15
David, Jerusalénʼse Bab-Jehová-Ulu sesad
(2 Samuel 6:12-23)
1 David, e-neggweburgi na e-negmar sobsad. Deginbali, Bab-dummad-dadganbo-Igar-Mesisad-Ulu-sigega dordoneg sobsabalid.
2 Degidgi, David sogded: “Bab-Dummad-Dadganbo-Igar-Mesisad-Ulu yogasaar seledosulid. Levita-dulemar, Bab-Dummad-Ulu semaloed. Ar Bab-Jehová, e-Ulu-semalaga, degi, ega degisadegu arbadii gumarbaliga, a-dulemar-nug-imaksa gusad.”
3 Geb David, Bab-Jehová-Ulu na neg-sobsadse sedmalaga, bela Jerusalénʼgi Israel-dulemar-oambikusad.
4 Deginbali, David, Aarón-wagan-oambikusbalid, degi, Levita-dulemar-oambikusbalid.
5 Levita-dulemar Coat-wagansik-sulesmalad, wemalad:
Uriel e-gwenadgan-e-dummad,
degi, e-gwenadgan, dulanergwa (120) mergued.
6 Merari-wagansiki:
Asaías e-gwenadgan-e-dummad,
degi, e-gwenadgan, dulataled-ilabo gaka dulagwen (220) mergued.
7 Gersón-wagansiki:
Joel e-gwenadgan-e-dummad,
degi, e-gwenadgan, dulanergwa-gakambe (130) mergued.
8 Elizafán-e-wagansiki:
Semaías e-gwenadgan-e-dummad,
degi, e-gwenadgan, dulataled-ilabo (200) mergued.
9 Hebrón-e-wagansiki:
Eliel e-gwenadgan-e-dummad,
degi, e-gwenadgan, dulabake (80) mergued.
10 Uziel-e-wagansiki:
Aminadab e-gwenadgan-e-dummad,
degi, e-gwenadgan, dulatar-gakambe-gakabo (112) mergued.
11 Geb degine, David, dule-irwa-Bab-Dummadse-gormaladse gochabalid:
Sadocʼse, Abiatarʼse.
Degi, Levita-dulemarse gochabalid:
Urielʼse, Asaíasʼse,
Joelʼse, Semaíasʼse,
Elielʼse, degi, Aminadabʼse.
12 Geb, David, amarga sogded: “Ar bemar Levita-dulemar-e-gwenadgan-e-gwenadgan-e-dummagansoggu, bemar na be san swilidik imakmar, degi, be-gwenadgan deyob imakmarmogo. Adi, bemar, Israel-e-Bab-Dummad-Jehová-Ulu, an ega dordoneg-guakwa-imaksadse nabir sedmalagar.
13 Gebe-iduale, ar bemar, we-Ulu searsur gusad. Ar ade, anmar igar-maidba anmar-Bab-Dummad-Jehováʼse idaksasulid. Agala, Bab-Dummad, sabsur-anmargi yolesad.”
14 Degisoggu, dule-irwa-Bab-Dummadse-gormalad, degi, Levita-dulemarmala, na san swilidik imaksamarsunnad, adi, Israel-e-Bab-Dummad-Jehová-Ulu nabir sedamalagar.
15 Degine, Bab-Jehová-Moisésʼga-Igar-Uksagusadba guegala, Levita-dulemar, Bab-Dummad-Igar-Mesisad-Ulu e-gukingi e-suargi-nai searmarsunnad.
16 David, Levita-dummaganga sogsabalid: “Be-gwenadgan-abargi dule-namakmalad-amimaloye.
Wemar weligwaledba we-garmar-ogorbukwa namakmalagar:
Gar-salterioʼmar, gar-arpaʼmar,
degi, gar-címbaloʼmar.”
17 Degisoggu, Levita-dulemar we-dulemar-onug-imaksamalad:
Joel-machi-Hemán.
Degi, Berequías-machi-Asaf e-gwenadgan-abargi onugsasmarbalid.
Degi, Merari-wagansikdi,
Cusaías-machi-Etán onugsasmarbalid.
18 We-warbaagwadmarba, e-gwenadgan-sorbarmalad onugsasmarbalid:
Zacarías, Jaaziel, Semiramot, Jehiel,
Uni, Eliab, Benaía, Maasías,
Matatías, Elifelehu, degi, Micnías.
Deginbali, yawagak-dakmalad onugsasmarbalid:
Obed-Edom, Jeiel.
19 Dulemar-gar-esgoro-gordikid-címbaloʼye-nugad-ogormalad onugsasmarbalid:
Hemán, Asaf, degi, Etán.
20 Dulemar-gar-salterio-Alamotʼye-nugad-ogormalad, wemalad:
Zacarías, Aziel, Semiramot, Jehiel,
Uni, Eliab, Maasías, degi, Benaía.
21 Deginbali, gar-arpaʼmar-e-dub-gabaabak-nikad (8) binnalee-ogormalad, degi, namakedgi-emar-idumalad, wemalad:
Matatías, Elifelehu, Micnías, Obed-Edom,
Jeiel, degi, Azazías.
22 Degi, Levita-dulemar-e-dummad-Quenanías, dule-namakedgi-nergualedsoggu, dule-namakmalad-e-dummadga nugsalesad.
23 Dordoneggi Bab-Dummad-Dadganbo-Igar-Mesisad-Ulu-siidgi-nakulemaladi, wemalad:
Berequías, degi, Elcana.
24 Dule-irwa-Bab-Dummadse-gormalad, Bab-Jehová-Ulu-walik gar-trompeta-ogormaladi, wemalad:
Sebanías, Josafat, Natanael, Amasai,
Zacarías, Benaía, degi, Eliezer.
Dordoneggi Bab-Jehová-Ulu-siidgi nakulemarmogadi, wemarmogad:
Obed-Edom, degi, Jehías.
25 Degisoggu, David, Israel-girmar-dummaganmala, degi, sorda-miliba (1,000) e-dummaganga-gudimaladmala, Bab-Jehová-Dadganbo-Igar-Mesisad-Ulu-sunaega, weligwaledbali Obed-Edom-negse nadegusmalad.
26 Ar Bab-Dummad Levita-dulemar-bendaksasoggu, Bab-Jehová-Igar-Mesisad-Ulu-semamaigu, Bab-Jehováʼga moli-bebe-nikad-machergan-walagugle (7) ogumakar uksamalad, degi, sibad-wawaad-machergan-walagugle (7) ogumakar uksamarbalid.
27 Abali, David lino-mor-nued-yoi naded. Deyobi, Levita-dulemar lino-mor-yoyoimoga Bab-Dummad-Ulu-semamai guarmalad. Degi, dule-namakmalad, deyob lino-mor-yoyoimarmogad. Quenanías namakmalad-e-dummad, lino-mor-nued-yoi nadmogad. Davidʼdina, lino-mor-efodʼye-nugad yoibalid.
28 Weyob bela Israel-dulemar, Bab-Jehová-Ulu-senadapi guarmalad.
Doggus-weligwaledba we-garmar-ogornadapi gusmalad:
Gar-bocinaʼmar, gar-trompetaʼmar,
gar-címbaloʼmar, gar-salterioʼmar,
degi, gar-arpaʼmar ogornadapi gusmalad.
29 Geb Bab-Jehová-Dadganbo-Igar-Mesisad-Ulu David-neggweburse-mosgua, Saúl-e-sisgwa-Mical, yawagak-bipigwadba atakded. Agine, Mical, Rey-David weligwaledgi gwirdaniki dakdegua, e-gwagegi David-saedakalid.