གསུང་མགུར་ང་བརྒྱད༌པ།
དཀོན་མཆོག་གིས་ངན་པར་ཉེས་ཆད་གཅོད་པར་ཞུ་བ།
1 ༼དཱ་བིད་ཀྱིས་འཕུང་མ་འཇུག་ཅེས་པའི་དབྱངས་ནང་མགུར་འདི་བརྩམས་ནས་དབུ་མཛད་ལ་སྤྲད༌པ་སྟེ། དཱ་བིད་ཀྱི་མེག་ཏཱམ་ཞིག༽ ཀྱེ་ཀྱེ་ཁྱོད་ཅག་དབང་སྒྱུར་རྣམས་ཀྱིས༌ནི། །དངོས་གནས་དྲང་བདེན་གླེང་བ་ཡིན་ནམ༌ཅི། །དྲང་གཞག་སྒོ་ནས་མི་ལ་ཁྲིམས་གཅོད༌དམ།།
2 དེ་བཞིན་མ་ཡིན་སེམས་སུ་ངན་རྩོམ༌ཞིང༌། །ལག་པས་ས་སྟེང་གདུག་རྩུབ་སྤྱོད་པ༌འོ།།
3 མི་ངན་མངལ་ལས་ཐོན་དུས་ལོག་ལམ༌ཞུགས། །སྐྱེས་མ་ཐག་ནས་ལམ་འཛོལ་རྫུན་ཡང༌སྨྲ།།
4 དེ་ཚོའི་རླངས་པ་སྦྲུལ་གྱི་དུག་རླངས༌འདྲ། །རྣ་བ་བཀག་པའི་དུག་སྦྲུལ་ དང་མཚུངས༌པར།།
5 སྔགས་རྒྱག་སྔགས་པའི་སྒྲ་སྐད་མི་ཐོས༌ཤིང༌། །ངན་སྔགས་ཆེན་མོ་ཡིན་ཡང་གོ་མི༌ཆོད།།
6 དཀོན་མཆོག་དེ་ཚོའི་ཁ་ཡི་སོ་རྣམས༌ཆོགས། །ཡ་ཝཱེས་སེང་དར་མཆེ་བ་གཅོག་པར༌མཛོད།།
7 དེ་རྣམས་བཞུར་ཆུ་བཞིན་དུ་མེད་པར༌མཛོད། །གཞུ་མོ་འཐེན་དུས་མདའ་རྩེ་ཆག་གྱུར༌ཅིག །
8 སྐྱོགས་འབུ་བཞིན་དུ་ནུར་ནས་བཞུ་བར༌ཤོག །ཉི་མ་མ་མཐོང་མངལ་ཤོར་ཕྲུ་གུར༌མཛོད།།
9 ཁྱོད་ཚོའི་སླ་ང་ཚེར་མས་མ་ངར༌གོང༌། །མེ་ཡིས་འཚིག་དང་མ་འཚིག་ཁྱད་མེད༌པར། །འཁྱིལ་རླུང་ཞིག་ལ་འཁུར་བར་མཛད་འགྱུར༌རོ།།
10 དགྲ་བོ་རྣམས་ལ་འཁོན་ལན་སློག་པ༌དེ། །དྲང་པོ་རྣམས་ཀྱིས་མཐོང་དུས་དགའ་བར༌འགྱུར། །སྡིག་སྤྱོད་ཁྲག་ནང་དེ་ཡིས་རྐང་པ༌བཀྲུ།།
11 དེ་ནས་མི་ཚོས་འདི་ལྟར་སྨྲ་ངེས༌ཏེ། །དྲང་བདེན་མི་ལ་དངོས་གནས་རྔན་པ༌ཐོབ། །ས་གཞི་ཡོངས་ལ་ཁྲིམས་ཐག་གཅོད་པ༌ཡི། །དཀོན་མཆོག་ཅིག་ནི་དངོས་གནས་བཞུགས༌པ་འོ།།