4
1 Ma nannɛ Ludai kũ Kirisi Yesu kũ ani ɛra à su à kpata ble à yãkpatɛ kɛ kũ gbɛ̃ bɛ̃nɛnↄ kũ gyãwãndenↄo,
2 ǹ Luda yã waazi kɛ. À zɛ́ kɛ̀ kesↄ̃ adi kɛro, ǹgↄ̃ kúo. Ǹ yã ditɛńnɛ, ǹ kpãkɛ̃ńyĩ, ǹ lɛ́ daḿma, ǹ yã dańnɛ kũ mɛna zↄ̃kↄ̃ↄo.
3 Zaakũ gↄrↄke ni su kũ gbɛ̃nↄ ni we ò sã kpá Luda yãzɛdedannɛnaairo. Oni yãdannɛrinↄ kakarańyĩ ń zĩda pↄyeinaaamɛ, de ò yã kũ à kàńgu dańnɛ.
4 Oni ń kↄ̀kↄtↄ zu yãpuranɛ ò arɛ dↄ garanↄa.
5 Mↄkↄ̃n sↄ̃, ǹgↄ̃ laakari vĩ yã sĩnda pínki musu. Ǹ wari fↄ̃, ǹ baarunnakpari kɛna kɛ, ǹ n zĩ lɛ́ papa.
Pↄlu kunna ga lɛ́i zaa Romu
6 Ma gↄrↄ pàpa kↄ̀, oni ma aru kↄ́tɛ sa'o'i ũ tera.
7 Ma ↄsi mana kà, ma bàa lɛ̀ ma bↄtɛ. Má Yesu yã kũna ma a lɛ́ pàpa.
8 Kunna mana fùra ditɛna, àtɛni ma dã sà. Dikiri yãkpatɛkɛri mana mɛ́ ani kúmɛnɛ yãkpatɛkɛgↄrↄ zĩ. Adi kɛ makũmɛ ma adoro, kũ gbɛ̃ kũ ò ye a sunaainↄ ń pínkimɛ.
9 Ǹ zɛ́ wɛtɛ ǹ su ma kĩnaa likalika.
10 Demasi ma ton à tà Tɛsalonika, kũ à ye anduniai yãi. Kɛrɛsɛnsi tà Galatia bùsun, akũsↄ̃ Titu tà Dalamatia bùsun.
11 Luku mɛ́ à gↄ̃̀ kũmao ado. Ǹ Maaku sɛ́ à mↄ́ lɛɛlɛ, zaakũ àdi kpámai zĩ gũn manamana.
12 Ma Tikiku gbàrɛ Ɛfesu.
13 Tó ntɛn su, ǹ ma utagyaba kũ ma tò Kaapu bɛa zaa Toroasi sɛ́ ǹ suomɛnɛ kũ ma takadanↄ, atɛ̃nsa a kũ ò kɛ̀ kũ báraonↄ.
14 Alɛsanda sia yã vãni kɛ̀mɛnɛ manamana. Dikiri ni yã kũ à kɛ̀ɛ pì fĩna bonɛ.
15 Ǹ laakari kɛi, zaakũ à bò ó yã kpɛ pãsĩpãsĩ.
16 Yãkpatɛkɛna kũmao káaku gũn gbɛ̃ke dí zɛ kũmaoro, ò ma ton ń pínki. Luda sún ń yã pì daro.
17 Dikiri zɛ̀ kũmao à ma gba gbãna, akũ ma zɛ́ lè ma waazi kɛ̀ ma a lɛ́ pàpa, buri pãndenↄ mà ń pínki. À ma bo músu lɛ́i.
18 Dikiri ni ma bo yã vãni gũn pínki, ani ma sura ba ari mà gɛ́ káo a kpatan musu. Àkũ mɛ́ à gakuri vĩ gↄrↄ sĩnda pínki, aami.
Lɛ́zammanaa
19 Ǹ fↄ kpá Pirisila kũ Akilaooa kũ Ɔnɛsifↄru bedenↄ.
20 Erasatu gↄ̃̀ Kↄrinti. Ma Torofimu tò kũ gyão Milɛtu.
21 Ǹ zɛ́ wɛtɛ ǹ su ari bunsirɛ gↄ̃ ká. Yubulu kũ Pudɛnio kũ Linuo kũ Kalaudiao kũ ó gbɛ̃nↄ pínki fↄ kpàmma.
22 Dikiri gↄ̃ kú kũnwo. À gbɛ̃kɛ kɛárɛ.