16
1 Deyob, Bab-Dummad-Dadganbo-Igar-Mesisad-Ulu selear gusad. Geb David-dordoneg-ega-sobsadgi sinonimalad. Agine, Bab-Dummadga ibmar-durgan ogumakar uksamalad, degi, gwenatigwar-guega Bab-Dummadga ibmar uksamarbalid.
2 David, Bab-Dummadga ibmar-durgan-ogumakar uksad-sorba, degi, gwenatigwar-guega Bab-Dummadga ibmar uksad-sorba, David, dulemarga, Bab-Jehová-nuggi nued-ibmar-gusana yeerbanye sognai gualid.
3 Degi, David, bela Israel-machergan-iliba, degi, omegan-iliba madu-ologana ega uksad, degi, dátil-dinnagana annugwen ega uksabalid, degi, uva-dinnagana annugwen ega uksabalid.
4 David, Bab-Jehová-Ulu-walik-arbamalagar Levita-dulemar-abar onug-imaksad. Adi, Israel-e-Bab-Dummad-Jehováʼse-gormalaga, degi, ega dog-nuedye-sogega, degi, Bab-Jehová-e-nug-odummomalaga.
Wemar-onug-imaksad:
5 Asaf, e-dummadid. Zacarías, e-yarbalidid,
Jeiel, Semiramot, Jehiel, Matatías,
Eliab, Benaía, Obed-Edom, degi, Jeiel.
Wemar, gar-salterio, degi, gar-arpa ogordamalad.
Asafʼdi, gar-címbalo ogoledid.
6 Deginbali, dule-irwa-Bab-Dummadse-gormalad, Benaía, degi, Jahaziel, Bab-Dummad-Dadganbo-Igar-Mesisad-Ulu-asabin gusgu gar-trompeta-ogornai damalad.
David Bab-Dummadga namaked
(Salmo 96:1-13; 105:1-15; 106:47-48)
7 A-ibagi, David Asafʼga, degi, Asaf-e-gwenadganga gebe igar-uknonikid, adi, Bab-Jehováʼga we-namakedgi namakmalagar:
8 “¡Bab-Jehováʼga dog-nuedye be sogmala!
¡E-nuggi Bab-Dummadse be gormala!
Bab-Dummad-ibmar-imaksadgi, dule-yar-baid-baidgi-bukwamaladga be sunmakmala.
9 ¡Bab-Jehováʼga namakmala!
Namaklegedgi e-nug-odummomala.
¡Ega namakmala!
”¡Bab-Jehová-ibmar-dummagan-imakmaidgi
be sunmakmala!
10 ”¡E-nug-isligwaledgi wergumala!
Dule-Bab-Jehová-e-nug-odummodimalad, ulubgi wergumala.
11 Bab-Jehová-Gandik-Maidse be dagmala.
Bane-bane ese be gordii gumalo.
12 Bab-Jehová-ibmar-dummagan-imaksadgi be binsamalo.
E-ibmar-gegerdakleged-imaksadgi, degi, igarmar-inniki-mesisadgi be binsamarbalo.
13 ”Bemar, Bab-Jehová-e-mai-Israel-e-wagan gumalad.
Jacob-wagan, Bab-Dummad na bemar-susadid.
14 Bab-Jehová, anmar-Bab-Dummad gued.
Bela e-sogedba napneggi igar-inniki semaid.
15 E-igar-degisadegu-na-mesisadi, iemaisulid.
Degi, amba wagan mili-miligwen-nasale (1,000-1,000),
na ibmar-imakoye-sogsadi, gwen iegosulid.
16 Deginbali, Bab-Jehová Abrahamʼbo-igar-mesisadi,
Isaacʼga ise-sogar-igar-mesisadi, iemaisulid.
17 Deginbali, Jacobʼga-igarmar-mesisadi, bargindinai gusad.
Israelʼga deyob degisadegua ega igar-mesisad.
18 Israelʼga Bab-Jehová weyob sogsa gusad:
‘Canaán-yar an bega ukoed,
ar we-yar bega nugsalesad.’
19 ”Deunni, bemar-dadgan ichee merguenad,
amar negsuli gaamakdidimalanad.
20 Deginbali, be-dadgan yar-baid-baid obakdidimalanad,
reymar-baid-baid-negsemamaidgi obak-obak nanadimarbalinad.
21 Degi-inigwele, Bab-Dummad, dule-bamalad be-dadgan-sabsur-imakega imaksasulid.
Degine, Bab-Jehová anmar-dadgan-sabedba, reymarga weyob gandikidgi sogsa gusad:
22 ‘Dulemar-an-maiga-sulesmalad, mer oakalomalo.
An-gayaburba-barsogmalad, mer ani sabsur-imakmalo.’
23 ”Bela dulemar-napneggi-gudidimalad, Bab-Jehováʼga namakmalo,
bane-bane e-abonolegedgi sunmakmalo.
24 Dulemar-abargi, Bab-Jehová-e-gangued-yeerdaklegedgi be namakmalo,
degi, e-ibmar-dakledisulid-imaksadgi, dulemar-baid-baidmarga namakmarbalo.
25 Ar Bab-Jehová, dule-dummadid,
e-nug bela-bela odummoleged maid.
Degi, bab-dummagan-baiganba bur bule gangu maid.
Degisoggu, dulemar bur bule Bab-Jehová-dobgue-wilubmalad.
26 Ar bela bab-dummad-baigan-yar-baid-baidginmaladi, bab-dummagansurmalad, binsarmaladid.
Bab-Jehováʼdi, nibneg-obinnisadid.
27 Bab-Jehová bela-bela yeerdakleged, degi, bur-gangued-nika maid.
Bab-Jehová-maidgi, gangued, degi, weligwaled nue-nikad.
28 ”Dulemar-yar-baid-baidgi-bukwamalad, bemar, Bab-Jehová-nug-dummarba-gued odummomarsun.
Bemar, Bab-Jehová bela-bela yeerdakleged-nikaye sogmarsun.
Bemar, Bab-Jehová bela-bela gangued-nikaye sogmarsun.
29 Bab-Jehová-asabin dagmar,
Bab-Dummad-asabin ega ibmar-ukleged sedamar.
E-nug-odummomar,
ar deyob imaklegergebed.
Bab-Jehová-asabin dulluu ambikumalo,
Bab-Jehová-neg-islidikid-yeerdaklegedgi, Bab-Jehová-nug odummomalo.
30 Bela-neg-ugakaase, Bab-Jehová-asabin dobee itomalo.
Ar Bab-Jehová neg-dirbir-naid nasiksad.
Degisoggu, e-sogedba naigu guoed.
31 ¡Nibnegmar, wergumar!
¡Napneg, yeer-itogedba wergumar!
Dulemar-yar-baid-baidgi-bukwamalad, be sogmar:
‘Bab-Jehová, rey-dummadye, be sogmar.’
32 ”¡Demar, uurmake!
¡Bela egi-ibmar-bukwad, uurmake!
¡Sapur, wergue!
¡Bela-egi-ibmar-bukwad, wergue!
33 Bela sapimar sapurba-bukwad, Bab-Jehová-asabin, weligwaledba namakmar.
Ar Bab-Jehová, napneg-seega danikid.
34 ”Bab-Jehováʼga doggus-nuedye be sogmar,
ar Bab-Jehová, dule-nuedid.
Ar e-sabguedi, degisadeguad.
35 Ega be sogmar: ‘Bab-Dummadye, be anmar-bendake.
Ar be anmar-abonogedid.
Bab-Jehováʼye, bulakwa-ambikuega be anmar-imake,
dulemar-yar-baid-baidgi-bukwamaladgi be anmar-bendake.
Adi, be-nug-swilidikid odummogegar,
adi, weligwaledgi be-nug odummogegar.’
36 Israel-e-Bab-Dummad-Jehová, be-nug dummarba gusun.
Degisadegu, be-nug odummoledii gusun.”
Degi, dulemar bela abin sogdemogad: “¡Deyob guo!”
Degi, geb Bab-Jehová-e-nug odummosmalad.
Levita-dulemarga arbaed uklesad
37 Degisoggu, David, Asaf-onug-imaksad, degi, Asaf-e-gwenadgan-onug-imaksabalid. Adi, Bab-Jehová-Dadganbo-Igar-Mesisad-Ulu-asabin, bane-bane igar-maidba Bab-Dummad-nug-odummogedgi arbadii gumalagar.
38 Deginbali, David, yawagak-dakmalaga, wemar onug-imaksabalid:
Obed-Edom, degi, e-gwenadgan dulapaa-gakabaabak (68).
Obed-Edomʼde, Jedutún-e-machid.
Deginbali, Hosa, yawagakgi-nakulegega onugsasbalid.
39 Degi, David, dule-irwa-Bab-Dummadse-goled-Sadocʼye-nugad, degi, e-gwenadganmala, Bab-Jehováʼse-gorleged-neg-Gabaónʼgi-siidgi arbamalaga onug-imaksabalid.
40 Adi, wemar, Bab-Jehováʼse-gorleged-neggi, bane-bane wakdaradbali, degi, sedogidbali, ibmar-durgan-ogumakar Bab-Jehováʼga ukmalagar. Igi Bab-Jehová Israel-dulemarga gardagi-narmakar Igar-uksa, abali imakmalagar.
41 Wemarba, David, wemar-onug-imaksabalid: Hemán, Jedutún, degine, dule-baigan onug-imaksabalid. Adi, wemar Bab-Jehováʼga doggus-nuedye sogega, degi, we-namaked-swilidikidgi namakmalagar: “Bab-Jehová-e-sabguedi, degisadeguad.”
42 Degi, Hemán, Jedutúnʼbogwa, we-namakedgi gar-trompeta, gar-címbalo, degi, gar-baigan Bab-Jehováʼga ogormaladid.
Jedutún-e-masmaladi yawagak-dakmaladid.
43 Degine, geb bela dulemar na e-neg-e-negse nadmalad. David e-negse nadmogad. Adi, e-neguyaginmaladgi nued-binsaegar.