Luda yã takada kũ Bisã yão LAASUNDE 6

1 Ma nɛ̀sɛyakana yã è andunia gũn dↄ kũ à tↄ̃̀ bisãsirinↄa. 2 Luda gbɛ̃ gbà ↄgↄda kũ aruzɛkɛo kũ bɛ̀ɛrɛɛo, a pↄ́ kũ à de àgↄ̃ a ni dɛ pínki vĩ, akũ Luda dí a gba zɛ́ à anfãni kɛ̀oro, gbɛ̃ pãnde mɛ́ à gↄ̃̀ vĩ. Abirekũ pãmɛ, nɛ̀sɛyakayã pãsĩmɛ dↄ.

3 Tó gbɛ̃ nɛ́ ì mɛ̀n basↄↄro, akũ à zĩ kũ̀ yúkuyuku, bee kũ a gìkɛnakɛo, tó adi pↄnna kɛoro, tó à gà, tó a gɛ̀vĩ kpetanaro, ma pì nɛ́ kũ ò ì gɛ̀ ũ sã̀na deala. 4 Zaakũ nɛ́ pìi sù pãmɛ, akũ à tà gusiran, a tↄ́ gↄ̃̀ tatana. 5 Bee kũ adi ifãntɛ̃ ero akũsↄ̃ à yãke dↄ̃ro, à nna mà de aruzɛkɛde pìla. 6 À de gbɛ̃ kũ à kun wɛ̃̀ wàa kuri pↄnnakɛsarila. Gu dokↄ̃nↄn òdi gɛ́n ń pínkinloo?

7 Bisãsiri ísimma kũ à wàra,

de à pↄ́ le à da lɛ́n yãimɛ,

ama a gbɛrɛ dì kãro.

8 Bↄ́n ↄ̃ndↄ̃ri deo yↄ̃nkↄlaa?

Bↄ́ àreen yãkɛna a zɛ́aa dì i takasidenɛɛ?

9 Pↄnnakɛna kũ pↄ́ kũ ń vĩo

mana de a pãnde nidɛnala.

Abirekũ pãmɛ dↄ, pɛna gukoriamɛ.

10 Pↄ́ kũ à kɛ̀ yã tↄ́ vĩ kↄ̀,

pↄ́ kũ bisãsiri de a ũ sↄ̃, ò dↄ̃ kↄ̀.

Bisãsiri ni fↄ̃ à lɛ́kpakↄ̃a kɛ

kũ gbɛ̃ kũ a gbãna dealaoro.

11 Yãbↄtɛna dasi dì yã yaka.

Bↄ́ àreen abire vĩ gbɛ̃nɛɛ?

12 Dí mɛ́ à dↄ̃ pↄ́ kũ à mana kũ bisãsirio a wɛ̃̀ndi kori zaka kũ àdi gɛ̃tɛ lán uraa bà gũnn? Dí mɛ́ ani fↄ̃ à yã kũ ani kɛ a kpɛ andunia gũn onɛɛ?