28
Taire siangpahrang lathueng pâphonae
1 BAWIPA e lawk kai koe bout a pha.
2 Tami capa Taire bawi koevah dei pouh haw, Bawipa Jehovah ni hettelah a dei,
na lungthin na kâpouk teh, Cathut lah ka o.
Talî lungui vah cathut a tahungnae dawk ka tahung telah na ti,
hateiteh, tami rumram lah doeh na o,
cathut lungthin lah na kâpouk eiteh, cathut nahoeh.
3 Thaihaw Daniel hlak na lunganghnawn,
nang koe lawk hro thai kawi lah awm hoeh.
4 Na lungangnae hoi kho na poukthainae ni na bawi sak teh,
na râw bawm dawkvah sui hoi ngun na pâkuem.
5 Ka lentoe poung e na lungangnae hoi na yorannae lahoi,
na mek poung teh na tawnta dawkvah na lungthin na kâoup.
6 Hatdawkvah, Bawipa Jehovah ni hettelah a dei,
cathut lungthin ka sin e lah na kâpouk dawkvah,
7 Khenhaw! takikatho poung e alouke miphunnaw hah
nang koe ka patoun han,
ahnimouh ni nange lungangnae ka lentoe e hah
tahloi hoi a bouk vaiteh, na bawilennae a raphoe han.
8 Ka dungpoung e tangkom thung na pabo awh vaiteh,
talî lungui e ro patetlah na due han.
9 Na hringnae ka thet e hmaitung vah,
cathut lah ka o na ti han rah na ou,
a hmâ na ka paca e kut dawk teh cathut lah na awm hoeh,
tami rumram lah doeh na o.
10 Imyinnaw e kut dawk vuensom ka a hoeh e,
due e patetlah na due han, bangkongtetpawiteh,
lawk yo ka dei toe telah Bawipa Jehovah ni a dei.
Taire siangpahrang hane kalung
11 Hothloilah, BAWIPA e lawk kai koe a pha teh,
12 tami capa Taire siangpahrang khuinae kalungla hah phueng nateh, ahni koevah hettelah Bawipa Jehovah ni a ti,
ahawinae ka kuep, lungangnae hoi ka kawi e,
kamcupoung e meilam hoi ka kuep,
13 Eden hmuen takha dawk na o toe,
na i dawk talung aphu kaawm e aphunphun hoi
na kamthoup. Sardis, topaz, diamon, beril, onyx, jasper,
saphir, sarakdin, karbokul, phunphun hoi,
sui hoi sak e cecak, vovit, naw haiyah
na khe tahma vah nang hane sut rakueng e lah ao toe.
14 Nang teh na karingkung cherubim hoi satui awi e lah na o.
Cathut e mon kathoung dawkvah na o sak.
hmaito hoi kâvan e talung phukaawm koe na kâhlai.
15 Na khe hnin hoi na yonnae a kamnue hnin totouh,
na sak e pueng dawk na kuep e lah na o,
16 Hatei na hno yorannae a pungdaw teh,
hnokathout hoi a kawi,
na yorannae dawk na rawp toe,
hatdawkvah, tamikathout patetlah nang hah Cathut e mon
dawk hoi kai ni na hrek toe, karingkung cherubim
hmai ka tawk e talungnaw thung hoi kai ni na raphoe toe.
17 Nang teh na takthai meihawinae kecu dawk,
kâoupnae lungthin na tawn teh, na bawilennae ni,
nange lungangnae teh a raphoe toe.
Kai ni nang teh talai totouh na pabo han.
Siangpahrangnaw ni nang teh na khet awh teh,
a lunghawisak nahanelah
ahnimae hmaitung kai ni na hruek han.
18 Nange yonnae teh apappoung dawkvah,
hno na yorannae a lanhoehnae ni,
na hmuen kathoung hah a kamhnawng sak.
Hatdawkvah, na thung hoi hmai a tâco sak.
Koung a kak awh teh, na kahmawtnaw ni
a mithmu vah vaiphu lah na coung sak.
19 Tamihu thung hoi nang ka panuek e pueng ni
parap na khet awh teh, kângairu lahoi na kangdue sin awh.
Bout kamnuek mahoeh toe telah ati awh.
Sidon lathueng pâphonae
20 BAWIPA e lawk hah kai koe a pha teh,
21 Tami capa Sidon hah kangdout sin nateh, amae kong hah dei pouh.
22 Hettelah Bawipa Jehovah ni a dei,
Oe! Sidon, nang teh na taran,
nang dawkvah ka bawilennae ka kamnue sak vaiteh,
BAWIPA lah ka onae hah a panue awh han,
ahni dawk lawk ka ceng toteh,
kathounge hah ka hmu sak han.
23 Lamthungnaw dawk thipaling hoi lacik ka pha sak han,
hmuen tangkuem tahloi ni hmâ a paca e naw hah,
a rawp awh han, hat toteh BAWIPA lah ka o tie a panue awh han.
Isarel teh a yaw kahawi e lah ao han
24 Hottelah, Isarelnaw hanelah, tami ka ruk e pâkhingkung awm mahoeh toe. Ahnimae tengpam e kadudamnaw thung hoi runae ka poe hane pâkhing awm mahoeh toe. Hahoi kai teh Bawipa Jehovah doeh tie a panue awh han.
25 Bawipa Jehovah ni hettelah a dei. Isarel imthung hah a kâkayeinae ram thung hoi, ka pâkhueng teh ahnimae hmalah miphunnaw e mithmu vah, ka thoungnae hah na hmu sak toteh, Jakop koe ka poe e amamae ram roeroe dawk kho a sak awh han toe.
26 Hottelah karoumcalah ao awh han, im a sak awh han. Misur takha a sak awh vaiteh, karoumcalah ao awh han, a tengpam e ahnimouh kadudamnaw e a lathueng lawk ka ceng torei teh, kai teh Bawipa Jehovah lah ka o tie a panue awh han telah ati.