3
Bisãsirinↄ yãkɛna gↄrↄ kpɛdenↄa
1 Ǹgↄ̃ dↄ̃ kũ gↄrↄ kpɛdenↄ nigↄ̃ pãsĩ.
2 Gbɛ̃nↄ zĩda yã ni dońnɛ arɛ, ↄgↄ ni ń swɛ̃̀ ble. Onigↄ̃ de karambaanidenↄ ũ, zĩdabirinↄ, gbɛ̃sↄ̃sↄ̃rinↄ, de kũ dao yãdarisarinↄ, guturunↄ, ludayãdarisarinↄ,
3 gbɛ̃yãkɛrisaridenↄ, sùrusaridenↄ, gbɛ̃yakarinↄ, fayasaridenↄ, aniapãsĩdenↄ, yã mana ibɛrɛnↄ,
4 bonkpɛdenↄ, laasunsaridenↄ, yↄ̃̀gↄ̃denↄ. Onigↄ̃ ye pↄnnakɛnaai de Luda yãla.
5 Òdi donyĩ kɛ, ama ò ye a gbãnairo. Ǹ kɛ zã̀ kũ gbɛ̃ bire takanↄ.
6 Ń gbɛ̃kenↄ dì gɛ̃ nↄgbɛ̃ kũ òdi mì gbãkɛnnɛronↄi, ò ń fu kũ lɛ́o. Durunna sàa dà nↄgbɛ̃ pìnↄn, dà vãni mɛ́ à gↄ̃̀ńnɛ,
7 òdigↄ̃ yã dada gↄrↄ sĩnda pínki, ama òdi fu yãpura kũnaa.
8 Lákũ Yanɛ kũ Yambɛrɛsio bò Musa kpɛ nà, lɛn gbɛ̃ pìnↄ dì bo yãpura kpɛ lɛ. Ń laasun lɛ́kpɛrɛmɛ, ó donyĩzɛ gũn pↄ́ ginyĩnanↄmɛ.
9 Ò gɛna arɛ vĩ doro, zaakũ gbɛ̃ sĩnda pínki ń yↄ̃nkↄkɛ dↄ̃, lákũ ò Yanɛ kũ Yambɛrɛsio pↄ́ dↄ̃̀ nà.
Luda yã àree
10 Mↄkↄ̃n sↄ̃, ń tɛ́mai. Ń ma kunna dↄ̃ kũ ma yãdannɛnaao kũ yã kũ matɛn pɛ́aao kũ ma ludanaanikɛnaao kũ ma mɛnakɛo kũ ma yenyĩo kũ ma zɛna gbãnao
11 kũ wɛ́ kũ ò tã̀mao kũ wari kũ ma kɛ̀ɛo. Ń yã kũ à ma le Antiↄku kũ Ikↄniuo kũ Lisitirao dↄ̃ kũ wɛ́tãmmana zↄ̃kↄ̃ kũ ma fↄ̃̀ↄo. Ama Dikiri ma bo a sĩnda pínki gũn.
12 Gbɛ̃ kũ ò ye ògↄ̃ kun ludayãmarinↄ ũ Kirisi Yesu gũnnↄ ni wɛ́tãmmana le.
13 Gbɛ̃ vãninↄ kũ manafikidenↄ vãnikɛna nigↄ̃ karamɛ. Oni gbɛ̃nↄ sãtɛ, mↄ́kↄ̃nↄ se onigↄ̃ sãtɛna.
14 Mↄkↄ̃n sↄ̃, ǹ zɛ kũ yã kũ n dàda n sì yãpura ũo. Ń gbɛ̃ kũ ò dàdannɛnↄ dↄ̃,
15 zaakũ ń Luda yã dↄ̃ zaa n nɛ́fitikɛgↄrↄa. Ani fↄ̃ à n gba ↄ̃ndↄ̃ à n ká Kirisi Yesu náanikɛna kũ àdi ń sura baa.
16 Yã kũ à kú Luda yãn bò Luda kĩnaa pínkimɛ. À àre vĩ, zaakũ àdi yãpura dańnɛ, àdi ń ɛ́kɛ káńnɛ ń ↄĩ, àdi ń gba laakarii, àdi lɛ́ daḿma yãkɛna a zɛ́aa gũn,
17 de Luda gbɛ̃ sorukɛna ma yãmanakɛna sĩnda pínki zɛ́ gũn.