Luda yã takada kũ Bisã yão MATIU 20

Yãlɛkↄ̃ana kũ zamalingakɛrinↄ

1 Lákũ kpata kũ à bò Luda kĩnaa de nàn dí: Ɔmbede ke mɛ́ à bò kↄnkↄkↄnkↄ, à gɛ̀ɛ zamalingakɛrinↄ wɛtɛ ò zĩ kɛarɛ a bura. 2 Ń yã kↄ̃ sɛ̀ à fĩna bońnɛ andurufu ↄgↄ mɛ̀n dodo. Akũ à ń gbárɛ a bura. 3 À bò dↄ mↄ̀ kɛ̃ndo, akũ à gbɛ̃ pãndenↄ lè ɛtɛ gũn katɛna pã. 4 À pìńnɛ: Ákↄ̃nↄ sↄ̃, à gɛ́ à zĩ kɛ ma bura, mani fĩna boárɛ a zɛ́a. 5 Akũ ò gɛ̀ɛ. À ɛ̀ra à bò dↄ ifãntɛ̃ mìdangura, akũ à ɛ̀ra à bò ifãntɛ̃ ura kipana, à ò gbɛ̃ pãndenↄnɛ lɛ dↄ. 6 Kũ à bò ↄkↄsi, à gbɛ̃ pãndenↄ lè katɛna, akũ à ń lá à pì: Bↄ́yãi á katɛna la pã zaa kↄnkↄↄ? 7 Ò wèa ò pì: Kũ òdi zĩ dawɛrɛro yãimɛ. À pìńnɛ: À gɛ́ à zĩ kɛ ma bura se. 8 Ifãntɛ̃ gɛ̃na kpɛ́nn burade pìi pì a zamalingakɛrinↄ gbɛ̃ zↄ̃kↄ̃ↄnɛ: Ǹ zamalingakɛrinↄ sísi ǹ fĩna bońnɛ. Ǹ naa gbɛ̃ kpɛdenↄa ari à gɛ́ mì dɛ gbɛ̃ káakunↄa. 9 Akũ ↄkↄsidenↄ sù, ò andurufu ↄgↄ lè mɛ̀n dodo. 10 Kũ gbɛ̃ káakunↄ sù, òtɛn da ń ↄgↄ nigↄ̃ de gbɛ̃ kpɛdenↄ pↄ́lamɛ, akũ andurufu ↄgↄ mɛ̀n don ò lè ń pínki. 11 Kũ ò ń ↄgↄ sì, akũ ò lɛ́fↄtↄ kà bede pìii 12 ò pì: Awa don gbɛ̃ kpɛdenↄ zĩ kɛ̀, akũ n ń kɛ́ sára kũ ókↄ̃nↄ kũ o zĩ zↄ̃kↄ̃ↄ kɛ̀ ifãntɛ̃ gbãna gũnwoo yá? 13 Akũ à wè ń gbɛ̃ do pìia à pì: Ma gbɛ̃, mádi n blero. O kↄ̃ yã mà andurufu ↄgↄ mɛ̀n do musunloo? 14 Ǹ n pↄ́ sí ǹ tá. Má ye mà kpá gbɛ̃ kpɛde díkĩnaa lán n pↄ́ bàmɛ. 15 Má zɛ́ vĩ mà kɛ kũ ma ↄgↄo lákũ má yei nàroo? Ntɛn wɛ́ boboi kũ má gbɛ̃kɛ vĩ yãin yá? 16 Lɛn gbɛ̃ kpɛdenↄ nigↄ̃ gbɛ̃ káakunↄ ũ lɛ, gbɛ̃ káakunↄ nigↄ̃ gbɛ̃ kpɛdenↄ ũ.

Yesu ɛra à a ga kũ a vunaao yã'onaa

(Maa 10:32-34, Luk 18:31-34)

17 Gↄrↄ kũ Yesu tɛn gɛ́ Yurusalɛmu, à a ìba gbɛ̃nↄn kuri awɛɛplanↄ sɛ̀tɛ ńdona, à yã òńnɛ zɛ́n à pì: 18 Ótɛn gɛ́ Yurusalɛmumɛ. Gwen oni Bisãsiri Nɛ́ kpá sa'orikinↄa kũ ludayãdannɛrinↄ, oni yã daala à ga, 19 oni a kpá buri pãnde gbɛ̃nↄa. Oni a fobo, oni a gbɛ̃ kũ flã̀ao, oni a pá lía ò a dɛ, a gↄrↄ aakↄ̃de zĩ ani vu.

Yamisi kũ Yuhanao wɛ́kɛnaa

(Maa 10:35-45)

20 Akũ Zebedi nɛ́nↄ da sù Yesu kĩnaa kũ a nɛ́nↄ. À ye à wɛ́ kɛa, akũ à kùtɛnɛ. 21 Akũ à a là à pì: Bↄ́n ń yeii? À wèa à pì: Ǹ tó ma nɛ́ gbɛ̃nↄn pla dínↄ vutɛ kũnwo n kpatan, gbɛ̃ do n ↄplai, gbɛ̃ do ↄzɛi. 22 Akũ Yesu pì nɛ́ pìnↄnɛ: Á yã kũ átɛni a wɛ́ kɛma dↄ̃ro. Toko'i kũ mani mi, áni fↄ̃ à mi yá? Ò wèa ò pì: Óni fↄ̃. 23 Yesu pìńnɛ: Toko'i kũ mani mi, áni mi fá, ama vutɛna ma ↄplai ke ma ↄzɛi bi ma yãnlo. Gbɛ̃ kũ ma De kɛ̀kɛńnɛnↄ pↄ́mɛ. 24 Kũ a ìba gbɛ̃nↄn kuri kparanↄ yã pìi mà, ń pↄ fɛ̃̀ vĩ̀ni kũ dakũnaoo pìii. 25 Akũ Yesu ń kákara à pìńnɛ: Á dↄ̃ kũ buri pãnde kínanↄ dì gbãna ble ń gbɛ̃nↄa, gbãnadenↄ sↄ̃ òdi iko mↄńnɛ, 26 ama à de lɛ á kĩnaaro. Á tɛ́ gbɛ̃ kũ à ye à gↄ̃ gbɛ̃ zↄ̃kↄ̃ ũ, sé ade kɛ á zĩ̀ri ũ. 27 Lɛmɛ dↄ gbɛ̃ kũ à ye à gↄ̃ gbɛ̃ káaku ũ, sé ade kɛ á zↄ̀ ũ. 28 Zaakũ Bisãsiri Nɛ́ dí su de ò zĩ kɛnɛro, à sù de à zĩ kɛńnɛmɛ, à a zĩda wɛ̃̀ndi kpá de à gbɛ̃nↄ bo dasi yãi.

Vĩ̀na barakɛrinↄ werekↄ̃anaa

(Maa 10:46-52, Luk 18:35-43)

29 Gↄrↄ kũ òtɛn bo Yɛriko, pari tɛ́ Yesui. 30 Vĩ̀na gbɛ̃nↄn planↄ vutɛna zɛ́ lɛ́a, ò mà Yesu mɛ́ àtɛn gɛ̃tɛ, akũ òtɛn lɛ́ gbãna zu ò pì: Dikiri, Dauda Buri, ǹ ó wɛ̃nda gwa! 31 Ò gìńnɛ ò pì ò yĩtɛ, akũ ò lɛ́ gbãna zunaa kàra òtɛn pì: Dikiri, Dauda Buri, ǹ ó wɛ̃nda gwa! 32 Akũ Yesu zɛ̀ à ń sísi, à ń lá à pì: Bↄ́n á ye mà kɛárɛɛ? 33 Ò wèa ò pì: Dikiri, ó ye ó wɛ́ gu emɛ. 34 Yesu ń wɛ̃nda gwà, à ↄ nà ń wɛ́a. Gwe gↄ̃̀nↄ ń wɛ́ gu è, akũ ò tɛ̀i.