50
Dios pu aꞌɨ́ɨn puéꞌeen ɨ tɨ néijmiꞌi tyámuaꞌ naa tyáꞌxaꞌpuɨꞌɨntareꞌ
Chuíicarij aꞌɨ́ɨn tɨ jaꞌaꞌrij ɨ Asaf
1 Ɨ Tavástaraꞌ, aꞌɨ́jna ɨ Dios tɨ tyihuáꞌijtyeꞌ séecan ɨ dioosij, aꞌɨ́ɨ pu arí tyuꞌtaxájtacaꞌ,
aꞌɨ́ɨjma pu huatajé ɨ maj aꞌyan huacháatɨmee ɨ cháanacaj japua
tɨꞌɨj naꞌaj joꞌtɨj jéꞌejnyinyiij ɨ xɨcáj ajta joꞌtɨj jaꞌancáruꞌpij.
2 Dios pu jɨn huányeeriꞌij aꞌájna a Sión,
aꞌɨ́jna ɨ chájtaꞌnaj tɨ tyámuaꞌ een ajta naa huaséꞌrin.
3 Aꞌɨ́jna ɨ taj Dios pu ajeꞌcáamej, ajta capu xájtariꞌ
tɨéj tɨ néijmiꞌi tyojóꞌjɨpuaj pu anaquéej jimi huaméj,
majta caꞌnyíin jɨn tyéviiyij aꞌɨ́jcɨ jimi.
4 Jútyeꞌ ɨmuáj, Dios pu aꞌɨ́j huatajé ɨ tajapuá tɨ séejreꞌ ajta aꞌɨ́jcɨ ɨ cháanacaj
mej mij jaaséj jeꞌej tɨ tyaꞌajpuéetzij jaꞌmej ɨ chájtaꞌnaj aꞌɨ́j tɨ jitze ajtyámaꞌcan.
5 “Siahuaꞌajsɨɨreꞌ aꞌɨ́ɨjma ɨ maj tyámuaꞌ nyéetzij tyináꞌastijreꞌ,
aꞌɨ́ɨmaj ɨ maj nye jimi tyiꞌtɨ́j jɨn tyaꞌtóoraj
aꞌɨ́jcɨ jɨmeꞌ maj nye jimi tyuꞌtámuꞌvejritacaꞌ.”
6 Ajta ɨ tajapuá tɨ séejreꞌ pu jatyáxajta tɨ ɨ Dios tyámuaꞌ éenyeꞌej séejreꞌ.
7 “Setyúꞌnamuaj, Israel siaj jitze ajtyámaꞌcan, chájtaꞌnaj nye jitze siaj ajtyámaꞌcan,
néijmiꞌi nu tyámuaꞌ naa aꞌ jimi tyuꞌtaséjrataj.
¡Nyáaj nu Dios puéꞌeen! ¡Nyáaj nu jaꞌmua Dios puéꞌeen!
8 Canu aꞌɨ́jna jɨn quee muasej mu paj nye jimi tyíꞌmuꞌvejritaj
ajta ɨ yaꞌmuáatyee paj huáꞌteeraj pej pij naatyátzaahuatyeꞌen.
9 Canu ɨ visáaruꞌuj muahuavii ɨ paj huaꞌaj yaꞌmuaj
canu nyajta ɨ túuruꞌuj ɨ maj iiraꞌuj aꞌ cúraaritaꞌ,
10 jiꞌnye nyéetzij mu nyaꞌaꞌrij néijmiꞌi ɨ tyiꞌtyán maj tyityaacɨ́ꞌɨj,
aꞌyájna matɨꞌɨj majta ɨ maj huoꞌyaꞌmuaj joꞌmaj joꞌcháatɨmee,
11 nyéetzij mu nyaꞌaꞌrij ɨ pínaꞌsee maj huacɨ́j ɨ jɨríj jitze
majta néijmiꞌi matɨꞌɨj manaꞌaj puaꞌmáj tyityáaxoo aꞌɨtzitáj.
12 Tɨpuaꞌaj nyáaj nye íꞌcuataj, canu muéetzij muateꞌexáatyeꞌnyijcheꞌen,
jiꞌnye ɨ cháanacaj pu nyéetzij nyaꞌaꞌrij, ajta néijmiꞌi tyiꞌtɨ́j tɨ jitzán tyíꞌsejreꞌ.
13 ¿Caꞌ aꞌɨ́j nyacuaꞌcaa ɨ huáꞌhueꞌraꞌ ɨ túuruꞌuj
nusu aꞌɨ́j nyeyaꞌcaa ɨ huaꞌ xuureꞌ ɨ chíutyee maj túuruꞌuj?
14 ¡Cheꞌ aꞌɨ́jna ɨ paj jɨn tyéꞌtyojtziꞌreꞌ aꞌɨ́ɨn puéꞌeenyeꞌ ɨ paj jaatámuꞌvejrityeꞌsij ɨ Dios,
pajta aꞌyan huárɨnyij jeꞌej paj tyaꞌtáꞌratziiriꞌ aꞌɨ́jcɨ jimi ɨ tɨ jútyeꞌ ɨmuáj jáꞌsejreꞌ!
15 Pataꞌaj nye jimi huatyényuunyij patɨꞌɨjta quee jeꞌej tyéejtyooveꞌen,
nyáaj nu ajapua huatányuusij, pajta jeꞌen muáaj naatyátzaahuatyeꞌsij.”
16 Ajta aꞌɨ́jcɨ ɨ tɨ jeꞌej puaꞌaj rɨcɨj Dios pu aꞌyan tyéꞌixaatyeꞌ tɨjɨn:
“¿Tyiꞌtanyí jɨn puaatáꞌcɨꞌpuaj pej pij aꞌɨ́j áꞌmuaꞌtyej ɨ nyenyúucaa
nusu paj jaxajta tyiꞌtɨ́j nyaj jɨn tyaꞌtányaratziiriꞌ,
17 tɨpuaꞌaj quee muaꞌránajchij nyej nyáaj tyámuaꞌ muaꞌuurej
pajta quee tzáahuatyiꞌraꞌaj jimi tyíchaꞌɨj ɨ nyenyúucaa?
18 Aꞌɨ́j paj tyámuaꞌ naa tyuꞌtyéjeevij ɨ tɨ tyíꞌnahuaꞌ,
¡pajta huáꞌjaahuatyeꞌ ɨ tyeɨ́tyee maj jéehua tyíꞌxanaꞌcɨreꞌ!
19 Aꞌɨ́jcɨ jimi ɨ tɨ jeꞌej puaꞌaj een ajta ɨ maj hueꞌtzij huáꞌtaavijreꞌ
aꞌɨ́j pu jɨn tyámuaꞌ een muaꞌ nyanúu ajta muaꞌ tyenyij.
20 Hueꞌtzij paj jɨn jeꞌej puaꞌaj tyáꞌxaj aꞌihuáaraꞌ,
¡aꞌɨ́j paj jeꞌej puaꞌaj uurej aꞌihuáaraꞌ!
21 Aꞌíj paj néijmiꞌi jɨn aꞌyan huarɨ́j, nyajta nyáaj canu huatanyúj,
aꞌyaa paj tyiꞌriáꞌmuaꞌaj nyej nyáaj nyajta aꞌyan tyiꞌtyínyechaꞌɨɨcaꞌaj patɨꞌɨj muáaj.
Ajta aꞌyaa nu tyimuaꞌrájeevij aꞌjɨ́ɨsaꞌpuaj,
¡tyámuaꞌ nu tyimuáꞌxaꞌpuɨꞌɨntariꞌtzeꞌen!
22 ’Aꞌíj xu tyámuaꞌ tyojoꞌitéej xáꞌraꞌnyij, muaꞌaj mu siaj yóꞌhuaꞌnaj ɨ Dios,
nyej nyij quee nyáaj huatyényechenyij nyaj jamuaꞌantyipuáꞌrityeꞌen
ajta jeꞌen quee majaꞌ aꞌtɨ́ɨtan tɨꞌij jaꞌmua japua huatányuunyij.
23 Aꞌɨ́jna ɨ tɨ aꞌɨ́j naatámuꞌvejrityeꞌen ɨ tɨ tyinaatatyójtziꞌreꞌen, aꞌɨ́ɨ pu naatyátzaahuatyeꞌsij.
¡Nyáaj nu aꞌɨ́j japua huatányuusij ɨ tɨ tyámuaꞌ tyuꞌméj ɨ nyaj juyéj jitze!”