146
Jeꞌej tyaj tyuꞌtáchuiicaj ɨ Dios tɨ tyúꞌtaahuacaꞌ
1 ¡Alelúuyaj!
Néijmiꞌi nu ɨ nyaj júuricamej jɨn tyaatatyójtziꞌreꞌej ɨ Tavástaraꞌ.
2 Nyáaj nu tyeꞌtyóotziꞌreꞌej naꞌmej ɨ Tavástaraꞌ nyatɨꞌɨj nyooj júurij;
nyetyiꞌchuíicaj nu naꞌmej ɨ Dios jimi nyatɨꞌɨj nyooj séjreꞌej.
3 Caxu aꞌɨ́ɨjma jitze tyíꞌcaꞌnyej ɨ tyétyacaa maj jéehua juxɨeꞌveꞌ,
aꞌɨ́ɨjma jimi ɨ tyeɨ́tyee maj quee pújoorej maj séej japua huatányuunyij,
4 jiꞌnye tɨpuaꞌaj meríj huácuiꞌnyij chuéj mu majtáhuaꞌaj huatyóotaahuaj,
aꞌɨ́j puꞌuj tánaꞌaj xɨcáaraꞌ jitze tyeꞌentyipuáꞌrij ɨ maj jɨn tyíꞌmuarɨeꞌcaꞌaj.
5 Cheꞌ jutyamuaꞌveꞌej ɨ tɨ jaꞌancuriáaꞌvej tɨ ɨ Dios raꞌ ɨ Jacob jaatáhuɨɨreꞌen,
aꞌɨ́jna ɨ tɨ tyiꞌijchóꞌveꞌej ɨ Tavástaraꞌ jimi tɨ Dios raꞌ pueꞌéen.
6 Aꞌɨ́ɨ pu jaatyátaahuacaꞌ ɨ tajapuá tɨ séejreꞌ, ɨ cháanacaj ajta ɨ jájrij,
ajta néijmiꞌi aꞌɨ́j tɨ jitze tyíꞌsejreꞌ.
Aꞌɨ́ɨ pu aꞌnáj tɨnaꞌaj jaꞌráꞌastee ɨ junyúucaa
7 Tyámuaꞌ pu tyíꞌuurej aꞌɨ́ɨjma jimi ɨ maj quee jeꞌej jájtyoovej
ajta tyihuoꞌtáꞌsij ɨ cueꞌráj aꞌɨ́ɨjma ɨ maj tajcuj.
Tavástaraꞌ pu huiꞌrátoosij aꞌɨ́ɨjma ɨ maj námiꞌ,
8 Tavástaraꞌ pu huaꞌtanyéjnyeꞌrityee aꞌɨ́ɨjma ɨ maj aracúcuꞌnyijmee;
Tavástaraꞌ pu huaꞌaj jaꞌpuanaj ɨ maj meríj eetavátzɨj,
Tavástaraꞌ pu huaꞌxɨeꞌveꞌ ɨ tyeɨ́tyee maj tyámuaꞌ tyíꞌtyesejreꞌ,
9 Tavástaraꞌ pu huáꞌchaꞌɨj aꞌɨ́ɨjma ɨ maj séej chuéj japua jáꞌmaꞌcan
ajta huáꞌchaꞌɨj aꞌɨ́ɨjma ɨ xáꞌrɨcaanyij ajta ɨ úucaa maj antyúujɨɨmuaꞌastariacaꞌ,
ajta huojoꞌhuaꞌnaj ɨ juyéj jitze aꞌɨ́ɨjma ɨ maj jeꞌej puaꞌaj tyityetyúuchaꞌɨj.
10 Muaꞌaj mu siaj Sión jaꞌchej, Tavástaraꞌ pu jusén jɨmeꞌ tyiꞌíitaj jaꞌmej,
ajta ɨ jaꞌmua Dios pu ajta jusén jɨmeꞌ séeriaꞌaj jaꞌmej.
¡Alelúuyaj!