Luda yã takada kũ Bisã yão LUKU 23

Pilati yãkpatɛkɛna kũ Yesuo

(Mat 27:1-2, Maa 15:1-5, Yuh 18:28-38)

1 Akũ ò fùtɛ ń pínki ò gɛ̀ɛ kãao Pilati kĩnaa. 2 Òtɛn yã dia ò pì: O gbɛ̃ dí lè àtɛn gudɛ kɛ ó bùsun, àdi gíńnɛ ò bɛ'ↄgↄ kpá Sizaa, akũ à a zĩda dìtɛ Arumasihu ũ, kína ũ. 3 Akũ Pilati a là à pì: Mↄkↄ̃n Yudanↄ kína ũ yá? À wèa à pì: Lɛn n ò lɛ. 4 Akũ Pilati pì sa'orikinↄ kũ pari kũ ò kú gwenↄnɛ: Mádi taari e gↄ̃gbɛ̃ pìiaro. 5 Akũ ò nàkara kãao ò pì: Àdigↄ̃ tɛ́ ká gbɛ̃nↄgu a yãdannɛnaa gũn Yudea bùsun pínki. À nàa Galilimɛ ari à gɛ̀ɛ à kào la sà.

6 Kũ Pilati mà lɛ, akũ à gbɛ̀ka tó Galili gbɛ̃mɛ a ũ. 7 Kũ à dↄ̃ kũ à bò Hɛrↄdu bùsummɛ, akũ Hɛrↄdu pì sↄ̃ à kú Yurusalɛmu zĩ birea, akũ à a gbàrɛa. 8 Kũ Hɛrↄdu Yesu è, akũ a pↄ kɛ̀ nna manamana. À a baaruu mà, akũ à ye ń wɛ́ kɛ pla zaa gìkɛna. À wɛ́ dↄ à Yesu daboyãkɛna e. 9 À yãnↄ làlaa dasi, akũ Yesu dí a ke wearo. 10 Sa'orikinↄ kũ ludayãdannɛrinↄn zɛna gwe òtɛn yã didia pãsĩpãsĩ. 11 Hɛrↄdu kũ a sozanↄ Yesu gya bò ò a fobò ò uta wɛ́de dànɛ, akũ à ɛ̀ra à a gbàrɛ Pilatia. 12 Zĩ birea Hɛrↄdu kũ Pilatio gↄ̃̀ kↄ̃ gbɛ̃ ũ, zaakũ ò ibɛrɛɛ sɛ̀ kũ kↄ̃o yã.

Yãdana Yesula

(Mat 27:15-26, Maa 15:6-15, Yuh 18:39-19:16)

13 Pilati sa'orikinↄ kũ gbãnadenↄ kũ gbɛ̃ kparanↄ kàkara ń pínki 14 à pìńnɛ: A sumɛnɛ kũ gↄ̃gbɛ̃ kũ a pì gudɛriimɛɛo. Ma a làla á wára yã kũ a dìdianↄ musu, mádi e à taari ke kɛ̀ro. 15 Lɛn Hɛrↄdu dí ero lɛ se, zaakũ à ɛ̀ra à a gbàrɛwámɛ. À gwa, adi yãke kɛ kũ à kà mà a dɛro. 16-17 Mani tó ò wari dↄa, gbasa mà a gbarɛ. 18 Akũ ò wiki lɛ̀ ń pínki lɛɛlɛ ò pì: Ǹ gↄ̃gbɛ̃ pì dɛ! Ǹ Baraba gbarɛwɛrɛ! 19 Ò Baraba pìi dà kpɛ́siran yã bona gbãnadenↄ kpɛ kũ gbɛ̃dɛnaao yãimɛ. 20 Pilati ye à Yesu gbarɛ, akũ à gbɛ̃nↄ laakarii gàtɛ à sùawa. 21 Akũ ò ɛ̀ra ò wiki lɛ̀ ò pì: Ǹ a pá lía! Ǹ a pá lía! 22 A gɛ̃̀n aakↄ̃deo Pilati pìńnɛ: Bↄ́ dàan à kɛ̀ɛ? Mádi taari kũ à kà ò a dɛ earo. Mani tó ò wari dↄa, gbasa mà a gbarɛ. 23 Akũ ò zɛ̀i òtɛn gbɛkaa kũ wiki gbãnao à a pá lía. Akũ ń zukakanaa tò ò yã blè. 24 Akũ Pilati dìtɛ kũ ò kɛ lákũ ò gbɛ̀kaawa nà. 25 Gↄ̃gbɛ̃ kũ ò dà kpɛ́siran bona gbãnadenↄ kpɛ kũ gbɛ̃dɛnaao yãi kũ ò gbɛ̀kaa pìin à gbàrɛńnɛ, akũ à Yesu kpà gai lákũ ò yei nà.

Yesu pana lía

(Mat 27:32-44, Maa 15:21-32, Yuh 19:17-27)

26 Kũ òtɛn gɛ́ kãao, akũ Sirɛni gbɛ̃ Simↄ tɛn su kũ burao, akũ ò a kũ̀ ò lígbãndurukpanaa dìnɛ àgↄ̃ tɛ́o Yesui. 27 Pari bò tɛ́i kũ nↄgbɛ̃ kũ òtɛn ↄ́ↄ dↄ òtɛn wɛ̃nda kɛnɛnↄ. 28 Yesu lìtɛ à arɛ dↄ̀ḿma à pì: Yurusalɛmu nↄgbɛ̃nↄ, àsun ↄ́ↄ dↄ ma yãiro. À ↄ́ↄ dↄ á zĩda yãi kũ á nɛ́nↄ. 29 Zaakũ a gↄrↄ tɛn su kũ oni pi: Arubarikadenↄn para kũ odi nɛ́ iro, nɛ́ dí ń yↄ̃ mironↄ ũ. 30 Gↄrↄ birea

oni pi kpinↄ lɛ́tɛ à siḿma,

oni o sĩ̀sĩnↄ lɛ́tɛ à dańla.

31 Lákũ òtɛn yã dí taka kɛ kũ lí búsuo, lí kori pↄ́ nigↄ̃ de deraa?

32 Òtɛn gɛ́ kũ dàkɛri gbɛ̃nↄn pla kenↄ dↄ, de ò ń dɛdɛ kũ Yesuo lɛɛlɛ. 33 Kũ ò kà gu kũ òdi pi Mìtokokia, akũ ò a pà lía gwe kũ dàkɛrii pìnↄ, gbɛ̃ do a ↄplai, gbɛ̃ do a ↄzɛi. 34 Akũ Yesu pì: Baa, ǹ gaafara kɛńnɛ, zaakũ ò dↄ̃ pↄ́ kũ òtɛn kɛro. Akũ ò kàpaa kpà ò a pↄ́kasanↄ kpàatɛkↄ̃nɛ. 35 Gbɛ̃nↄn zɛna gwe ò wɛ́ kà òtɛni a gwa, akũ Yuda gbãnadenↄ tɛn lɛ́zuki kɛa ò pì: A gbɛ̃ pãndenↄ sura bà. Tó Arumasihu kũ Luda dìtɛmɛ a ũ, à a zĩda sura baee! 36 Sozanↄ tɛni a lalandi kɛ dↄ. Akũ ò nài ò sèwɛ̃ kpã̀kpãa dↄ̀nɛ 37 ò pì: Tó Yudanↄ kínamɛ n ũ, ǹ n zĩda sura ba. 38 Sèeda ke na a mìi musu ò kɛ̃̀a:

Yudanↄ kínan dí!

39 Dàkɛri kũ ò lokona lía pìnↄ do dↄkɛna yã ònɛ à pì: Arumasihumɛ n ũroo? Ǹ n zĩda sura ba kũ ókↄ̃nↄo lɛɛlɛ. 40 Akũ a gbɛ̃ndo pàtaa à pì: Ń Luda vĩna vĩroo? Yã dokↄ̃nↄ mɛ́ à kúwá. 41 Ókↄ̃nↄ, ó pↄ́ kú a zɛ́amɛ. Pↄ́ kũ o tↄ̃̀ mɛ́ à bùtɛwá, ama gbɛ̃ dí dí yã ke kɛro. 42 Akũ a pì: Yesu, tó n su kpata ble, ǹ dↄ ma yãn. 43 Akũ à wèa à pì: Yãpuran matɛn onnɛ, gbãra ĩnigↄ̃ kú kũmao aruzenna.

Yesu ganaa

(Mat 27:45-56, Maa 15:33-41, Yuh 19:28-30)

44 Kũ ifãntɛ̃ kà mìdangura, akũ gusira dà bùsuu pìla pínki ari fãnantɛ̃ mↄ̀ aakↄ̃. 45 Luda kpɛ́ lábure kɛ̃̀kↄ̃rɛ pla. 46 Yesu wiki gbãna lɛ̀ à pì: Baa, ma a wɛ̃̀ndii nànnɛ n ↄĩ. Kũ à ò lɛ, akũ a wɛ̃̀ndii tà. 47 Kũ sozanↄ gbɛ̃ zↄ̃kↄ̃ yã kũ à kɛ̀ɛ pìi è, à Luda sáabu kpà à pì: Yãpuramɛ gbɛ̃ manamɛ a ũ. 48 Pari kũ ò kàkara ò sù gu gwanↄ, kũ ò yã kũ à kɛ̀nↄ è, ò ɛ̀ra ò tà òtɛni ń zĩda lɛ́lɛ. 49 Yesu gbɛ̃ dↄ̃nanↄ kũ nↄgbɛ̃ kũ ò tɛ́i bona Galilinↄ pínki zɛna zã̀ òtɛn gu gwa.

Yesu vĩnaa

(Mat 27:57-61, Maa 15:42-47, Yuh 19:38-42)

50 Gↄ̃gbɛ̃ ke kun a tↄ́n Yusufu. Yuda gbãnadenↄ dokemɛ. Gbɛ̃ manamɛ, akũsↄ̃ à bɛ̀ɛrɛ vĩ. 51 A lɛ́ kú yã kũ a gbɛ̃nↄ zɛ̀ kũ a kɛnaaoo pìnlo. Yuda lakutu Arimatea gbɛ̃mɛ, a wɛ́ dↄ kpata kũ à bò Luda kĩnaai. 52 À gɛ̀ɛ Pilati kĩnaa à Yesu gɛ̀ɛ gbɛ̀kaa. 53 Akũ à gɛ̀ɛ pìi kìpa à táaru biza fĩ̀fĩa à dà gbɛ̀wɛɛ kũ ò sↄ̀ mira ũ gũn, odi gbɛ̃ke dan zikiro. 54 Gↄrↄ pì bi azuma zĩmɛ, kámmabogↄrↄ tɛn ká. 55 Nↄgbɛ̃ kũ ò tɛ́ Yesui bona Galilinↄn tɛ́ Yusufu pì kpɛ, ò mira pìi è lákũ à Yesu gɛ̀ɛ wùtɛ a gũn nà. 56 Akũ ò tà ò gɛ̀ɛ nísi gbĩ nna kũ ɛzɛ kũ àdi tó gɛ̀ vãro soru kɛ. Kámmabogↄrↄ zĩ ò kámma bò lákũ Luda dìtɛ nà.