51
Sión-yala-abonolegoed
1 Bab-Dummad weyob soged:
“Bemar, igar-innikigwadba-nanadimalad, be an-amidimalad, be an-itomar:
Bemar, dad-Abraham-wagan gumalad.
2 Be nue-dakmar,
ar dad-Abraham bemar dad-dummadid,
degi, muu-Sara bemar-urbisadid.
An Abrahamʼse gochagua, na sana-walagwen gudiinad.
Degi-inigwele, an egi nued binsasad,
an ega dula omelosad.
3 Ani Bab-Jehová, Sión-yala wiledakedsegad.
Bela e-neg-bibichismaladi, wiledakoed.
E-nega-dulesulidgan Edénʼgi-nainu-nued-naigusayobi, imakoed.
E-nainu-geg-ibmar-egi-sanmakedi, an-nainuga guoed.
A-nainugine weligwar-itomaloed, egi wergumaloed.
Anga namaklegedgi namakmaloed,
dog-nuedye anga sogmaloed.
4 ”An-dulamar, nue be an-itomar.
An-neggweburmar, nue be an-itomar:
Ar ani an ibmargi-odurdakleged-igar onioed,
an-igar-napiragwadi, dulemar-yar-baid-baidgi-bukmaladga neg-meegwadga guoed.
5 An-igar-naboged, bato walik-gusad.
An-abonoleged-igar bato igarba abarmakdanikid.
An-ganguedi, dule-yar-baid-baidgi-bukmaladga igar nabogoed.
Dule-demar-gakaba-bukmaladi, angi bensurmalad,
an-ganguedgi, bendakleged abdakmalad.
6 Niba be atakmar,
napneggi be atakmarbar.
Waa-berguddaedyobi, mogir-billi bergudoed,
mor-nunguddaedyobi napneg nungudoed.
Gukur-burgweyobi, e-dulemar burgwidoed.
Degi-inigwele, an-abonogeddi, degisadegu maiguoed.
Degi, an-igar-napiragwaddi, noargumai gwen guosulid.
7 ”Bemar, igar-napiragwad-wismalad, be an-itomar.
Gwagegi-an-igar-sedidimalad, be an-itomar.
Dulemar-begi-ichakwa-sunmakedi, melle be dobgumalo,
sabsur-e-ibmar-sogedgi, melle be niga argwanmalo.
8 Ar we-dulemar unnila mor suuse-gulledaedyob gumaloed,
mor-wawaad nusmarse-gulledaedyob gumaloed.
Ar an-igar-napiragwaddi, degisadegu maiguoed,
an-abonoged-igardi, maigu guoed.”
9 Bab-Jehová, ¡be atake! ¡Be atake!
¡Gandikid-mola be yoe!
Epenne be-gangued be-dulamarga-be-oyosayob be oyoge.
¿Ar bee be, Rahab-obelossursi?
¿Ar bee be, ibdula-demargined obelossursi?
10 ¿Ar bee be, demar-odinnosgussursi?
¿Ar bee be, a-dii-wilasailad odinnossursi?
¿Ar bee be, dule-bendaklesmalad-obakega demar-wilasailadgi igar-omesisgussursi?
11 Bab-Jehováʼgi-bendaklesmalad gannar nonimaloed,
weligwaledgi namakagwale Sión-yalase dognonimaloed.
Weligwar-itodiidi, magasar na e-wagargi oyomaloed.
Wergudii gumaloed,
na yeer itomaloed.
Bukib-binsadiidi, gwage-nunmak-itodiidi, bela bergudoed.
12 Bab-Jehová weyob soged:
“Ani an bemar-gwage baisur-itoge imakedid.
¿Ar ibiga be dulemar-dobe?
Ar wemardi, unnila gagan-durganyob gumalad.
13 ¿Bab-Jehová-be-obinnisad be iesde?
¿Bab-Jehová-mogir-billi-nasiksad bato be iesde?
¿Bab-Dummad-napneg-nasiksad bato be iesde?
¿Bane-bane be-isdarad-be-obelobi-gudiidgi be gwayedii guode? ¡Adi surbali!
¿Sabsur-dule-odurdakdiid-e-urwedde, bia nadsunna?
14 Dulemar-esgaryagi-gales-bukmaladi, emiskwaa onolemaloed.
Esgaryagi burgosurmalad, gwen ega mas galakuosurmalad.
15 Ani an be-Bab-Dummad-Jehová gued.
Ani an demar-osukamakedid,
ani an demar-uurmakega imakedid.
Bab-Jehová-Bela-Gangued-Nikadye an nugad.
16 Be-gwabindukugine, an-gayaburba an nasiksad.
An-ganguedbali an be-anar gwisgusad.
Ani an mogir-billi nasiksad,
ani an napneg nasiksad.
Degine, Sión-yalagi-bukmaladga an weyob sogsad:
‘Be an-dulamar guye.’ ”
Bab-Dummad-e-urwed
17 ¡Jerusalén-dulemar! Be gwisgumar, be gwisgumar.
Bab-Dummad-e-urwed be itosad.
Be bela-belad ulubse surbinsa-itoge be gusad,
geg bar be gwisgu gusad.
18 Bela be mimmigan-nikusadi, gwen wargwensaale, be-idugega gussulid.
Bela be mimmigan-odummosadi, bipisaale, gwen argangi be-gassulid.
19 We-bonigan-sogbogwad begi nonigusad:
Be-neggwebur bibichisgusad,
degi, be-neggwebur obelolesgusad.
Ukudba be gala-itosgusad,
es-suidgi oburgwilesgusad.
¿Doa wile be-dakoe?
¿Doa be-gwage baisur-itoge imakoe?
20 Be-mimmigan galakusmalad.
Goe-sapur-bebe-suid sakigi-galesnaidaeyob gusmalad,
galimba-dikarba mellemamaid.
Egine, bela Bab-Jehová-e-urwedi gwichigusad,
bela be-Bab-Dummad-urwedi egi gwichigusad.
21 Emisgindi, dule-bukib-binsadiid, vino-gobedginsuli be mummu-gudiid.
An-bega-ibmar-sogoed be ito.
22 Be-Bab-Dummad-Jehová-Bur-Birigined, e-dulemar-ular-sunmakedi, weyobi soged:
“An-urwedgi an sabsur-bemar-odurdaksad an obelosad.
We-an-urwedi bipisaale bar be itogosulid.
23 Dulemar-sabsur-be-odurdakdimalad an odurdakoed.
Ar we-dulemar bega weyob sogsa gusmalad:
‘Napagi balimellemai be imakmarye,
adi, anmar begi annamalagarye.’
Ar deyob be imaksa gusmalad,
ega napagi mellemai be gusmalad,
bela dulemar be-birgi annas gusmalad.”