Luda yã takada kũ Bisã yão LUKU 22

Lɛ́kpakũsũna Yesui

(Mat 26:1-5, Maa 14:1-2, Yuh 11:45-53)

1 Burodi Futɛnasari dikpɛ kũ òdi pi Vĩnla kà kãni. 2 Sa'orikinↄ kũ ludayãdannɛrinↄ tɛn zɛ́ wɛtɛ ò Yesu dɛ, zaakũ òtɛn vĩna kɛ gbɛ̃nↄnɛ.

Yudasi bona Yesu kpɛ

(Mat 26:14-16, Maa 14:10-11)

3 Akũ Setan gɛ̃̀ Yudasi kũ òdi pinɛ Isikariↄti gũn, gbɛ̃nↄn kuri awɛɛplanↄ dokemɛ. 4 Akũ Yudasi gɛ̀ɛ à yã ò kũ sa'orikinↄ kũ Luda ↄn dãkpãri gbɛ̃ zↄ̃kↄ̃nↄ lákũ áni kɛ nà à Yesu kpáḿma. 5 Ń pↄ kɛ̀ nna, akũ ò lɛ́dokↄ̃nↄ kɛ̀ ò ↄgↄ kpáa. 6 À zɛ̀o, akũ àtɛn zɛ́ wɛtɛ à Yesu kpáḿma gbɛ̃nↄ kpɛ.

Vĩnla pↄ́blenaa

(Mat 26:17-25, Maa 14:12-21, Yuh 13:21-30)

7 Burodi Futɛnasari dikpɛ gↄrↄ kà, gↄrↄ kũ òdi Vĩnla sãnɛ bↄ̀rↄↄ kùtu kpá. 8 Akũ Yesu Pita kũ Yuhanao zĩ̀ à pì: À gɛ́ Vĩnla pↄ́bleyã kɛkɛwɛrɛ. 9 Akũ ò a là ò pì: Ń ye ò kɛkɛ mámɛɛ? 10 Akũ à wèḿma à pì: Tó a gɛ wɛ̃tɛ gũn, gↄ̃gbɛ̃ ke ni daálɛ à í sɛna kũ loo. À tɛ́i ari ↄn kũ ani gɛ̃n. 11 À o ↄn pì bedenɛ, Dannɛri pì, mán kipaki kunn, gu kũ áni Vĩnla pↄ́ blen kũ a ìbanↄo? 12 Ani kpɛ́ musu zↄ̃kↄ̃ kũ ò kɛ̀kɛ mↄárɛ. À pↄ́bleyã kɛkɛ gwe.

13 Kũ ò gɛ̀ɛ, ò è lákũ Yesu òńnɛ nà, akũ ò Vĩnla pↄ́bleyã kɛ̀kɛ gwe.

Dikiri pↄ́ble

(Mat 26:26-30, Maa 14:22-26, 1Kↄ 11:23-25)

14 Kũ a gↄrↄ kà, Yesu sù à vùtɛ gwe kũ a zĩ̀rinↄ lɛɛlɛ. 15 Akũ à pìńnɛ: Vĩnla pↄ́ble dí blena kãáo ni tɛni ma dɛ manamana ari màgↄ̃ gɛ́ wari kɛ, 16 zaakũ matɛn oárɛ, mani ble doro ari kpata kũ à bò Luda kĩnaa gɛ́ boo gupuraa, gbasa dikpɛ yãpura gɛ́ su. 17 Kũ à toko sɛ̀, à Luda sáabu kpà, akũ à pì: À sí à dↄdↄkↄ̃nɛ, 18 zaakũ matɛn oárɛ, mani geepi'i mi doro ari kpata kũ à bò Luda kĩnaa gɛ́ boo gupuraa. 19 Kũ à burodii sɛ̀, akũ à arubarikaa dàn à lìkↄ̃rɛ à kpàḿma à pì: Ma mɛ̀ kũ má kpà á yãin dí, àgↄ̃ abirekũ kɛ ma yã dↄnaágu yãi. 20 Kũ ò pↄ́ blè ò làka, à toko pìi sɛ̀ lɛ dↄ à pì: Ma aru kũ ani bↄtɛárɛn dí, Luda bàka kunna kũ gbɛ̃nↄo tera aru ũ. 21 Ma bonkpɛde ↄ kú kũmao ta gũn, 22 zaakũ Bisãsiri Nɛ́ ni kpágui lákũ Luda dìtɛnɛ nàmɛ. Waiyoo gbɛ̃ kũ ani a kpáḿma pìi. 23 Akũ ò nà kↄ̃ lalanaaa ò pì: Ó dí mɛ́ ani yã bire kɛɛ?

Yesu lɛ́dana a ìbanↄa

24 Akũ lɛ́kpakↄ̃anaa fùtɛ ń tɛ́, kũ ò ye ò dↄ̃ ń gbɛ̃ kũ à de a dakela. 25 Akũ Yesu pìńnɛ: Buri pãnde kínanↄ dì gbãna ble ń gbɛ̃nↄa, gbãnadenↄ sↄ̃ òdi ń zĩda sísi yãmanakɛrinↄ. 26 Ama àsun kɛ lɛro. Séde gbɛ̃ kũ à zↄ̃kↄ̃ á tɛ́ gↄ̃ de lán gbɛ̃ kũ à kĩanaái bà. Séde á don'arɛde gↄ̃ de lán gbɛ̃ kũ àtɛn zĩ kɛárɛ bà. 27 Pↄ́bleri kũ zĩ̀riio, ń dí mɛ́ à zↄ̃kↄ̃ↄ? Pↄ́bleriinloo? Makũ sↄ̃ má kú á tɛ́ lán zĩ̀rii bàmɛ. 28 Gbɛ̃ kũ ò zɛ̀ kũmao ma warikɛnaa gũnnↄn á ũ. 29 Lákũ ma De ma ka kpatan nà, lɛn mani á ká kpatan lɛ se, 30 áni pↄ́ ble kũmao ma kpatan, áni vutɛ kíblegbaaa àgↄ̃ yã gↄ̃gↄ̃ Isaraila buri mɛ̀n kuri awɛɛplanↄnɛ.

Yesu gĩnakɛ à dↄ̃ yã kũ Pita ni kɛ

(Mat 26:31-35, Maa 14:27-31, Yuh 13:36-38)

31 Simↄ, Simↄ, ǹ ma. Setan zɛ́ wɛ̀tɛ à á fãfã lákũ òdi pↄ́blewɛ fãfã nà. 32 Akũ ma adua kɛ̀nnɛ de ma náani kũ ń vĩ sún kĩammaro. Tó n ɛra n suma, ǹ n gbɛ̃nↄ gba gbãna. 33 Pita pìnɛ: Dikiri, ma sì ò ma da kpɛ́siran mà ga kũnwo.

34 Yesu pì: Pita, matɛn onnɛ, ari ko gↄ̃ gɛ́ lɛ́ zuo gbãra, ĩni ledi kpámai gɛ̃̀n aakↄ̃. 35 Akũ à ń lá à pì: Kũ ma á zĩ ↄgↄsↄ̃nↄ kũ bↄ̀kↄlokonaao kũ kyatenↄ sari, pↄ́ke kĩ̀aáwa yá? Akũ ò pì: Oi. 36 Akũ à pìńnɛ: Tera sà gbɛ̃ kũ à ↄgↄsↄ̃nↄ vĩ, à sɛ́. Lɛmɛ dↄ kũ bↄ̀kↄlokonaao. Gbɛ̃ kũ à fɛ̃nɛda vĩ sↄ̃ro, à a uta yía à lú. 37 Matɛn oárɛ, séto yã kũ ò kɛ̃̀ Luda yãn ma musu papa kũ ò pì: Ò a dìtɛ dokↄ̃nↄ kũ taarikɛrinↄ. Yã kũ ò kɛ̃̀ ma musu pì mɛ́ àtɛn kɛ sà. 38 Ò pì: Dikiri, fɛ̃nɛda mɛ̀n plan dí. Akũ à pìńnɛ: Abirekũ mↄ̀.

Yesu aduakɛna zaa Kùkpɛ sĩ̀sĩgɛrɛɛi

(Mat 26:36-46, Maa 14:32-42)

39 Yesu bò à gɛ̀ɛ Kùkpɛ sĩ̀sĩgɛrɛɛi lákũ àdi kɛ nà. A ìbanↄn tɛ́i. 40 Kũ à kà gu kũ àtɛn gɛ́n, à pìńnɛ: À adua kɛ de ásun fu yↄ̃ogwanaaaro. 41 Akũ à kɛ̃̀ḿma à kà lákũ òdi gbɛ̀ zu à lɛ́tɛ taka bà. Akũ à kùtɛ à adua kɛ̀ 42 à pì: Baa, tó ń ye, ǹ toko'í síma, ama adi kɛ ma pↄyenyĩnaanlo, séde n pↄ́. 43 Akũ malaikaa bò ludambɛ à sùa à a gbà gbãna. 44 Kunna wɛ́tãmma gũn àtɛn adua kɛ kũ kokario. Akũ a ísimma tɛn tↄ́ zĩtɛ lán arutↄnaa bà. 45 Kũ à adua kɛ̀, à fùtɛ à ɛ̀ara à sù à a ìbanↄ lè, òtɛn i o kũ pↄsirao. 46 Akũ à pìńnɛ: À kɛ̀ dera átɛn i oo? À futɛ à adua kɛ de ásun fu yↄ̃ogwanaaaro.

Yesu kũnaa

(Mat 26:47-56, Maa 14:43-50, Yuh 18:3-11)

47 Kũ à kpɛ́ àtɛn yã o, akũ ò kà dasidasi. Gbɛ̃ kũ òdi pinɛ Yudasi, a ìba gbɛ̃nↄn kuri awɛɛplanↄ doke mɛ́ à dòńnɛ arɛ. Kũ à nài de à lɛ́ pɛ́a, 48 akũ Yesu pìnɛ: Yudasi, lɛ́pɛnaaan ĩni Bisãsiri Nɛ́ kpáoḿma yá? 49 Kũ gbɛ̃ kũ ò kú kũ Yesuonↄ yã kũ àtɛn su è ò pì: Dikiri, ò ń lɛ́lɛ kũ fɛ̃nɛdaon yá? 50 Akũ ń gbɛ̃ do sa'oriki zↄ̃kↄ̃ↄ zĩ̀rii lɛ̀ à a ↄpla sã gò. 51 Akũ Yesu pì: À abirekũ tó. Kũ à ↄ nà a sãa, akũ a sã ɛ̀ra à nàn. 52 Akũ à pì sa'orikinↄ kũ Luda ↄn dãkpãrinↄ kũ gbɛ̃ zↄ̃kↄ̃ kũ ò sùinↄnɛ: A sumai kũ fɛ̃nɛdanↄ kũ gònↄ lákũ kpãni wɛ́dewɛn ma ũ bà yá? 53 Lákũ gu dìgↄ̃ dↄ nà madìgↄ̃ kú kãáo Luda ↄnn, akũ ádi ↄ namaro. Ama gↄrↄ dí de á pↄ́ ũmɛ, gusira kíblena gↄrↄmɛ.

Pita ledikpana Yesui

(Mat 26:57-58, 69-75, Maa 14:53-54, 66-72, Yuh 18:12-18, 25-27)

54 Kũ ò Yesu kũ̀ ò sù kãao, ò gɛ̀ɛ kãao sa'oriki zↄ̃kↄ̃ bɛa. Pita tɛ́ ń kpɛ zã̀zã. 55 Kũ ò tɛ́ kà ↄn gura, ò kàtɛ ò lìkai, akũ Pita sù à sↄ̀tↄ ń tɛ́. 56 Zↄ̀nↄkpare ke a è, akũ à wɛ́ dìa à pì: Gbɛ̃ dí kú kãao sↄ̃ bi. 57 Akũ à ledi kpài à pì: Nↄgbɛ̃, má a dↄ̃ro. 58 Kũ à kɛ̀ saa fíti gbɛ̃ pãnde a è, akũ à pì: Mↄkↄ̃n se, ń gbɛ̃ domɛ n ũ. Akũ Pita pì gↄ̃gbɛ̃ pìinɛ: Makũmɛro. 59 Kũ gↄrↄ gɛ̃̀tɛ lán awa do bà, gbɛ̃ pãnde nàkarao à pì: Yãpura gbɛ̃ díkĩna kú kãaomɛ, zaakũ Galili gbɛ̃mɛ. 60 Akũ Pita pì: Má dↄ̃ pↄ́ kũ ń tɛ́aro. Zaa gwe gↄ̃̀nↄ kũ àtɛn yã o, akũ ko lɛ́ zù. 61 Dikiri lìtɛ à wɛ́ pɛ̀ Pitaa, akũ yã kũ à òo dↄ̀ Pitagu kũ à pì, ari ko gↄ̃ gɛ́ lɛ́ zu gbãra, ani ledi kpáai gɛ̃̀n aakↄ̃. 62 Akũ Pita bò bàai à pↄsira ↄ́ↄ dↄ̀.

Yesu fobonaa

(Mat 26:67-68, Maa 14:65)

63 Gbɛ̃ kũ òtɛn Yesu dãkpãnↄ a fobò ò a gbɛ̃̀. 64 Ò pↄ́ yĩ̀nɛ a ãnnwa, akũ òtɛni a lala ò pì: Ǹ annabikɛyã o, dí mɛ́ à n lɛɛ? 65 Dↄkɛna kãao gũn ò yã dasi pãndenↄ ònɛ dↄ.

Yuda gbãnadenↄ yãkpatɛkɛna kũ Yesuo

(Mat 26:59-66, Maa 14:55-64, Yuh 18:19-24)

66 Kũ gu dↄ̀, Yuda gbɛ̃ zↄ̃kↄ̃nↄ kↄ̃ kàkara, sa'orikinↄ kũ ludayãdannɛrinↄ ń pínki, akũ ò Yesu sɛ̀ ò gɛ̀ɛo ń yãkpatɛkɛkia. 67 Akũ ò a là ò pì: Arumasihumɛ n ũ yá? Ǹ owɛrɛ. À wèḿma à pì: Tó ma òárɛ, áni síro. 68 Tó ma yãke làáwa sↄ̃, áni wero. 69 Zaa tera Bisãsiri Nɛ́ nigↄ̃ vutɛna Luda Gbãnade ↄplai. 70 Akũ gbɛ̃ sĩnda pínki pì: Ase Luda Nɛ́mɛ n ũ yá? Akũ à wèḿma à pì: Lákũ a ò nà, makũmɛ a ũ. 71 Akũ ò pì: Ó bàka ũgba kũ sèedadeo dↄↄ? O mà a lɛ́n kↄ̀.