49
Aꞌɨ́jna ɨ túmii capu néijmiꞌi putyíꞌuurej
Ɨ tɨ aꞌɨ́jna jɨn antyúumuaꞌreej jeꞌej maj tyuꞌtáchuiicaj. Chuíicarij aꞌɨ́ɨmaj maj joꞌyúꞌxacaꞌ ɨ yójmuaꞌmuaꞌ aꞌɨ́jcɨ ɨ Coré
1 Tyámuaꞌ xu naa aꞌíj tyuꞌnamuaj,
chájtaꞌnaj siajta néijmiꞌi ɨ siaj aꞌyan huacháatɨmee ɨ cháanacaj japua,
2 aꞌyaa puꞌuj tánaꞌaj tyihuáꞌixaatyeꞌ ɨ maj chíjtyaanyiꞌij ajta aꞌɨ́ɨjma ɨ maj quee jeꞌej tyéejviicueꞌ,
tɨꞌɨj ajta aꞌɨ́ɨjma ɨ maj uhuácacaꞌnyeꞌ ajta aꞌɨ́ɨjma ɨ maj tyóoxaahuaj.
3 Aꞌyaa nu tyuꞌtaxájtaj tɨꞌɨj ɨ tɨ jéehua tyojóꞌitej
nyajta aꞌɨ́j huataxájta tyiꞌtɨ́j tɨ úꞌsejreꞌ ɨ nyatzájtaꞌ,
4 tyámuaꞌ nu tyáꞌnamuajran jeꞌej maj tyíꞌxaj ɨ maj jéehua tyojóꞌitej,
nyajta ɨ canárij jitze jaataxájtaj tyiꞌtɨ́j nyaj avaatacaꞌaj ɨ nyatzájtaꞌ.
5 ¿Jiꞌnye nyej nyij tyíꞌtzɨɨnyeꞌej naꞌmej
tɨꞌɨj aꞌájna atyojoꞌréꞌnyej aꞌɨ́jcɨ ɨ xɨcáaraꞌ tɨ jitzán jeꞌej puaꞌaj tyiꞌéenyeꞌej taꞌmej,
nyatɨꞌɨj aꞌɨ́jna jɨn curiáꞌnamiꞌhuaj
ɨ maj jɨn jeꞌej puaꞌaj rɨcɨj ɨ maj nyéjchaꞌɨɨreꞌ?
6 Aꞌɨ́ɨmaj mu aꞌɨ́j jitze tyíꞌcaꞌnyej ɨ maj jéehua tyíꞌijchaꞌɨj
majta aꞌɨ́j jɨn óotzaahuatyeꞌ tyiꞌtɨ́j maj jéehua tyúꞌchaꞌɨj,
7 ajta capu aꞌtɨ́j pújoorej tɨ jusɨ́ɨj jujapuá huatányuunyij
nusu tɨ tyaanájchityeꞌen ɨ Dios tɨꞌij japuan huatányuunyij ɨ júuricamaꞌraꞌ.
8 ¡Capu túmii séejreꞌ ɨ tɨ jɨn ɨꞌríj tɨꞌij aꞌtɨ́j jáananan ɨ júuricamaꞌraꞌ ɨ tyévij,
9 tɨꞌij jusén jɨn júurij jáꞌraꞌnyij ajta jeꞌen jáahuɨɨreꞌen tɨꞌij quee huámuɨꞌnyij!
10 Jiꞌnye aꞌyaa pu tyíꞌsejreꞌ maj néijmiꞌi juxaꞌaj manaꞌaj tyíꞌtyacuꞌvacaa,
aꞌɨ́ɨmaj ɨ maj tyojóꞌitej ajta aꞌyan chaꞌtánaꞌaj tyihuáꞌuurej ɨ maj quee tyojóꞌitej,
ajta jeꞌen séecan tyíꞌcɨꞌtyij ɨ maj jéehua tyíꞌijchaꞌɨɨcaꞌaj.
11 Tyij majta tyámuaꞌ naa tyoꞌtyéyuꞌxacaꞌ joꞌmaj tyajaꞌtachuéj,
aꞌáa mu jusén jɨn jaꞌséeriaꞌaj muáꞌjuꞌun joꞌmaj tyityajáꞌavaꞌtacaa,
¡aꞌáa mu jusén jɨmeꞌ joꞌtyáꞌɨtzeereꞌej!
12 Capu jusén jɨmeꞌ séejreꞌ ɨ tyévij, tyij ajta huápuɨꞌɨj chíjtyaanyiꞌ puéꞌeenyeꞌ,
aꞌyaa pu chaꞌtánaꞌaj tyíꞌmuɨꞌnyij matɨꞌɨj ɨ tyiꞌtyán maj tyityaacɨ́ꞌɨj.
13 Aꞌyaa mu tyityeꞌentyipuáꞌrij aꞌɨ́ɨmaj ɨ maj jujɨ́ɨmuaꞌaj jujitzé tyíꞌcaꞌnyej,
aꞌyaa mu tyityeꞌentyipuáꞌrij aꞌɨ́ɨmaj ɨ maj jujɨ́ɨmuaꞌaj tyámuaꞌ tyúuxaj.
14 Aꞌɨ́ɨjma ɨ tyeɨ́tyee, aꞌɨ́ɨ pu huaꞌajséejra ɨ tɨ tyeꞌentyípuaapuaꞌrityee
aꞌáa puꞌij huojóoviꞌtɨj joꞌmaj tyityajáꞌavaꞌtacaa
aꞌyaa pu cuxáa maj cányaꞌxɨɨ puéꞌeenyeꞌ.
Tɨꞌɨj eeréꞌnyej ɨ xɨcáj,
aꞌɨ́ɨmaj mu huaꞌ jimi tyuꞌtyámueꞌtɨj ɨ maj tyámuaꞌ tyityetyúuchaꞌɨj,
majta aꞌɨ́ɨmaj camu cheꞌ uhuácacaꞌnyeꞌej muáꞌjuꞌun
aꞌáa mu mij joꞌtyáꞌɨtzeereꞌej joꞌmaj tyityajáꞌavaꞌtacaa.
15 Ajta ɨ Dios pu nyajapuáj huatányuusij nyej nyij quee huámuɨꞌnyij,
jiꞌnye aꞌɨ́ɨ pu náꞌviꞌtɨn joꞌtɨj aꞌɨ́ɨn jáꞌsejreꞌ.
16 Capáj jeꞌej tyáꞌmuaꞌajcaj tɨpuaꞌaj aꞌtɨ́j huatyoochíjtyaanyiꞌtaj;
ajta arí jéetzeꞌ naa huaséꞌrihuaꞌan ɨ chiꞌraꞌan,
17 jiꞌnye tɨꞌɨj huámuɨꞌnyij capu tyiꞌtɨ́j áꞌtɨnyij,
capu ajta ɨ tɨ jɨn naa huaséꞌrihuaꞌaj jamuán aꞌáa joꞌtyáꞌɨtzeereꞌej joꞌmaj yoꞌtyáꞌavaataj.
18 Tyij ajta jutyamuaꞌveꞌej tɨꞌɨj ooj ajáꞌchajcaj,
majta ɨ tyeɨ́tyee tyámuaꞌ naa tyáꞌxajta aꞌɨ́jcɨ jɨmeꞌ tɨ chíjtyaanyiꞌ puéꞌeen,
19 aꞌnáj pu atyojoꞌréꞌnyesij ɨ xɨcáaraꞌ tɨ jitzán muɨꞌnyij,
aꞌaj puꞌij quee cheꞌ jaséjran ɨ tɨ jɨn huányeeriꞌij.
20 Capu jusén jɨmeꞌ séejreꞌ ɨ tyévij, tyij ajta huápuɨꞌɨj chíjtyaanyiꞌ puéꞌeenyeꞌ,
aꞌyaa pu chaꞌtánaꞌaj tyíꞌmuɨꞌnyij matɨꞌɨj ɨ tyiꞌtyán maj tyityaacɨ́ꞌɨj.