Luda yã takada kũ Bisã yão MATIU 21

Gbãnakɛkpana Yesui Yurusalɛmu

(Maa 11:1-26, Luk 19:28-48, Yuh 12:12-22)

1 Kũ ò kà kãni kũ Yurusalɛmuo, ò kà Bɛtɛfage lakutu kũ à kú Kùkpɛ sĩ̀sĩgɛrɛɛi, akũ Yesu a ìba zĩ̀ gbɛ̃nↄn pla 2 à pìńnɛ: À gɛ́ lakutu kũ à kátɛ á arɛ dire gũn. Tó a gɛ̃ gↄ̃̀nↄ, áni zaaki e kũ a nɛ́o bàdↄna gwe. À poro à suomɛnɛ. 3 Tó ò á lá ò pì, à kɛ̀ deraa, à pi Dikiri mɛ́ à yei, ani ɛra à suo tera. 4 À kɛ̀ lɛ de yã kũ annabii ò kɛ yãimɛ à pì:

5 À o Zaiↄ̃denↄnɛ

ń kína mɛ́ àtɛn su ń kĩnaa.

À busɛ à di zaakinɛ bↄ̀rↄ kpɛ.

6 Ìbaa pìnↄ gɛ̀ɛ ò kɛ̀ lán Yesu òńnɛ nà. 7 Ò sù kũ zaaki pìio kũ a nɛ́o, ò ń utanↄ kpàtɛḿma, akũ Yesu dìa. 8 Gbɛ̃nↄ tɛni ń utanↄ kpátɛ zɛ́n dasidasi, gbɛ̃kenↄ tɛn lá zↄ̃, òtɛn kpátɛ zɛ́n dↄ. 9 Gbɛ̃ kũ ò tɛ́ arɛnↄ kũ gbɛ̃ kũ ò tɛ́ kpɛnↄ tɛn wiki lɛ́ òtɛn pi:

Ǹ gbãna kɛ, Dauda buri!

Arubarikaden gbɛ̃ kũ àtɛn su kũ Dikiri tↄ́o ũ!

Ò gbãnakɛ kpái ari ludambɛ.

10 Kũ Yesu gɛ̃̀ Yurusalɛmu, wɛ̃tɛ lòko, gbɛ̃ sĩnda pínki tɛn pi: Dín gbɛ̃ bire ũu? 11 Pari pì: Annabi Yesumɛ. À bò Nazɛra, Galili bùsun.

Yesu kunna Luda ↄnn

(Maa 11:15-19, Luk 19:45-48, Yuh 2:13-22)

12 Yesu gɛ̃̀ Luda ↄnn, à pɛ̀ lagayarinↄ kũ lagalurinↄa à ń bↄ́tɛ ń pínki. A ↄgↄlilinkɛrinↄ teburunↄ kũ potɛ̃nɛyarinↄ gbànↄ yĩ̀pa à kↄ̀tɛńnɛ. 13 À pìńnɛ: Ò kɛ̃̀ Luda yãn, ma kpɛ́ nigↄ̃ de aduakɛkpɛ ũ, akũ a kɛ̀ gbɛ̃blerinↄ tò ũ.

14 Vĩ̀nanↄ kũ ɛrɛnↄ sù a kĩnaa Luda ↄnn gwe, akũ à ń wérekↄ̃a. 15 Kũ sa'orikinↄ kũ ludayãdannɛrinↄ yãbonsarɛ kũ àtɛn kɛnↄ è, akũsↄ̃ ò mà nɛ́nↄ tɛn wiki dↄa Luda ↄnn òtɛn pi, ǹ gbãna kɛ, Dauda Buri, akũ ń pↄ fɛ̃̀. 16 Ò pìnɛ: N mà lákũ òtɛn o nà yá? Yesu wèḿma à pì: Lɛmɛ! Kũ Luda dà nɛ́ fítinↄnɛ kũ nɛ́kpãntɛ̃nↄ ò a sáabu kpá, ádi a kyó kɛ a màroo? 17 Akũ à bò wɛ̃tɛ pìn à ń tón, à gɛ̀ɛ à ì Bɛtani.

Yesu kaka lí kanaa

(Maa 11:12-14, 20-24)

18 Kũ gu dↄ̀ kↄnkↄkↄnkↄ, à ɛ̀ra àtɛn su wɛ̃tɛn, akũ nà tɛni a dɛ. 19 À kaka lí è zɛ́ lɛ́a, akũ à nài adi pↄ́ke learo, sé a lánↄ. Akũ à pì lí pìinɛ: Ĩni nɛ́ i ziki doro. Gwe gↄ̃̀nↄ lí pìi kori kɛ̀ à gà. 20 Kũ a ìbanↄ è, akũ à bò ń sarɛ ò pì: À kɛ̀ dera kaka lí pìi kori kɛ̀ lɛ gↄ̃̀nↄgↄ̃nↄↄ? 21 Yesu wèḿma à pì: Yãpuran matɛn oárɛ, tó á Luda náani vĩ sikaa sari, adi kɛ kaka lí pì yãn áni kɛ adoro. Tó a ò kpi dínɛ à futɛ à a zĩda sɛ́ à zu sɛ̀bɛn, ani kɛ lɛ. 22 Tó á Luda náani vĩ, yã kũ a a wɛ́ kɛ̀a aduakɛnaa gũn pínki, áni le.

Yesu gbɛkana a ikooi

(Maa 11:27-33, Luk 20:1-8)

23 Yesu gɛ̃̀ Luda ↄnn, àtɛn yã dańnɛ. Akũ sa'orikinↄ kũ gbɛ̃ zↄ̃kↄ̃nↄ sù ò a là ò pì: Iko kpaten ntɛn yã dínↄ kɛoo? Dí mɛ́ à n gba ikoo pìi? 24 Akũ Yesu wèḿma à pì: Makũ sↄ̃, yã mɛ̀n don mani gbɛkaáwa. Tó a òmɛnɛ, mani iko kũ matɛn yã dínↄ kɛo oárɛ. 25 Dí ikoon Yahaya gbɛ̃nↄ da'itɛ kɛ̀oo? À bò Luda kĩnaan yáa, ke bisãsiri kĩnaamɛ? Akũ ò yã gↄ̃̀gↄ̃ ò pì: Tó o pì Luda kĩnaamɛ, ani ó la, bↄ́yãin ódi Yahaya yã síroo. 26 Tó o pì bisãsiri kĩnaamɛ sↄ̃, ó gbɛ̃nↄ vĩna vĩ, zaakũ gbɛ̃ sĩnda pínki Yahaya annabikɛ sì. 27 Akũ ò wè Yesua ò pì: Ó dↄ̃ro. Akũ Yesu pìńnɛ: Ɛ̃hɛ̃ makũ se, mani iko kũ matɛn yã dínↄ kɛo oárɛro.

Nɛ́gↄ̃gbɛ̃ gbɛ̃nↄn planↄ

28 Akũ Yesu pì: Gbɛ̃ke nɛ́gↄ̃gbɛ̃nↄ vĩ gbɛ̃nↄn pla. Akũ à pì Worunɛ: Ǹ gɛ́ ǹ zĩ kɛ bura gbãra. 29 Woru pì: Mani gɛ́ro. Akũ à a nɛ̀sɛɛ lìtɛ zã à gɛ̀ɛ. 30 Mare pìi gɛ̀ɛ à pì Sabinɛ lɛ dↄ. Sabi pì: Tↄ̀. Akũ adi gɛ́ro. 31 A è deraa? Gbɛ̃nↄn pla pìnↄ gũn, ń dí mɛ́ à a de pↄyeinaa kɛ̀ɛ? Ò pì: Worumɛ. Akũ Yesu pìńnɛ: Yãpuran matɛn oárɛ, bɛ'ↄgↄsirinↄ kũ karuanↄ ni gɛ̃ kpata kũ à bò Luda kĩnaa gũn á ã. 32 Zaakũ Yahaya sù, à zɛ́ súsu mↄ̀árɛ, ádi a yã síro. Bɛ'ↄgↄsirinↄ kũ karuanↄ mɛ́ ò a yã sì. Bee kũ abirekũ enaao ádi á nɛ̀sɛ litɛ zã a a yã sìro.

Geepi líkpɛ arukɛrinↄ

(Maa 12:1-12, Luk 20:9-18)

33 À yã pãnde ma dↄ. Burade ke mɛ́ à kun, à geepi líkpɛ bà à karaa lìkai, à wɛ̀ɛ yↄ̃̀ a gũn geepi'ifɛ̃ki ũ à búdãkpãgbaa dↄ̀. Akũ à bú pìi nà arukɛrinↄnɛ ń ↄĩ, akũ à fùtɛ kũ táo. 34 Kũ geepizↄ̃gↄrↄ kà, akũ à a zĩ̀rinↄ zĩ̀ arukɛrii pìnↄa, de ò a geepi nɛ́ sí. 35 Akũ arukɛrii pìnↄ a zĩ̀rinↄ kũ̀kũ, ò ń gbɛ̃ do gbɛ̃̀, ò ń gbɛ̃ do dɛ̀, ò ń gbɛ̃ do pàpa kũ gbɛ̀ɛo ò a dɛ̀. 36 Akũ à ɛ̀ra à zĩ̀ri pãndenↄ zĩ̀ḿma, ń dasi de gbɛ̃ káakunↄla, akũ ò kɛ̀ńnɛ lɛ dↄ. 37 Kpɛkpɛ à a nɛ́ zĩ̀ḿma à pì: Oni ma nɛ́ yã da. 38 Kũ arukɛrii pìnↄ nɛ́ pìi è, ò pìkↄ̃nɛ: Túbibleriin dí. À tó ò a dɛ, a túbi ni gↄ̃ ó pↄ́ ũ. 39 Akũ ò a kũ̀ ò bò kãao bura gũn, ò a dɛ̀. 40 Tↄ̀! Tó burade pìi sù, bↄ́n ani kɛ arukɛrii pìnↄnɛɛ? 41 Ò wèa ò pì: Ani gbɛ̃ pãsĩ pìnↄ dɛdɛ pãsĩpãsĩ, ani bura pì na arukɛri pãnde kũ oni a baka kpáa a gↄrↄanↄnɛ ń ↄĩ. 42 Akũ Yesu pìńnɛ: Ádi Luda yã dí kyó kɛroo?

Gbɛ̀ kũ kpɛ́borinↄ pã kpài

mɛ́ à gↄ̃̀ kpɛ́ kusuru gbɛ̀ mìde ũ.

Dikiri mɛ́ à abirekũ kɛ̀

akũ à kɛ̀wɛrɛ yãbonsarɛ ũ.

43-44 Abire yãi matɛn oárɛ: Luda ni á bo kpata kũ à bò a kĩnaa gũn, ani gbɛ̃ kũ oni a baka kpáanↄ kán.

45 Kũ sa'orikinↄ kũ Farisinↄ Yesu yãlɛkↄ̃anaa pìnↄ mà, ò dↄ̃ kũ ń yãn àtɛn o. 46 Akũ ò zɛ́ wɛ̀tɛ ò a kũ, ama ò vĩna kɛ̀ parinɛ, kũ ò a dìtɛ annabi ũ yãi.