Luda yã takada kũ Bisã yão LAASUNDE 5

Lɛ́kɛna Ludaa laasunlɛnaa sari

1 Tó n gɛ Luda ↄnn, ǹgↄ̃ kú kũ laakariio. Ǹ nai ǹ a yã ma mana de yↄ̃nkↄnↄ sa'ona gwela, zaakũ ń yãdↄ̃nasari mɛ́ àdi tó ò yã vãni kɛ. 2 N lɛ́ súngↄ̃ wãnaro, ǹsun wã ǹ yã o Ludanɛro. Lákũ à kú musu ń kú zĩtɛ nà, ǹsun yã o dasiro. 3 Lákũ yãbↄkↄtɛ dasi dì su kũ nana'onaao nà, lɛn yã dasi bↄtɛnaa dì su kũ yↄ̃nkↄyão lɛ. 4 Tó n lɛ́ kɛ̀ Ludaa, ǹsun a fĩnabona gↄrↄ gágaro. Ǹ a fĩna bo, zaakũ yↄ̃nkↄnↄ yã dì kánɛro. 5 Lɛ́kɛna Ludaa sari mana de n lɛ́ kɛ̀a papanaa sarila. 6 Ǹsun tó n lɛ́ n da yãnlo. Ǹsun o sa'oriinɛ n pì n sã lɛ́kɛna yãnlo. Ń ye Luda pↄ fɛ̃nyĩ n yã pì yãi à zĩ kũ ntɛn kɛ kakatɛn yá? 7 Nana dasi ona kũ yã dasi bↄtɛnaao dì su kũ yã pãomɛ. Abire yãi ǹgↄ̃ Luda vĩna vĩ.

Aruzɛkɛ pãmɛ

8 Tó n è òtɛn gbãna mↄ takasidenↄnɛ gukea, òtɛn gíńnɛ kũ yãzɛdeo òtɛn yã gↄ̃gↄ̃ńnɛ a zɛ́aro, ǹsun tó yã pì bo n sarɛro, zaakũ bùsuu pì gbãnadenↄ tɛn wɛ́ dↄkↄ̃i, akũ ń gbɛ̃ zↄ̃kↄ̃nↄ tɛn wɛ́ dↄńyĩ dↄ. 9 Ń pínki dì bùsuu pì baka blemɛ, zaakũ kína mɛ́ à buranↄ vĩ.

10 Gbɛ̃ kũ à ye ↄgↄↄi dì kĩaa,

gbɛ̃ kũ à ye aruzɛkɛii àree dì mↄ́aro.

Abirekũ pãmɛ dↄ.

11 Tó aruzɛkɛ tɛn kara,

a blèrinↄ dìgↄ̃ karamɛ.

Bↄ́ àreen à vĩ a dikiriinɛɛ?

À wɛ́ pitia baasiro.

12 Zĩgbãnakɛrii dì i nna o

à pↄ́ blè fítin yá ke dasin yá.

Aruzɛkɛde sↄ̃ a pↄ́ dasi dì tó à i oro.

13 Ma nɛ̀sɛyakana yã pãsĩ è andunia gũn,

gbɛ̃ke zɛ́ tàta a ↄgↄdalɛ

à a zĩda karii bò,

14 akũ à bↄkↄtɛ vãni kɛ̀o,

a aruzɛkɛ làka pínki.

Kũ à nɛ́gↄ̃gbɛ̃ ì, à pↄ́ke vĩ kũ à tónɛro.

15 Bisãsiri dì bo a da gbɛrɛn pótompomɛ.

Lákũ à sù nà lɛn àdi ɛra à tá lɛ dↄ,

àdi a zĩ àre ke le à sɛ́ à na a ↄĩ à táoro.

16 Abirekũ bi nɛ̀sɛyakayã pãsĩmɛ dↄ.

Lákũ gbɛ̃ sù nà lɛn àdi ɛra à tá lɛ dↄ.

À ísimma wàra à pɛ̀ gukoria pã,

bↄ́ mɛ́ à gↄ̃̀nɛɛ?

17 Abire gbɛra à a gↄrↄ dɛ̀ gusiran

kũ nɛ̀sɛyakana zↄ̃kↄ̃ↄo

kũ gyão kũ pↄfɛ̃o.

18 Akũ ma è à mana kũ bisãsirio à pↄ́ ble à í mi à zĩ kũ à kɛ̀ kũ wario andunia gũn sáabu kpá a wɛ̃̀ndi zaka kũ Luda a gbà lɛ́n, zaakũ a bakaan gwe. 19 Abire gbɛra tó Luda gbɛ̃ gbà ↄgↄda kũ aruzɛkɛo, akũ à a gbà zɛ́ à anfãni kɛo, à zɛ kũ a bakaao à a zĩ sáabu kpá. Luda mɛ́ à a gbà. 20 Àdigↄ̃ laasun lɛ́ a wɛ̃̀ndi zakaaa dasi doro, zaakũ Luda mɛ́ à yã màa kũ pↄnnao.