifungo walota nzozi, chila imwe kalota nzozi mbasakanyo na miyage, nzozi zikala na fambulo mbasakanyo.
6 Yosefu viyezile imitondo, kawawona kuwa wawa luholozi.
7 Yosefu kawauza wakulu wawo wa mfalume wowakalile hamwe nayo mwiichifungo mwiikaye ya mwenevale wake, “Habali diyelo muna vihanga va luholozi?”
8 Nawo wamwidika, “Chilota nzozi na habule yodaha kuchifambulila nzozi zetu.”
Yosefu kalonga, “Vino siyo Mulungu muhala yoyodaha kufambula nzozi?” Nilongeleni nzozi zenu.
9 Mwikagoya ving'waji wa mfalume kamulongela Yosefu, “Muna inzozi yangu niwona kuzubuku da mzabibu haulongozi wangu,
10 nawo ukala na matambi matatu. Lusita viusukile mayani, maluwa yake yapumbuluka na vilobota vake viwa zabibu zivile.
11 Mmakono yangu nikala nokwamhilila nhungo ya mfalume. Baho nisola zabibu nizikamula muna inhungo na nimwing'ha mfalume.”
12 Yosefu kamulongela, “Dino niijo fambulo jake, matambi matatu ni siku nhatu.
13 Zahafika siku nhatu, mfalume kezakulava muna ichifungo na kukubweleza kaidi muna ukulu wako. Kwizamwing'ha mfalume nhungo fana viukalile kotenda baho haumwanduso.
14 Mbali ung'humbuke baho chila chinhu vondachihite goya kumwako, na nolamba unitendele yanogile na unitambule baho haulongozi wa mfalume na unitaze nilawe muna ichifungo chino.
15 Kwaviya niye nitolosigwa kulawa isi ya Waebulaniya na hano sitendile chochose chinitendeze nigumigwe muna ichifungo.”
16 Mkulu wa mokaji magate viyawone fambulo ijo dinoga da mwikagoya ving'waji, kamulongela Yosefu, “Iviya naniye nilota nzozi, nikala niitwikile vigelo vitatu va magate mditwi jangu.
17 Muna ichigelo cha uchanyha kukala na ndiya mbasakanyo zibanikigwe kwa ichimu cha mfalume, mbali udege wazija muna ichigelo uchanyha mditwi jangu.”
18 Yosefu kamwidika, “Dino niijo fambulo jake: Vigelo vitatu ni siku nhatu.
19 Muna zisiku nhatu mfalume kezakulava mchifungo, na kukuchinja ditwi jako. Kezakutumbika muna umbiki na ndege wezakuja nyama yako.”
20 Siku ya tatu, ikala siku ya kufikiza kwelekigwa mfalume. Mfalume kawekila dugila wakulu wake wose, kamulava muna ichifungo mwikagoya ving'waji na mokaji magate mkulu na kaweka haulongozi wa wakulu wake.
21 Mfalume kambweleza mwikagoya ving'waji muna ukulu wake wa kung'wiza, muladi yamwing'he nhungo mfalume muna yamakono.
22 Mbali mokaji magate mkulu katumbikigwa fana viyalongile Yosefu.
23 Mbali mwikagoya ving'waji, hamkumbuke bule Yosefu kamzimiza.