48
Zayↄn nɛ́ Luda wɛ́tɛmɛ
Kora boriinↄ lɛ̀.
1 Dii bíta, à kà wà à sáabu kpá maamaa
wa Luda wɛ́tɛ guu à kpiii kɛ̀ kú adona musu.
2 Zayↄn gbɛ̀ kaɛna maa,
à dɛ anduna gbɛ̃ pínginɛ pↄnnaa ũ.
Kína bíta wɛ́tɛ kú gbɛ̀ pì gu'igbãroo kpamɛ.
3 Ludaa kú à gudãkpakiinↄ guu,
à tò wà a dↄ̃ aafia'ekii ũ.
4 Kɛ̀ kínanↄ lɛdolɛ kɛ̀
lɛ wà mↄ́ wà lɛ́ɛa lɛdo,
5 kɛ̀ aↄ̃ wɛ́tɛ pì è lɛ, ben à bↄ̀ ń saɛ,
vĩa ń kũ, ben aↄ̃ bàa lɛ̀.
6 Gwen aↄ̃ↄe lugaan
lán nↄgbɛ̃ nↄ̀wãwãkɛri bà.
7 N ń wiwi
lán ↄfãntɛ̃bↄɛ ĩa è latarinↄ góro'itɛnↄ wíwi nà.
8 Yã kɛ̀ wá màn wa wɛ́ɛ è
Dii Zĩ̀kpɛde wa Luda wɛ́tɛ guu.
Luda wɛ́tɛ pì kàɛ àgↄ̃ kuu gurↄ píngi.
9 Luda, wá kú n kpɛ́ ua,
wée laasuu lɛɛ n yenzikɛɛa.
10 Luda, lán n tↄ́ dàgula ai anduna lɛ́n nà,
lɛn n sáabukpana dàgula lɛ dↄ.
Nɛɛ̀ yã gↄ̃gↄ̃ n gbɛ̃nↄnɛ a zɛ́a.
11 Zayↄn kpiideenↄↄ e pↄnnaa kɛɛ,
Yudanↄ bùsu wɛ́tɛdeenↄ pↄↄ kɛ̀ nna,
yãkpaɛ kɛ̀ ń kɛ̀nↄ yãnzi.
12 À dↄdↄkↄ̃zi à liga Zayↄnzi,
à à bĩi dãkpaki lezĩ pariinↄ naro.
13 À à bĩinↄ tàasi kɛ kↄ̃n à zɛki gbãaanↄ
lɛ à e à tↄ̃kɛ̃ kpɛɛdeenↄnɛ.
14 Zaakɛ Luda kɛ̀n wa Luda ũ gurↄ píngi,
è dↄwe aɛ ai wà gá gáo gákiiamɛ.