52
Bab-Dummad Sión-dulemar-ollor-imaksad
1 Sión-dorgan, ¡be atake! ¡Be atake!
¡Gandikid-mola be yoe!
Neggwebur-islidikid-Jerusalén, be-mor-gargerbamalad be yoe.
Ar dule-abgan-uka-duku-sikarsurmaladi, degi, dule-Bab-Dummad-wissurmaladi, bar bemarse dogosurmalad.
2 ¡Jerusalén-neggwebur, be gwichigue!
¡Olli be obate!
¡Gannar ologanagi be sige!
Sión-yala-sisgwa, be galesgua, dukargi-esgoro-dub-nasiklesad be unge.
3 Ar Bab-Jehová weyob soged:
“Bemar manigi be uklessulid,
bemar manigi be onolegosurbalid.
Bemar binsa-onolegoed.”
4 Ar Bab-Dummad-Bur-Birigined-Jehová weyob soged:
“Epenne an-dulamar, Egipto-yalase nadegusad.
Agine, na megisgusmalad.
Emide, Asiria-sordamar binsarsunna an-dulemar-mesagwar imakalid.”
5 Emide, Bab-Jehová soged:
“¿Ibi an wegi imakdii?
Ar binsarsunna, an-ibe an-dulamar-gasa sesmalad.
E-negsemamaid an-dulamargi dodomalad.
Bane-bane an-nuggi dododigudamalad, bogigudisurmalad.
6 Degisoggu, a-ulale, a-ibagangine, an-dulamar an-nug wisgunonikoed.
A-ibagangine, ani an ega sunmaknaidi, an e-walik gwisgunonikoed.”
7 Dule yar-imbaba-gayaburba-nued-sedanikidi, dule-gayaburba-bogidikid-berbegedi, ibiyobi yeer daklemala.
Dule gayaburba-nuegan-barsogedi, degine, dule abonoleged-igargi-sunmakedi, ibiyobi yeer daklemala.
Dule, Sión-dulemarga weyob-sogedi: “Be-Bab-Dummad negdakmaiye.”
Dule-deyob-sunmakmaladi, ibiyobi yeer daklemala.
8 ¡Be itoge! Be-dule-nakulemalad binnasuli-gorbukmalad,
weligwaledbali gandikidba gorbukmalad.
Ar ade, na e-ibyagwale dakbukmalad,
Bab-Jehová gannar Sión-yalase daniki.
9 Jerusalén-dulemar, na be bular-weligwar-namaklegedgi be namakmar.
Ar ade, Bab-Jehová e-dulemar-baisur-itogega imaksad,
degi, Jerusalén-neggwebur bendaksad.
10 Bab-Jehová, bela dulemar-yar-baid-baidgi-bukmaladga e-gangued oyogoed.
Bela napneg-naid-ugakaase-bukmaladi, anmar-Bab-Dummad-e-abonoged dakmaloed.
11 Bemar, Babse-goled-neggi-ibmar-ebulemalad-semaladi, be nomar,
be agi ainimar.
¡E-dulemar-abargi-gudiidgi be nomar!
¡Be san-urukmar!
¡Melle ibmar-swilidiksulid be ebumalo!
12 Degi-inigwele, mer be gwae-gwae itomalo.
Mer be gwae-gwae-abarmakdemarbalo.
Ar Bab-Jehová bemar-idumai guoed.
Israel-e-Bab-Dummad be-sorba-nai guoed.
Bab-Jehová-e-mai-wilegoed
13 Bab-Jehová soged:
“An-mai emargi nakoed.
E-nug odummolegoed, dule-dummadga guoed,
degi, ologanagi sigoed.
14 Dulemar dakdamalogu, bukidar geger-dakmaloed,
ar e-wagar-daklegedi bar aa daklegosulid,
ar e-daklegedi, bar dule-daklegosulid.
15 Amba deyob dulemar-yar-baid-baidgi-bukmaladi, geger dakmarmogoed.
E-asabinni, reymar gwen-sunmakosurmalad,
ar weyob-ega-ibmar-soglessulid dakdamaloed,
degi, weyob-ibmar-itossurmalad na magar itononimaloed.”