147
Capu juxaꞌaj naꞌaj huóꞌruuj ɨ maj séej chuéj japua joꞌcháatɨmee
1 ¡Alelúuyaj!
¡Naa pu xáꞌpuɨꞌ tyaj tyuꞌtáchuiicaj ɨ Dios jimi!
¡Aꞌyaa pu tyúuxɨeꞌveꞌ tyaj aꞌɨ́j jimi tyámuaꞌ naa tyuꞌtáchuiicaj!
2 Tavástaraꞌ pu ajtáhuaꞌaj jaatyátaahuaj ɨ chájtaꞌnaj Jerusalén
ajta huaꞌajsɨɨreꞌej aꞌɨ́ɨjma ɨ Israel maj jitze ajtyámaꞌcan ɨ maj joꞌvátzɨj.
3 Aꞌɨ́ɨ pu tyihuáꞌhuaatyeꞌen ɨ maj quee tyámuaꞌ een ɨ juxɨéjnyuꞌcaa tzajtaꞌ,
ajta tyihuaꞌhuáatyeꞌej joꞌmaj tyajáꞌpuejtyiꞌhuaj.
4 Aꞌɨ́ɨ pu jamuaꞌreej aꞌchu maj aráꞌasej ɨ xúꞌraꞌvetyee,
ajta jeꞌen séej ajta séej huataxájta jeꞌej tɨ ántyapuaj.
5 Vaꞌcán pu jɨn antyúumuaꞌreej ɨ taj Dios, ajta néijmiꞌi putyíꞌuurej,
capu muꞌ jóoꞌasej ɨ tɨ jɨn tyuꞌyíꞌtɨn.
6 Tavástaraꞌ pu caꞌnyíjraꞌaj huaꞌtáꞌcaa aꞌɨ́ɨjma ɨ maj quee óotzaahuatyeꞌ,
ajta jéehua pu huápuɨꞌɨj huoꞌtyáxaahuataj aꞌɨ́ɨjma ɨ maj jeꞌej puaꞌaj tyityetyúuchaꞌɨj.
7 Setyuꞌtáchuiicaj ɨ Tavástaraꞌ jimi setyeꞌtyóotziꞌreꞌej;
siajta tyuꞌtáchuiicaj ɨ taj Dios jimi, aꞌɨ́jcɨ jitze ɨ canárij.
8 Aꞌɨ́ɨ pu joꞌtánaamuaj ɨ tajapuá tɨ séejreꞌ aꞌɨ́jcɨ jɨmeꞌ ɨ jéetɨrij,
ajta tyámuaꞌ huáꞌuurej ɨ víityee mej mij huatyéviiyej ɨ cháanacaj japua,
ajta tyiꞌtáꞌcaa tɨ ɨ ɨxáj ajnyéj a ɨtzitáj,
9 tyihuáꞌcueꞌtyej ɨ tyiꞌtyán maj tyityaacɨ́ꞌɨj
ajta aꞌɨ́ɨjma ɨ huaꞌyojmuaꞌ ɨ cuaꞌtzáaj matɨꞌɨj ajaꞌcɨꞌxɨj.
10 Capu ɨ tɨ jɨn uhuájcaꞌnyej ɨ cahuáayuꞌ nusu ɨ tyáatɨꞌ tɨ jéehua uhuájcaꞌnyej
capu aꞌɨ́ɨn jitzán juxɨeꞌveꞌ ɨ Tavástaraꞌ,
11 aꞌɨ́ɨ mu jitzán juxɨeꞌveꞌ ɨ maj tzáahuatyiꞌraꞌaj jimi tyíchaꞌɨj,
ɨ maj jitzán tyíꞌcaꞌnyej ɨ tɨ jɨn huaꞌxɨeꞌveꞌ.
12 Muaꞌaj mu siaj Jerusalén huacháatɨmee, setyuꞌtatyójtziꞌreꞌ ɨ Tavástaraꞌ;
siajta mu siaj Sión jaꞌchej, setyuꞌtatyójtziꞌreꞌ ɨ ju Dios.
13 Jiꞌnye aꞌɨ́ɨ pu tyámuaꞌ tyeꞌtyáacajtye joꞌtɨj jaꞌpueertaj
ajta tyámuaꞌ tyihuoꞌtyájtoo aꞌyóojmuaꞌ aꞌájna a chájtaꞌ.
14 Aꞌɨ́ɨ pu tyuꞌtáꞌsij paj axáahuaj séjriaꞌaj aꞌ chuéj japua
ajta aꞌɨ́j muaatáꞌsij ɨ tyeríicuj tɨ jéetzeꞌ jɨ́ꞌreꞌen.
15 Aꞌɨ́ɨ pu junyúucaa ujoꞌtaꞌítyij ɨ cháanacaj japua,
ajta ɨ nyúucariaꞌraꞌ pu jiyeꞌtzín yaráꞌastij.
16 Aꞌɨ́ɨ pu jataahuaj ɨ séerij cuxáa tɨ muxáj tɨ puéꞌeenyeꞌ,
ajta séerij ajnyésij néijmiꞌqueꞌ ɨ chuéj japua tɨꞌɨj ɨ chuéj tɨ muɨɨnyíj.
17 Aꞌɨ́ɨ pu ajta ɨ séerij ujoꞌtaꞌítyij aꞌyájna matɨꞌɨj ɨ tyéetyee;
ajta aꞌɨ́jcɨ jɨmeꞌ ɨ cɨmuájrij tɨ ujoꞌtaꞌítyij, aꞌɨ́j pu jɨn ɨ jáj séerij huatyóotaahuaj.
18 Ajta jeꞌen ɨ junyúucaa mujoꞌtaꞌítyij, aj puꞌij ɨ séerij huatóopuaꞌrij;
aꞌɨ́ɨ pu tyuꞌtáꞌsij tɨ huatáꞌaacarej, aj puꞌij ɨ jájtyij huatámuɨꞌyij.
19 Aꞌɨ́ɨ pu tyuꞌtáꞌ tɨ jáamuaꞌtyij ɨ Jacob, ɨ Israel,
ɨ junyúucaa, ɨ nyúucarij tɨ jɨn tyíꞌijta ajta jeꞌej tɨ tyeetyájtoo.
20 Capu aꞌyan huóꞌruuj ɨ maj séej chuéj japua jáꞌmaꞌcan,
ɨ maj quee aꞌnáj jaamuaꞌaj jeꞌej tɨ aꞌɨ́ɨn tyuꞌtaꞌíjtacaꞌ.
¡Alelúuyaj!