3
ᑖᓐ ᑳ ᐃᔑ ᒥᔻᐸᑎᓯᑦ ᑎᒧᑏ ᑌᓴᓨᓂᔮᐦᒡ
1 ᐁᒄ ᒫᒃ ᐃᔅᑯᑕᒃ ᐁᑳ ᐅᐦᒌ ᐃᐦᑎᔨᐋᐦᒡ ᐁᑳ ᒉᒌ ᐙᐸᒥᑖᐦᒡ ᐁᒄ ᑳ ᐎᔦᔨᐦᑕᒫᐦᒡ ᐅᑕᐦ ᐋᑌᓐᔅ ᒉᒌ ᐃᐦᑖᔮᐦᒡ
2 ᐁᒄ ᑎᒧᑏ ᑳ ᐃᑎᔕᐦᐅᒋᐦᑦ ᐊᓂᑌ ᐁ ᐃᐦᑖᐌᒄ᙮ ᐆ ᒌᒋᔖᓅ ᓂᐐᒋ ᐋᐸᑎᓰᒪᑯᓈᓐ ᒋᔐᒪᓂᑑᐦ ᐁ ᐊᑐᔥᑳᒪᒋᐦᑦ ᑲᔦ ᐎᔭ ᐁ ᐙᐐᐦᑕᐦᒃ ᒥᔻᒋᒧᐎᓂᔫ ᐁ ᑎᐹᒋᒫᑲᓄᔨᒡ ᙭᙮ ᓂᒌ ᐃᑎᔕᐦᐙᓈᓐ ᒉᒌ ᐐᒋᐦᐄᑖᒄ ᐁᑎᑑ ᒉᒌ ᓲᐦᒋᑳᐳᐌᒄ ᑖᓐ ᐁ ᐃᔑ ᑖᐺᔨᒣᒄ ᙭
3 ᐁᑳ ᐙᒡ ᐯᔭᒄ ᐁ ᑕᔑᔦᒄ ᒉᒌ ᒌᐌᑳᐴᔦᒄ ᐊᓐ ᐁ ᓇᓀᐦᑳᒋᐦᐄᑯᔦᒄ ᙭ ᐅᐦᒋ᙮ ᒋᔭᐙᐤ ᓂᔮᓂᑕᒻ ᒋᒋᔅᒉᔨᐦᑌᓈᐙᐤ ᐁᑯᓐ ᑲᔦ ᑳ ᐃᔑ ᐎᔦᔨᐦᑕᐦᒃ ᒋᔐᒪᓂᑑ, ᒉᒌ ᓇᓀᐦᑳᒋᐦᐄᑰᐦᒄ ᐁ ᓅᔔᔥᑰᒪᐦᒄ ᒌᓴᔅ᙮
4 ᐌᔥ ᐁᔥᒄ ᐊᓂᑦ ᐁ ᐃᐦᑖᔦᒄ ᐁ ᒌ ᐃᐦᑖᔮᐦᒡ ᔖᔥ ᓂᔮᑲᓐ ᒋᒌ ᐐᐦᑕᒫᑎᓈᓐ ᒉ ᐅᑎᐦᒋᐸᔨᐦᒡ ᐁ ᓇᓀᐦᑳᒋᐦᐄᑯᔨᐦᒄ᙮ ᐁᑯᓐ ᒫᒃ ᒬᐦᒡ ᑖᐺ ᑳ ᐃᔅᐸᔨᐦᒡ ᒬᐦᒡ ᐁ ᐃᔑ ᒋᔅᒉᔨᐦᑕᒣᒄ ᐁᒄ᙮
5 ᐁᐅᒄ ᒫᒃ ᐊᓂᔫ ᐌᐦᒋ ᔮᐃᑌᐃ ᒌ ᐃᑎᔕᐦᐆᒄ ᑎᒧᑏ ᐊᓂᑌ ᐁ ᐃᐦᑖᐌᒄ᙮ ᐃᔅᑯᑕᒃ ᐁᑳ ᑳ ᒌ ᐃᐦᑎᔮᓐ ᐁᑳ ᒋᔅᒉᔨᒥᑕᑯᒡ ᑖᓐ ᐁ ᐃᔅᐸᔨᔦᒄ ᐁᒄ ᑳ ᐃᑎᔕᐦᐆᒃ ᑎᒧᑏ ᐊᓂᑌ ᐁ ᐃᐦᑖᐌᒄ ᒉᒌ ᓂᑑ ᒋᔅᒉᔨᒥᑖᐦᒡ ᑖᓐ ᐁ ᐃᔅᐸᔨᐌᑴ ᐁ ᑖᐺᔨᒣᒄ ᙭᙮ ᓂᒌ ᓭᒋᓯᓐ ᒉᒌ ᐃᐦᑑᑖᑖᒄ ᒪᒋᒪᓂᑑ ᒉᒌ ᐴᓃᐌᒄ ᐁ ᑖᐺᐦᑕᒧᐌᒄ ᔐᔥᒀᐦᑦ ᒉᒌ ᐃᔑᓈᑯᐦᒡ ᑖᓐ ᑳ ᐃᔑ ᐊᑐᔥᑯᐗᒋᐦᑦ ᐅᑎᐯᔨᐦᒋᑫᐤ ᐊᓂᑌ ᐁ ᐃᐦᑖᔦᒄ᙮
6 ᐁᒄ ᒫᒃ ᐁ ᒌ ᐯᒋ ᑕᑯᔑᐦᒃ ᑎᒧᑏ ᐊᓂᑌ ᐁ ᐃᐦᑖᐌᒄ ᐁ ᐅᐦᑐᐦᑌᑦ ᑲᔦ ᒫᒃ ᐁ ᒌ ᒥᔪ ᐋᔨᒨᑕᒧᔨᒥᐦᑦ ᒋᑖᐺᐦᑕᒧᐎᓇᐙᔫ ᑲᔦ ᒋᓵᒋᐦᐄᐌᐎᓇᐙᔫ, ᐁᔫ ᓂᒌ ᐐᐦᑕᒫᑯᓈᓐ ᒨᔥ ᐁ ᒥᔪ ᒋᔅᒋᓯᑐᑕᐎᔮᐦᒡ ᑲᔦ ᓈᔥᒡ ᐁ ᐐ ᐙᐸᒥᔮᐦᒡ ᒬᐦᒡ ᓂᔮᓐ ᐙ ᐃᔥᐱᔥ ᐐ ᐙᐸᒥᑖᐦᒡ᙮
7 ᐁᒄ ᒫᒃ ᐊᓐ ᒣᒀᒡ ᐁ ᒧᑯᔥᑳᑌᔨᐦᑕᒥᐸᔮᐦᒡ ᑲᔦ ᐁ ᓇᓀᐦᑳᑌᔨᒧᔮᐦᒡ ᓂᒌ ᐅᐦᐱᓂᑯᐙᓈᓐ ᓂᐱᒫᑎᓰᐎᓈᐦᒡ ᐅᔫ ᑳ ᐃᑖᒋᒥᑖᒄ᙮ ᓈᔥᒡ ᓂᑳᒌᒋᐦᐄᑯᓈᓐ ᐁ ᐯᐦᑕᒫᐦᒡ ᑖᓐ ᐁ ᐃᔑ ᑖᐺᔨᒣᒄ ᙭
8 ᐁᒄ ᒫᒃ ᒬᐦᒡ ᐁ ᐅᔅᒋᐦᐄᑯᔮᐦᒡ ᓂᐱᒫᑎᓰᐎᓈᐦᒡ ᓂᑎᑌᔨᐦᑌᓈᓐ ᐁ ᒋᔅᒉᔨᒥᑖᐦᒡ ᐁᔥᒄ ᔮᐸᒡ ᐁ ᓲᐦᒋᑳᐴᔦᒄ ᐁ ᐐᒉᐌᒄ ᐅᑎᐯᔨᐦᒋᑫᐤ᙮
9 ᑖᓂᑌ ᒫᒃ ᒉᒌ ᐅᐦᒋ ᑌᑉ ᓇᓈᔅᑯᒪᒋᐦᑦ ᒋᔐᒪᓂᑑ ᒋᔭᐙᐤ ᐅᐦᒋ ᐊᓐ ᐁ ᐃᔥᐱᔥ ᓈᔥᒡ ᒥᔦᔨᐦᑕᒥᐦᐃᔨᐋᐦᒡ ᐃᔅᑯᑕᒃ ᐁ ᐊᔨᒥᐦᐄᒋᐦᑦ ᒋᔐᒪᓂᑑ᙮
10 ᑲᓇᐙᒡ ᓂᑐᑕᒧᐙᓈᓐ ᒋᔐᒪᓂᑑ ᒉᒌ ᐙᐸᒥᑖᐦᒡ ᒦᓐ ᒉᒌ ᐃᐦᑖᔮᐦᒡ ᐊᓂᑦ ᐁ ᐃᐦᑖᔦᒄ ᐁᒄ ᒫᒃ ᒉᒌ ᐐᒋᐦᐄᑖᒡ ᑖᓐ ᐁᔥᒄ ᐁ ᐃᔑ ᓅᐦᑌᐸᔨᔦᒄ ᑖᐺ ᒉᒌ ᑖᐺᔨᒣᒄ ᙭ ᑖᓐ ᒋᐹ ᐃᔑ ᑖᐺᔨᒫᐙᐤ᙮
11 ᐁᐅᒄ ᒫᒃ ᐆ ᐁ ᐃᔑ ᐊᔨᒥᐦᐁᔥᑕᒫᑖᐦᒡ, ᓂᑐᑕᒧᐙᓈᓐ ᒋᔐᒪᓂᑑ ᑰᐦᑖᐐᓅ ᐁᒄ ᒫᒃ ᐅᑎᐯᔨᐦᒋᑫᐤ ᒌᓴᔅ ᒉᒌ ᓂᐦᐄᐸᔨᐦᑖᑣᐤ ᒦᓐ ᒉᒌ ᓂᑐᐙᐸᒥᑖᐦᒡ᙮
12 ᓂᑐᑕᒧᐙᓈᓐ ᐅᑎᐯᔨᐦᒋᑫᐤ ᒉᒌ ᐃᐦᑑᑖᑖᒄ ᐌᑖᒡ ᒉᒌ ᓵᒋᐦᐄᑐᐌᒄ ᑲᔦ ᑯᑕᒃ ᐊᐌᔫᐦ ᐌᑖᒡ ᒉᒌ ᓵᒋᐦᐄᒣᒄ, ᒉᒌ ᐊᑎ ᐃᔥᐱᔥ ᓵᒋᐦᐄᑐᔦᒄ ᑲᔦ ᒉᒌ ᐊᑎ ᐃᔥᐱᔥ ᓵᒋᐦᐁᑯᒡ ᑯᑕᑲᒡ ᐊᐌᓂᒌ ᒧᔮᒻ ᓂᔮᓐ ᐁ ᐃᔥᐱᔥ ᓵᒋᐦᐄᑖᐦᒡ᙮
13 ᐁᑯᑦ ᒉ ᐅᐦᒋ ᒪᔅᑰᐦᐄᑖᒄ ᐁᒄ ᒫᒃ ᑯᐃᔅᒄ ᒉ ᐃᔑ ᐱᒫᑎᓯᔦᒄ ᑲᔦ ᒉ ᐸᔦᐦᒋ ᐱᒫᑎᓯᔦᒄ ᐃᔅᑯᑕᒃ ᐅᐦᒋᔥᑰᑳᐴᔥᑕᐌᑴ ᒋᔐᒪᓂᑑ ᑰᐦᑖᐐᓅ ᑕᑯᔑᐦᑫ ᐅᑎᐯᔨᐦᒋᑫᐤ ᒌᓴᔅ ᙭ ᐁ ᐯᒋ ᐐᒉᐙᑦ ᒥᓯᐌ ᐊᓂᔫᐦ ᑳ ᑖᐺᐦᑕᒦᑣᐤᐦ᙮