8
Kusu werekↄ̃anaa
(Maa 1:40-45, Luk 5:12-16)
1 Kũ Yesu kìpa sĩ̀sĩia, pari tɛ́i.
2 Akũ kusu ke sù à kùtɛ a arɛ à pì: Dikiri, tó ń yei, ĩni fↄ̃ ǹ ma werekↄ̃a swáswa.
3 Yesu ↄ bò à nàa à pì: Má yei. Ǹ gↄ̃ swáswa. Zaa gwe gↄ̃̀nↄ a kusu làka.
4 Akũ Yesu pìnɛ: Ǹsun o gbɛ̃ke maro. Ǹ gɛ́ ǹ n zĩda mↄ sa'oriinɛ, ǹ sa'opↄ kũ Musa dìtɛ kpá n werekↄ̃ana sèeda ũ gbɛ̃nↄnɛ.
Sozanↄ gbɛ̃ zↄ̃kↄ̃ zĩkɛri werekↄ̃anaa
(Luk 7:1-10)
5 Kũ Yesu tɛn gɛ̃ Kapɛnamu, akũ Romu sozanↄ gbɛ̃ zↄ̃kↄ̃ↄ sù a kĩnaa, a wɛ́ kɛ̀a
6 à pì: Dikiri, ma zĩkɛri wútɛna bɛ, à kↄ̃̀nↄ kũ̀, mɛ̀ tɛn ũa manamana.
7 Akũ Yesu pìnɛ: Mani gɛ́ mà a werekↄ̃a.
8 Akũ gbɛ̃ zↄ̃kↄ̃ↄ pìi pìnɛ: Dikiri, mádi ká ǹ gɛ́ ma bɛaro. Ǹ yã o dé, ma zĩkɛri ni werekↄ̃a.
9 Zaakũ makũ se, ò iko vĩ ma musumɛ, akũ má iko vĩ sozanↄa. Madì o ń gbɛ̃ donɛ à gɛ́, àdi gɛ́. Madì o a pãndenɛ à mↄ́, àdi su. Madì o ma zĩkɛriinɛ à adikũ kɛ, akũ àdi kɛ.
10 Kũ Yesu yã pìi mà, à bò a sarɛ, akũ à pì gbɛ̃ kũ ò tɛ́inↄnɛ: Yãpuran matɛn oárɛ, mádi le gbɛ̃ke ma náani kɛ̀ lɛ Isarailanↄ tɛ́ro.
11 Matɛn oárɛ, gbɛ̃nↄ ni bo ifãboki kpa kũ ifãlɛtɛ kpao dasidasi oni su pↄ́ ble kũ Ibrahĩo kũ Isaakuo kũ Yakubuo kpata kũ à bò Luda kĩnaa gũn.
12 Gbɛ̃ kũ ò de yã ògↄ̃ kú kpataa pìi gũnnↄ sↄ̃, oni ń zu bàai gusira gũmmɛ. Gwen oni ↄ́ↄ dↄn ò ↄ di ń mìia.
13 Akũ Yesu pì sozanↄ gbɛ̃ zↄ̃kↄ̃ↄ pìinɛ: Ǹ tá bɛ. À kɛnnɛ lákũ n ma náani kɛ̀ nà. Akũ a zĩkɛrii pì gbãna kũ̀ gↄrↄ kũ̀a gↄ̃̀nↄ.
Yesu gyãrenↄ werekↄ̃ana dasidasi
(Maa 1:29-34, Luk 4:38-41)
14 Yesu gɛ̀ɛ Pita bɛa, akũ à è a nanↄ da wútɛna, àtɛn mɛ̀wãna kɛ.
15 Kũ à ↄ nà a ↄa, akũ a mɛ̀ yĩda kũ̀, akũ à fùtɛ à pↄ́ble kɛ̀nɛ.
16 Kũ ↄkↄsi kɛ̀, akũ ò sùnɛ kũ tãnadenↄ dasidasi, akũ à tãna pìnↄ gòḿma kũ yã'onaao, à gyãrenↄ wèrekↄ̃a ń pínki.
17 Lɛn yã kũ annabi Isaya òo kɛ̀ lɛ à pì:
À ó gbãnasarikɛ sɛ̀,
à ó gyãnↄ kɛ̃̀wá.
Gbɛ̃ kũ ò ye ò tɛ́ Yesuinↄ
(Luk 9:57-62)
18 Kũ Yesu è pari kàkaraai, akũ à pì a ìbanↄnɛ: Ò bikũ sɛ̀bɛɛ bara.
19 Akũ ludayãdannɛri ke sù à pì Yesunɛ: Dannɛri, gu kũ ntɛn gɛ́n sĩnda pínki manigↄ̃ tɛ́nyĩ.
20 Yesu pìnɛ: Gbɛ̃gbonnↄ ń tò vĩ, bãnↄn ń sà vĩ, Bisãsiri Nɛ́ sↄ̃ à ĩampaki vĩro.
21 Akũ ìba pãnde pìnɛ: Dikiri, ǹ tó ari ma de kpágui gĩa.
22 Akũ Yesu pìnɛ: Ǹ tɛ́mai. Ǹ tó gɛ̀nↄ ń gɛ̀nↄ vĩ.
Yesu zàga'ĩa zɛnaa
(Maa 4:35-41, Luk 8:22-25)
23 Yesu gɛ̃̀ gó'itɛ gũn, akũ a ìbanↄ tɛ̀i ò dà zɛ́n.
24 Kãnto zàga'ĩa gbãna kàka sɛ̀bɛla, í tɛn vĩvĩ àtɛn káka ń gón. Yesu tɛn i o,
25 akũ a ìbanↄ nài, ò a vù ò pì: Dikiri, ǹ ó sura ba, ótɛn kakatɛmɛ.
26 Akũ à pìńnɛ: Ludanaanikĩanadenↄ! À kɛ̀ dera á vĩna vĩ lɛɛ? Akũ à fùtɛ à gì ĩanɛ kũ ío, akũ gu kɛ̀ kítikiti.
27 Yã pìi bò gbɛ̃ pìnↄ sarɛ ò pì: Gbɛ̃ kpate taka burin dí? Bee ĩa kũ ío dì a yã mamɛ.
Tãnanↄ gbarɛna alɛdɛnↄa
(Maa 5:1-20, Luk 8:26-39)
28 Kũ Yesu bikũ̀ bara dire Gadara bùsun, tãnade gbɛ̃nↄn pla kenↄ bò miranↄ tɛ́, ò sù ò dàalɛ. Ò pãsĩ manamana, gbɛ̃ke dì fↄ̃ à bↄtɛ gwero.
29 Ò wiki lɛ̀ ò pì: Bↄ́n ó vĩ kↄ̃ ↄĩ, Luda Nɛ́? N su wɛ́ tãwá la ari a gↄrↄ gↄ̃ kán yá?
30 Alɛdɛ kpàsa zↄ̃kↄ̃ kú kũńwo zã̀ dire, òtɛn pↄ́ ble.
31 Akũ tãna pìnↄ kútɛ kɛ̀ Yesunɛ ò pì: Tó n pɛ̀wá, ǹ ó gbarɛ alɛdɛ kpàsa dire gũn.
32 Akũ Yesu pìńnɛ: À gɛ́. Akũ ò gòḿma ò gɛ̃̀ alɛdɛnↄ gũn. Akũ alɛdɛ kpàsaa pìi wì kũ bàao pínki, ò sòro sĩ̀sĩgororooa, ò sì sɛ̀bɛn, akũ ò gàga í gũn gwe.
33 Akũ alɛdɛdãrinↄ bàa lɛ̀ ò gɛ̃̀ wɛ̃tɛ gũn, ò yã pìnↄ bàbańnɛ kũ yã kũ à tãnadenↄ lèeo pínki.
34 Akũ wɛ̃tɛdenↄ bↄ̀tɛ ò gɛ̀ɛ da Yesulɛ ń pínki. Kũ ò a è, ò kútɛ kɛ̀nɛ kũ à bońnɛ ń bùsun.