27
Taire khuinae kalung
1 BAWIPA e lawk kai koe bout a pha teh,
2 tami capa, Taire khuinae kalung hah phueng haw.
3 Taire koevah, oe nang talî teng e kho na sak nang, talî tengpam ram moi kapap dawk hno ouk ka yawt e, Bawipa Jehovah ni nang koevah hettelah lawk a dei,
Oe nang Taire, meihawinae kuep hoi ka meihawi doeh na ti na ou.
4 Na khori ni talî lungui vah a takhi katang doeh.
Nang na kasakkung ni hoe na hawi sak poung doeh.
5 Nang e thingpheknaw pueng teh Seir hmaica thing hoi sak teh,
nange long rahim vah Lebanon thing
kahawipoung e hah a la awh.
6 Bashan lae kathennaw hoi long mawngnae a sak awh teh,
Kittim tuilum hoi a la awh teh,
kasaino hoi ratu thing hoi a sak awh.
7 Izip ram dawk pathoup e loukloukkaang e hni a yap awh teh,
Elisha tuilum koehoi a la awh e a van khu e hni,
kamthim, paling hoi a sak .
8 Nange long kamawngkung Zidon Aravadnaw doeh,
Oe Taire nang long kamawngkung hah tami a lungkaangnaw doeh.
9 Gebal kacue hoi kusatkathoum hah nange long kasakkungnaw doeh.
Tuipui longnaw hoi, taminaw ni ahnimouh koe e pouknae ouk a hei awh.
10 Nange Taran katukkung na ransahu Persia, Lydia, hoi Libianaw doeh.
Bahling hoi sumluhuem hah a sin awh teh,
nang na kapathoupkung lah a coung.
11 Nange rapannaw dawkvah, na ransahu
Arvadnaw hoi a kâcui awh, nange
imrasang karingkung Gammadnaw ni bahlingnaw hah
rapan petkâkalup lah a bang awh teh,
nang na kapathoupkung lah ao awh.
12 Hnopai moikapap na tawn dawkvah, Taire hah na hno yorankung doeh. na hnopai a ran e lahoi a kutnaw dawk a poe awh. Ngun, sum, samphei, konlawknaw hai,
13 nange hno karankung Javan, Tubal, Mesheknaw teh nange hno yorankung doeh. Rahum hlaam hoi hnopai na tawn nahanelah, na ran pouh awh.
14 Bethtogarmah koehoi marang tarantuknae hoi la hoi na hnopai hah a yoran awh.
15 Nange na hno karankung teh Dedannaw doeh. Talî rai e hmuen tangkuem koe na hno yonae hmuen lah ao. Kasaino hoi Eboni nang koe a yonae hmuen lah ao.
16 Hnopai moikapap na tawn awh dawkvah, Edom teh nang koe kâkuen e lah ao. Emerald talung aphu kaawm e hni paling pathoup e hni, loukloukkaang e, dingyin, âthi talung a yoran awh.
17 Judah hoi Isarel hai nangmouh hoi na yoran awh teh, minnith cai hoi pannang, khotui hoi satui hoi thingtapi hoi a yoran awh.
18 Hnopai moikapap a tawn kecu dawkvah, Damaskas hah nang koe yorankung lah ao. Helbon misurtui hoi tumuen hoi a kâthung awh.
19 Uzal misurtui hah a sin awh teh, na hnopainaw hah a ran awh. Loukloukkaang e sum, nakzik hoi kacing hai a yoran awh e lah ao.
20 Dedan kho teh, marang ka kâcui e ransanaw ni a hno hane kahawipoung e hnopai nang koe a yo awh.
21 Arabia hoi Kebar siangpahrang hah nama koe a yoran lahoi a yo awh. Tuca hoi tutan, hmaetannaw hoi a yoran awh.
22 Sheba hoi Raamah hno kayawtnaw doeh. Hmuitui, kahawipoung e naw hoi talung aphu kaawm e phunkuep hoi sui hoi a yoran awh.
23 Haran, Kanneth, Eden, Sheba hno kayawtkungnaw doeh. Assiria hoi Kilmad hno kayawtkung hah nang koe yorannae kasaknaw doeh.
24 Hotnaw niteh, kahawi e hnicu, hninaw hoi pathoup e hni, a em kaawm e hniphai hoi, ka khawpounge tangron vei e, ka khawpounge lah na hno kuemnae dawkvah a hruek awh.
25 Tarshish long hah na hnopai kaphawtkung doeh.
Moikapap na pâkhueng teh,
talî dawkvah bawilennae hah na hmu.
26 Nange long kamawngkung ni,
talî tuicapa dawk a kâenkhai teh,
Kanîtholae kahlî ni talî lungui vah kahmat lah a palek.
27 Nang teh na rak hnin vah,
na hnopainaw hoi hno na yonae naw hoi,
na long dawk e taminaw long kamawngkung hoi,
taminaw hoi kasakkung hno kayawtnaw hoi a ransanaw,
nang koe kaawm e hoi a thung kaawm e pueng hoi,
talî lungui be na bo awh han.
28 Nange long kamawngnaw a hramnae pawlawk dawkvah,
nang koe kaawm e hah a pâyaw awh.
29 Long mawngnae ka kuen e pueng hoi, long dawk e taminaw hoi,
talî dawk lam ka patue e pueng hah,
a kum awh teh, tuiteng vah a kangdue awh.
30 Nange kong dawk ka thai lah,
lawk kacaipounglah lungmathoe laihoi a ka awh han.
A lû dawk vaiphu kâphuen awh laihoi,
vaiphu dawk a kâkaawk awh han.
31 A samnaw hai a ngaw awh vaiteh,
burihni a kâkhu awh vaiteh,
lung ka mathout poung lahoi nang hanelah
puenghoi a khuika awh han.
32 Talai a lungui karawk e,
khopui Taire kho api kho hoi maw a kâvan.
33 Nang e hnopai pueng teh, talî lam lahoi a ceikhai navah,
taminaw a lungtang sak awh,
moikapap e hno na hnopai lahoi siangpahrangnaw na bawi sak.
34 Atu teh, nang teh talî dawk thoseh,
na yo han e hnopainaw hai thoseh,
tuicapa e lungui a kâkhoe teh
nang koe kaawmnaw pueng be a rak awh.
35 Tuilum e tami pueng teh, hote hno dawk a kângai a ru awh.
Siangpahrangnaw teh, a minhmai a paling awh teh,
a pawngmuen rueng a thaw awh.
36 Alouklouke hno kayawtnaw ni
nang na pacekpahleknae lawk a dei awh.
Nang teh taki na tho poung toe,
bout na kamphawng mahoeh toe,
telah na khui na ka khai awh han, telah a ti.