Luda yã takada kũ Bisã yão MATIU 9

Kↄ̃̀nↄde werekↄ̃anaa

(Maa 2:1-12, Luk 5:17-26)

1 Yesu gɛ̃̀ gó gũn, à ɛ̀ra à sɛ̀bɛ bikũ̀ à kà a bɛ wɛ̃tɛa. 2 Akũ gbɛ̃kenↄ mↄ̀nɛ kũ kↄ̃̀nↄdeo wútɛna gyãresɛbↄn. Kũ Yesu è ò a náani vĩ, akũ à pì kↄ̃̀nↄde pìinɛ: Ma gbɛ̃, ǹ laakari kpátɛ! N durunnanↄ kɛ̃̀mma. 3 Ludayãdannɛri kenↄ kú gwe, akũ ò ò ń nɛ̀sɛɛ gũn ò pì: Gbɛ̃ bire tɛn dↄkɛ kũ Ludaoomɛ. 4 Yesu ń laasun dↄ̃, akũ à ń lá à pì: Bↄ́yãi átɛn laasun vãni lɛ́ á nɛ̀sɛɛ gũnn? 5 Tó ma pì, a durunnanↄ kɛ̃̀a, ke tó ma pì à futɛ à táa o, a kpate mɛ́ à aragaa? 6 Ma ò lɛ de àgↄ̃ dↄ̃ kũ Bisãsiri Nɛ́ durunnanↄ kɛ̃mmana iko vĩ zĩtɛ lamɛ. Akũ à pì kↄ̃̀nↄde pìinɛ: Ǹ futɛ ǹ n wútɛbↄ sɛ́ ǹ tá bɛ. 7 Akũ à fùtɛ à tà bɛ. 8 Kũ pari è lɛ, vĩna ń kũ, ò Luda kũ à iko bire taka kpà bisãsirinↄa tↄ́ bò.

Matiu sisinaa

(Maa 2:13-17, Luk 5:27-32)

9 Yesu bò gwe, àtɛn gɛ̃tɛ, akũ à gbɛ̃ kũ òdi pi Matiu è vutɛna a bɛ'ↄgↄsikpɛn. À pìnɛ: Ǹ mↄ́ ǹ tɛ́mai. Akũ à fùtɛ à tɛ̀i. 10 Kũ Yesu tɛn pↄ́ ble a bɛa, bɛ'ↄgↄsirinↄ kũ kifirinↄn kú gwe dasi, òtɛn pↄ́ ble kãao kũ a ìbanↄ lɛɛlɛ. 11 Kũ Farisinↄ è lɛ, akũ ò a ìbanↄ là ò pì: Bↄ́yãi á dikiri tɛn pↄ́ ble kũ bɛ'ↄgↄsirinↄ kũ kifirinↄoo? 12 Kũ Yesu yã pìi mà à pì: Gbɛ̃ kũ à aafia vĩ bàka kú kũ likita yãoro, sé gyãre. 13 À gɛ́ à laasun lɛ́ yã kũ à kɛ̃na Luda yãn bire mìia ò pì: Kↄ̃ wɛ̃ndagwanaan má yei, adi kɛ sa'onaanlo. Mádi su gbɛ̃ mananↄ sísiro, sé kifirinↄ.

Lɛ́yĩnaa

(Maa 2:18-22, Luk 5:33-39)

14 Akũ Yahaya Da'itɛkɛri ìbanↄ sù ò Yesu là ò pì: À kɛ̀ dera ókↄ̃nↄ kũ Farisinↄ odì lɛ́ yĩ, akũ n ìbanↄ dì yĩ sↄ̃roo? 15 Akũ Yesu yã lɛ̀kↄ̃ańnɛ à pì: Nↄsɛri gbɛ̃nↄ ni pↄsira kɛ gↄrↄ kũ à kú kũńwo nↄsɛ gũn yá? Oi, ama a gↄrↄ ni su kũ oni nↄsɛrii pì bo ń tɛ́, gbasa ò lɛ́ yĩ sà. 16 Gbɛ̃ke dì uta zĩ nambata na kũ pↄ́lɛ dufuoro, zaakũ a dufu ni sↄ̃kũn à kɛ̃kↄ̃rɛ, uta zĩ fↄ̃na ni kara. 17 Òdi sèwɛ̃ dufu ká tùru zĩ gũnlo. Tó ò kɛ̀ lɛ, tùru ni pũtãmɛ, wɛ̃ pì ni kↄ́tɛ, tùru ni wíwi. Oi, òdi sèwɛ̃ dufu ká tùru dufu gũmmɛ, onigↄ̃ mana ń pínki.

Nɛ́nↄkpare vuna kũ nↄgbɛ̃ kũ à ↄ nà Yesu utaaao

(Maa 5:21-43, Luk 8:40-56)

18 Gↄrↄ kũ Yesu tɛn yã birenↄ ońnɛ, gbãnade ke sù à kùtɛ a arɛ à pì: Ma nɛ́nↄgbɛ̃ gà tera dí. Ǹ mↄ́ ǹ ↄ naa, anigↄ̃ kú wɛ̃̀ndiio. 19 Akũ Yesu fùtɛ à tɛ̀i kũ a ìbanↄ.

20 Nↄgbɛ̃ ke kú gwe, aru dì bↄtɛa à kà wɛ̃̀ kuri awɛɛpla. À sù à ↄ nà Yesu uta lɛ́a a kpɛ kpa. 21 Zaakũ à pì: Bee tó ma ↄ nà a utaa dé, mani werekↄ̃a. 22 Yesu lìtɛ à a è, akũ à pì: Ǹ n laakari kpátɛ, nↄgbɛ̃! Ma náani kũ n kɛ̀ mɛ́ à n werekↄ̃a. Gwe gↄ̃̀nↄ nↄgbɛ̃ pì wèrekↄ̃a.

23 Kũ Yesu kà gbãnade pì bɛa, à è òtɛn kutɛ pɛ́, pari kĩni dↄ. 24 Akũ Yesu pì: À á zĩda gá. Nɛ́ pì dí garo, àtɛn i omɛ. Akũ òtɛn a lalandi kɛ. 25 Kũ ò pɛ̀ gbɛ̃nↄa ò bↄ̀tɛ bàai, akũ Yesu gɛ̃̀ kpɛ́n, à nɛ́ pìi kũ̀ a ↄa, akũ à fùtɛ. 26 Akũ yã pì baaruu dà bùsuu pìla pínki.

Vĩ̀nanↄ werekↄ̃anaa

27 Kũ Yesu bò gwe, vĩ̀na gbɛ̃nↄn planↄn tɛ́i kũ wikio òtɛn pi: Ǹ ó wɛ̃nda gwa, Dauda buri! 28 Kũ Yesu kà bɛ, vĩna pìnↄ nài, akũ à ń lá à pì: Á ma náani vĩ kũ mani fↄ̃ mà yã pì kɛárɛ yá? Ò wèa ò pì: Lɛmɛ, Dikiri. 29 Akũ à ↄ nà ń wɛ́a à pì: Àgↄ̃ deárɛ lákũ a ma náani kɛ̀ nà. 30 Akũ ń wɛ́ gu è. Yesu kpã̀kɛ̃ńyĩ à pì: Àsun o gbɛ̃ke maro. 31 Bee kũ abireo ò gɛ̀ɛ ò a baaruu dàgula bùsuu pìn pínki.

Nɛ́nɛnatɛnade werekↄ̃anaa

32 Gↄrↄ kũ vĩ̀nanↄ tɛn bↄtɛ, ò sù Yesunɛ kũ tãnade kũ a nɛ́nɛ natɛnaao. 33 Kũ Yesu tãna pìi gòa, akũ à yã ò. Yã pìi bò pari sarɛ ò pì: Ódi yã bire taka e Isarailanↄ bùsun yãro. 34 Akũ Farisinↄ pì: Àdi tãna goḿma kũ tãnanↄ kína gbãnaomɛ.

Yesu wɛ̃ndadↄ̃na gbɛ̃nↄnɛ

35 Yesu gɛ̀ɛ wɛ̃tɛnↄa kũ lakutunↄ pínki, à yã dàńnɛ ń aduakɛkpɛnↄ gũn, à kpata kũ à bò Luda kĩnaa baaru nna kpàńnɛ, à gyãrenↄ wèrekↄ̃a ń pínki kũ gbãnasaridenↄ ń pínki. 36 Kũ à pari è, akũ ò kɛ̀nɛ wɛ̃nda, zaakũ ò kú bídin, ò lìkara lán sã kũ ò dã̀ri vĩronↄ bà. 37 Akũ Yesu pì a ìbanↄnɛ: Pↄ́kɛ̃na zↄ̃kↄ̃, ama zĩkɛrinↄn dasiro. 38 À wɛ́ kɛ Buradea de à zĩkɛrinↄ gbarɛ ò a pↄ́nↄ kɛ̃.