ལེའུ་བཞི་པ།
ནམ་མཁའི་ཞིང་ཁམས་ཀྱི་བཞུགས་ཁྲི།
1 དོན་དེ་དག་བྱུང་བའི་རྗེས་སུ་བདག་གིས་ཕར་བལྟས་པ་ན། ལྟོས་དང་། ནམ་མཁའི་ཞིང་ཁམས་སུ་སྒོ་ཞིག་ཕྱེས་འདུག་པ་མཐོང་ངོ་།། བདག་གིས་ཐེངས་དང་པོར་དུང་སྐད་ལྟ་བུའི་སྒྲ་ཞིག་ཐོས་ཤིང་བདག་ལ་འདི་སྐད་དུ། ཁྱོད་རང་ཡར་ཤོག་དང་། བདག་གིས་དོན་དེ་དག་གི་རྗེས་སུ་འབྱུང་བར་འགྱུར་བའི་དོན་རྣམས་ཁྱོད་ལ་སྟོན་པར་བྱའོ་ཞེས་གསུངས།
2 དེ་མ་ཐག་ཏུ། ང་རང་དམ་པའི་ཐུགས་ཉིད་ཀྱི་ནང་དུ་དྲངས་ཤིང་། ལྟོས་དང་། ནམ་མཁའི་ཞིང་ཁམས་སུ་བཞུགས་ཁྲི་ཞིག་འདུག་ལ། བཞུགས་ཁྲི་དེའི་སྟེང་དུ་གང་ཞིག་བཞུགས་ཡོད་པ་མཐོང་ངོ་༎
3 བཞུགས་འདུག་པ་དེ་ཉིད་ཕར་བལྟས་ན་གཡང་ཊི་སྔོན་པོ་དང་པད་མ་རཱ་ག་དམར་པོ་དང་མཚུངས་ཤིང་། བཞུགས་ཁྲིའི་མཐའ་འཁོར་དུ་འཇའ་ཚོན་ཡང་ཤར་ཡོད་ལ། དེ་ནི་མ་རྒད་ལྗང་ཁུའི་མདངས་དང་མཚུངས།
4 བཞུགས་ཁྲིའི་མཐའ་འཁོར་དུ་ཁྲི་གཞན་ཉེར་བཞི་ཡོད་ལ། ཁྲི་དེ་དག་གི་སྟེང་དུ་རྒན་པོ་ཉེར་བཞི་བཞུགས་ཡོད་པ་མཐོང་ཞིང་། གོས་དཀར་པོ་མནབས་པ་དང་དབུ་ལ་གསེར་གྱི་ཅོད་པན་གསོལ་ཡོད།
5 བཞུགས་ཁྲི་དེ་ལས་གློག་དམར་འཁྱུག་ཅིང་ལྡིར་སྒྲ་སྒྲོག་པ་དང་འབྲུག་སྒྲ་གྲགས། ཡང་བཞུགས་ཁྲིའི་མདུན་དུ་དཔལ་འབར་བདུན་སྦར་ཡོད་ལ། དེ་དག་ནི་དཀོན་མཆོག་གི་ཐུགས་ཉིད་བདུན་ཡིན་ནོ།།
6 བཞུགས་ཁྲིའི་མདུན་དུ་ཤེལ་གྱི་རྒྱ་མཚོ་ལྟ་བུ་ཞིག་ཡོད་ལ། དེ་ནི་ཆུ་ཤེལ་དང་མཚུངས། བཞུགས་ཁྲིའི་དཀྱིལ་དབུས་དང་བཞུགས་ཁྲིའི་མཐའ་འཁོར་དུ་སེམས་ཅན་བཞི་ཡོད་ལ། དེ་དག་ནི་ལུས་པོའི་མདུན་རྒྱབ་ཡོངས་ལ་མིག་གིས་གང་འདུག་གོ།
7 སེམས་ཅན་དང་པོ་ནི་སེང་གེ་དང་མཚུངས། སེམས་ཅན་གཉིས་པ་ནི་བ་ཕྲུག་དང་མཚུངས། སེམས་ཅན་གསུམ་པའི་ཞལ་རས་ནི་མིའི་ངོ་གདོང་དང་མཚུངས། སེམས་ཅན་བཞི་པ་ནི་ནམ་འཕང་སྐྱོད་པའི་གླག་དང་མཚུངས།
8 སེམས་ཅན་བཞི་པོ་རེ་རེ་ལ་གཤོག་པ་དྲུག་རེ་ཡོད་པ་དང་། ལུས་པོའི་ཕྱི་ནང་ཀུན་ལ་མིག་གིས་གང་ཞིང་། དེ་དག་གིས་ཉིན་མཚན་མེད་པར་འདི་སྐད་དུ།
དམ་པ་དམ་པ་དམ་པ་སྟེ།།
གཙོ་བོ་ཀུན་དབང་དཀོན་མཆོག་ནི།།
ད་ལྟ་བཞུགས་ཤིང་སྔར་མཆིས་པ།།
ཕེབས་པར་ངེས་པ་ཉིད་ལགས་སོ།།
ཞེས་གསུངས་སོ།།
9 དེ་ནས་ཡང་སེམས་ཅན་བཞི་པོས་བཞུགས་ཁྲི་སྟེང་དུ་བཞུགས་ཤིང་ཇི་སྲིད་བར་དུ་གསོན་པོར་བཞུགས་པ་དེ་ཉིད་ལ་བསྟོད་བསྔགས་དང་། བསྙེན་བཀུར། བཀའ་དྲིན་བཅས་འབུལ་བའི་སྐབས་སུ།
10 རྒན་པོ་ཉེར་བཞིས་བཞུགས་ཁྲིའི་སྟེང་དུ་བཞུགས་པ་དེ་ཉིད་ཀྱི་དྲུང་དུ་ཕྱག་འཚལ་ཞིང་། ཇི་སྲིད་བར་དུ་གསོན་པོར་བཞུགས་པ་དེ་ཉིད་ལ་བསྟོད་བསྔགས་བརྗོད་པ་དང་། ཡང་ཁོང་རྣམས་ཀྱིས་རང་གི་ཅོད་པན་བཞུགས་ཁྲིའི་མདུན་དུ་བཞག་སྟེ་འདི་སྐད་དུ།
11 ཀྱེ་ཀྱེ་ང་ཚོའི་གཙོ་བོ་དང་༎
ང་ཚོའི་དཀོན་མཆོག་ཁྱེད་རང་ལགས།།
བསྟོད་བསྔགས་དང་ནི་བསྙེན་བཀུར་དང་།།
དབང་ཐང་ཁྱེད་ལ་འོས་ཤིང་འབྱོར།།
ཅིའི་ཕྱིར་ཞེ་ན་འདི་ལྟ་སྟེ།།
ཁྱེད་ཀྱིས་ཐམས་ཅད་བསྐྲུན་པ་ནི།།
ཐུགས་དགོངས་བཞིན་དུ་གྲུབ་ཅིང་གནས།།
ཞེས་གསུངས་སོ།།