4
ᐱᒫᑎᓰᐎᓂᔫ ᐁ ᓇᓂᐦᐁᔨᐦᑕᒥᐦᐄᑯᑦ ᐅᑎᐯᔨᐦᒋᑫᐤ
1 ᒫᐦᒋᔥᑕᐃ ᒫᒃ ᓃᒋᔖᓂᑎᒄ, ᒋᒌ ᒋᔅᑯᑕᒫᑎᓈᓐ ᑖᓐ ᒋᐹ ᐃᔑ ᐱᒫᑎᓰᓈᐙᐤ ᒉᒌ ᓇᐦᐁᔨᐦᑕᒥᐦᐁᒄ ᒋᔐᒪᓂᑑ᙮ ᐁᐅᒄ ᒫᒃ ᑖᐺ ᐁ ᐃᔑ ᐱᒫᑎᓯᔦᒄ᙮ ᒋᐳᑯᓭᔨᒥᑎᓈᓐ ᒫᒃ ᑲᔦ ᒋᓰᐦᒋᒥᑎᓈᓐ ᓲᐦᒃ ᐁᑎᑑ ᐆ ᒉᒌ ᐃᐦᑎᔦᒄ ᐁ ᓅᔔᔥᑯᐌᒄ ᑲᔦ ᒋᔭᐙᐤ ᐅᑎᐯᔨᐦᒋᑫᐤ ᒌᓴᔅ᙮
2 ᐌᔥ ᒋᒋᔅᒉᔨᐦᑌᓈᐙᐤ ᑖᓐ ᑳ ᐃᑕᔓᒥᑖᐦᒡ ᒉ ᐃᔑ ᐱᒫᑎᓯᔦᒄ, ᐅᑎᐯᔨᐦᒋᑫᐤ ᒌᓴᔅ ᙭ ᐁ ᒌ ᐐᐦᑕᒫᑯᔮᐦᒡ ᑖᓐ ᒉ ᐃᑎᑖᐦᒡ᙮
3 ᐌᔥ ᒋᔐᒪᓂᑑ ᐊᓂᔫ ᐅᑎᑌᔨᐦᑕᒧᐎᓐ ᒉᒌ ᐸᔦᐦᒋᓰᐌᒄ ᑲᔦ ᐁᑳ ᒥᑐᓐ ᐐᓐᓱᐙᑎᓯᐎᓐ ᒉᒌ ᐃᐦᑕᑯᐦᒡ ᒋᐱᒫᑎᓰᐎᓂᐙᐦᒡ᙮
4 ᒥᓯᐌ ᓈᐯᐤ ᒋᐹ ᓅᑯᓂᔫ ᐁ ᒋᔅᑌᔨᒫᑦ ᐐᒋᔅᑴᐤ ᑲᔦ ᒫᒃ ᒋᐹ ᓇᐦᐁᔨᐦᑕᒥᐦᐄᑯᔫᐦ ᒋᔐᒪᓂᑑᐦ ᑖᓐ ᐁ ᐃᑖᑎᓰᔥᑐᐙᑦ ᐐᒋᔥᑴᐤᐦ᙮
5 ᐊᓂᒌ ᐁᑳ ᑳ ᒋᔅᒉᔨᒫᑣᐤ ᒋᔐᒪᓂᑑᐦ ᐱᓯᒄ ᑎᐯᔨᒥᑰᒡ ᓂᑕᒧᒄ ᒉᒌ ᐃᐦᑎᑣᐤ᙮ ᒋᔭᐙᐤ ᒫᒃ ᐐ ᓇᒧᐃ ᐆ ᒋᐹ ᐅᐦᒋ ᐃᑌᔨᐦᑖᑯᓯᓈᐙᐤ᙮
6 ᐁᑳᐐ ᒫᒃ ᐊᐌᓐ ᐅᔫ ᒋᑲ ᐅᐦᒋ ᐐ ᐃᔑ ᐗᓂᑑᑕᐌᐤ ᐐᒋᔖᓐ᙮ ᒋᒌ ᐐᐦᑕᒫᑎᓈᓐ ᓲᐦᒃ ᐁ ᒌ ᔮᒀᒥᑖᐦᒡ ᐅᑎᐯᔨᐦᒋᑫᐤ ᒉ ᐗᐌᓯᐦᐋᑦ ᒥᓯᐌ ᐊᐌᔫᐦ ᐅᔫ ᑳ ᐃᔑ ᐗᓂᑑᑕᒥᔨᒡ᙮
7 ᐌᔥ ᑖᐹ ᑰᐦᒋ ᑌᑆᑎᑯᓅ ᒋᔐᒪᓂᑑ ᐐᓂᓲᐙᑎᓰᐎᓂᐦᒡ ᒉᒌ ᐃᔑ ᐱᒫᑎᓯᔫᐦᒄ᙮ ᐸᔦᐦᒋᓰᐎᓂᐦᒡ ᒋᓂᑐᐌᔨᒥᑯᓅ ᒉᒌ ᐃᔑ ᐱᒫᑎᓯᔫᐦᒄ᙮
8 ᐊᐌᓐ ᒫᒃ ᐁᑳ ᐋᐸᑌᔨᐦᑕᒧᑴ ᐅᔫ ᒋᔅᑯᑕᒫᒉᐎᓂᔫ ᓇᒥᔦᔫᐦ ᓈᐯᐤᐦ ᐁᑳ ᑳ ᐋᐸᑌᔨᒫᑦ᙮ ᒋᔐᒪᓂᑑᐦ, ᐊᓂᔫᐦ ᑳ ᒦᑰᐦᒄ ᑳ ᐸᔦᐦᒋᓯᔨᒡ ᐊᐦᒑᐦᒄ ᐁᐅᑯᓐ ᐊᓂᔫᐦ ᓇᒧᐃ ᐋᐸᑌᔨᒣᐤ᙮
9 ᓇᒧᐃ ᓂᑐᐌᔨᐦᑖᑯᓐ ᒉᒌ ᐋᔨᒨᑕᒫᑕᑯᒡ ᑖᓐ ᒋᐹ ᐃᔑ ᒫᒨ ᓵᒋᐦᐄᑐᓈᐙᐤ ᐁ ᐐᒋᔖᓂᐦᑐᔦᒄ ᒋᔭᐙᐤ ᑳ ᑖᐺᔨᒣᒄ ᒌᓴᔅ ᐌᔥ ᐎᔭ ᒋᔐᒪᓂᑑ ᒋᒌ ᒋᔅᒉᔨᐦᑕᒥᐦᐄᑯᐙᐤ ᑖᓐ ᒋᐹ ᐃᔑ ᓵᒋᐦᐄᑐᓈᐙᐤ᙮
10 ᓈᔥᒡ ᒫᒃ ᑖᐺ ᒋᓵᒋᐦᐋᐙᐅᒡ ᒥᓯᐌ ᐊᓂᒌ ᒌᒋᔖᓄᐙᐅᒡ ᐊᓂᑌ ᒫᓯᑐᓂᔭ ᐊᔅᒌᐦᒡ ᑳ ᐃᐦᑖᑣᐤ᙮ ᐁᒄ ᒫᒃ ᓲᐦᒃ ᔮᐸᒡ ᒋᐐ ᐃᑎᑎᓈᓐ ᔮᐸᒡ ᐁᑎᑑ ᒉᒌ ᓵᒋᐦᐁᑯᒡ᙮
11 ᔖᔥ ᐅᑌ ᒋᒌ ᐐᐦᑕᒫᑎᓈᓐ ᑖᓐ ᒋᐹ ᐃᐦᑎᓈᐙᐤ, ᓲᐦᒃ ᑯᒋᐦᑖᒄ ᒉᒌ ᒋᔮᒫᑎᓯᔦᒄ᙮ ᐁᑳᐐ ᐅᑕᒫᐱᒫᐦᑯᒡ ᑖᓐ ᐁ ᐃᐦᑎᑣᐤ ᑯᑕᑲᒡ ᐊᐌᓂᒌ᙮ ᑲᔦ ᒫᒃ ᓲᐦᒃ ᐋᐸᑎᓯᒄ᙮
12 ᐁᒄ ᒫᒃ ᓇᒧᐃ ᒋᑲ ᐅᐦᒋ ᐳᑯᓭᔨᒫᐙᐅᒡ ᑯᑕᑲᒡ ᐊᐌᓂᒌ ᒉᒌ ᐅᐦᑎᓂᒫᑖᑯᒡ ᑖᓐ ᐁ ᐃᔑ ᓅᐦᑌᐸᔨᐌᒄ ᒉᒀᔫ᙮ ᐆ ᐃᔑ ᐱᒫᑎᓯᔦᑴ ᐁᒄ ᐊᓂᒌ ᐊᐌᓂᒌ ᐁᑳ ᑳ ᑖᐺᐦᑕᐦᒀᐤ ᒉ ᒋᔅᑌᔨᒥᑖᑯᒡ᙮
ᑆᓪ ᑳ ᐐᐦᑕᐦᒃ ᒉ ᐃᔅᐸᔨᔨᒡ ᑕᑯᔑᓂᔨᒉᓐ ᐅᑎᐯᔨᐦᒋᑫᐤᐦ
13 ᓃᒋᔖᓂᑎᒄ ᒋᓂᑐᐌᔨᒥᑎᓈᓐ ᒉᒌ ᒋᔅᒉᔨᐦᑕᒣᒄ ᑖᓐ ᐁ ᐃᔅᐸᔨᑦ ᐊᐌᓐ ᐁ ᐴᓂᐱᒫᑎᓰᑦ ᐁ ᒌ ᒫᒃ ᑖᐺᐦᑕᐦᒃ ᒥᔻᒋᒧᐎᓂᔫ᙮ ᐁᒄ ᒫᒃ ᓇᒧᐃ ᒋᑲ ᐅᐦᒋ ᐃᔑ ᒥᓯᒣᔨᐦᑌᓈᐙᐤ ᐁ ᐃᔑ ᒥᓯᒣᔨᐦᑕᐦᒀᐤ ᐊᓂᒌ ᐁᑳ ᑳ ᐊᔮᑣᐤ ᐊᔅᐯᔨᒧᐎᓂᔫ᙮
14 ᒋᑖᐺᐦᑌᓈᓅ ᐁ ᒌ ᓂᐱᑦ ᒌᓴᔅ ᑲᔦ ᒫᒃ ᐁ ᒌ ᐗᓂᔥᑳᓈᑲᓅᑦ᙮ ᐁᐅᒄ ᒫᒃ ᐆ ᐌᐦᒋ ᑖᐺᐦᑕᒧᒄ ᒋᔐᒪᓂᑑ ᒦᓐ ᐯᔓᐙᑌ ᒌᓴᔅ ᒉ ᐊᓯᒡ ᐯᔓᐙᑦ ᑲᔦ ᐊᓂᔫᐦ ᐊᐌᔫᐦ ᑳ ᓂᐱᔨᒡ ᐁ ᒌ ᑖᐺᔨᒫᔨᒡ ᒌᓴᔅ᙮
15 ᒋᔮᓅ ᐁᔥᒄ ᒉ ᐱᒫᑎᓰᐦᒄ ᑕᑯᔑᐦᑫ ᒌᓴᔅ ᓇᒧᐃ ᓃᑳᓐ ᒋᑲ ᐅᐦᒋ ᓇᒋᔥᑲᐙᓅ ᐁᔥᒄ ᐁᑳ ᓇᒋᐦᐋᑣᐤ ᐊᓂᒌ ᔖᔥ ᑳ ᓂᐱᑣᐤ ᑳ ᑖᐺᐦᑕᐦᒀᐤ᙮ ᐆ ᑳ ᐃᔑ ᐐᐦᑕᒫᑖᐦᒡ ᐎᔭ ᐅᑎᐯᔨᐦᒋᑫᐤ ᒌ ᐃᑌᐤ ᐅᔫ᙮
16 ᐅᑎᐯᔨᐦᒋᑫᐤ ᒋᑲ ᐯᒋ ᐋᓯᔫ ᑭᐦᒋᑮᔑᑯᐦᒡ ᐅᐦᒋ ᐁ ᒋᔐᐌᑦ ᐁ ᑌᐺᑦ᙮ ᑲᔦ ᒫᒃ ᐊᓐ ᑳ ᓃᑳᓂᔥᑯᐙᑦ ᐁᓐᒋᓪ ᑲᑕ ᐯᐦᑖᑯᓲ ᐁ ᑌᐺᑦ ᑲᔦ ᒫᒃ ᒋᔐᒪᓂᑑ ᐅᐴᑖᒋᑲᓐ ᑲᑕ ᐯᐦᑖᑯᓂᔫ᙮ ᐁᒄ ᐊᓂᒌ ᑳ ᓂᐱᑣᐤ ᐁ ᒌ ᑖᐺᔨᒫᑣᐤ ᙭ ᐎᔭᐙᐤ ᓃᔥᑕᒻ ᑲᑕ ᐅᐦᐱᔅᑳᐤᐦᒡ᙮
17 ᐁᒄ ᒫᒃ ᒋᔮᓅ ᐁᔥᒄ ᑳ ᐱᒫᑎᓰᒄ ᐅᑕᐦ ᐊᔅᒌᐦᒡ ᒉ ᐅᐦᐱᔅᑳᔨᐦᒄ ᒉᒌ ᓇᒐᐦᐊᐦᒀᐤ ᐊᓂᑌ ᑲᔅᑲᐗᓂᔥᑯᐦᒡ ᐅᒌ ᓃᔥᑕᒻ ᑳ ᐅᐦᐱᔅᑳᑣᐤ᙮ ᐁᒄ ᒫᒃ ᐅᑎᐯᔨᐦᒋᑫᐤ ᒫᒨ ᒉ ᐃᔑ ᓇᒐᐦᐄᒄ ᐊᓂᑌ ᒨᔐ ᒌᔑᑯᐦᒡ᙮ ᐅᑎᐯᔨᐦᒋᑫᐤ ᒫᒃ ᐁ ᐃᐦᑖᑦ ᐁᑯᑌ ᑳᒋᒉ ᒉ ᐃᐦᑖᔨᐦᒄ᙮
18 ᑳᒌᒋᐦᐄᑐᒄ ᒫᒃ ᐁ ᐙᐐᐦᑕᒫᑐᔦᒄ ᑖᓐ ᑳ ᐃᑗᔮᐦᒡ᙮