གསུང་མགུར་བརྒྱ་དང་སོ་ལྔ༌པ།
བསྟོད་བསྔགས་བརྗོད་པའི་མགུར་མཆོག
1 ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌། །ཡ་ཝཱེའི་མཚན་ལ་བསྟོད་པར་གྱིས་ཤིག༌ཨང༌། །ཡ་ཝཱེའི་ཞབས་ཕྱི་རྣམས་ཀྱིས་ཁོང་ལ༌བསྟོད།།
2 ཡ་ཝཱེའི་བཞུགས་གནས་ནང་དུ་འགྲེང་བ༌དང༌། །རང་རེའི་དཀོན་མཆོག་བཞུགས་གནས་ཁྱམས་ར༌རུ། །ཞབས་ཏོག་སྒྲུབ་པ་ཁྱོད་ཚོས་ཁོང་ལ༌བསྟོད།།
3 ཡ་ཝཱེ་ལེགས་པོ་ཡིན་པས་ཁོང་ལ༌བསྟོད། །ཁོང་གི་མཚན་ལ་བསྟོད་དབྱངས་འབུལ་བར༌གྱིས། །ཅི་ལ་ཞེ་ན་དེ་ནི་ཡིད་དུ༌འོང༌།།
4 ཡ་ཝཱེས་ཡ་ཀོབ་ཁོང་གི་ཕྱིར་དུ༌བདམས། །ཡེས་ར་ཨེལ་ནི་ནོར་སྐལ་དུ་བདམས༌སོ།།
5 ཡ་ཝཱེ་ཆེན་པོ་ལགས་པ་ངས་ཤེས༌ཏེ། །རང་ཅག་གཙོ་བོ་ལྷ་ཚོགས་ཀུན་ལས༌འཕགས།།
6 གནམ་དང་ས་དང་རྒྱ་མཚོའི་གཏིང་རིམ༌ནས། །ཡ་ཝཱེས་ཅི་ལ་དགྱེས་པ་དེ་བཞིན༌མཛད།།
7 ཁོང་གིས་ས་མཐའ་རྣམས་ནས་སྤྲིན་པ༌སློང༌། །ཆར་ཆུ་མཉམ་དུ་གློག་དམར་འཁྱུག་པར༌མཛད། །ཁོང་གི་མཛོད་ནས་ལྷགས་རླུང་འདོན་པར༌བྱ།།
8 ཨེ་ཅིབ་ཡུལ་གྱི་མི་ཕྱུགས་གང་ཡིན༌ཡང༌། །སྐྱེས་འགོ་ཐམས་ཅད་ཁོང་གིས་བསད་པ༌ལགས།།
9 ཀྱེ་ཀྱེ་ཨེ་ཅིབ་ཁྱོད་ཀྱི་དཀྱིལ་དབུས༌སུ། །ཕཱར་ཨོལ་དང་ནི་འཁོར་གཡོག་རྣམས་ཀྱི༌སྟེང༌། །ཁོང་གིས་གྲུབ་རྟགས་ངོ་མཚར་དོན་རྣམས་མཛད།།
10 ཁོང་གིས་མི་རིགས་མང་པོར་བརྡེགས་པ༌དང༌། །རྒྱལ་པོ་དཔའ་ངར་ཅན་རྣམས་སྲོག་དང༌ཕྲལ།།
11 ཨེ་མོར་པ་ཡི་རྒྱལ་པོ་སི་ཧོན༌དང༌། །པཱ་ཤན་ཡུལ་གྱི་རྒྱལ་པོ་ཨོག་དང༌ནི། །ཀ་ན་ཨན་གྱི་རྒྱལ་པོ་ཐམས་ཅད༌དོ།།
12 ཁོང་གིས་དེ་ཚོའི་ཡུལ་རྣམས་རང་ཉིད༌ཀྱི། །འབངས་མི་ཡེས་ར་ཨེལ་ལ་ས་སྐལ༌གནང༌།།
13 ཀྱེ་ཀྱེ་ཡ་ཝཱེ་ཁྱེད་མཚན་གཏན་དུ༌གནས། །ཡ་ཝཱེའི་དྲན་རྟེན་མི་རབས་ཀུན་ལ༌གནས།།
14 ཅི་ལ་ཞེ་ན་ཡ་ཝཱེས་རང་ཉིད༌ཀྱི། །འབངས་མི་ལ་ནི་དག་འབུད་མཛད་པ༌དང༌། །ཉིད་ཀྱི་ཞབས་ཕྱིར་སྙིང་རྗེ་གནང་ཕྱིར༌རོ།།
15 མི་རིགས་རྣམས་ཀྱི་ལྷ་སྐུ་གསེར་དངུལ༌ཡིན། །དེ་ནི་མི་ཡི་ལག་པས་བཟོས་པ༌དང༌།།
16 སྨྲ་སྒོ་ཡོད་ཀྱང་དེ་དག་གཏམ་མི་ལབ། །མིག་ནི་ཡོད་ཀྱང་དེ་རྣམས་མཐོང་བ་མིན།།
17 རྣ་བ་ཡོད་ཀྱང་དེ་རྣམས་ཐོས་མི་ཐུབ། །དེ་དག་ཁ་རུ་དབུགས་ཀྱང་ཡོད་མ༌ཡིན།།
18 ལྷ་སྐུ་བཟོ་མཁན་ལྷ་སྐུ་དང་མཚུངས༌ཤིང༌། །དེ་ལ་བརྟེན་པ་རྣམས་ཀྱང་དེ་བཞིན༌ནོ།།
19 ཡེས་ར་ཨེལ་ཁྱོད་ཡ་ཝཱེར་བསྟོད་པར༌གྱིས། །ཨ་རོན་ཁྱིམ་རྒྱུད་ཡ་ཝཱེར་བསྟོད་པར༌གྱིས།།
20 ལེ་ཝི་ཁྱིམ་རྒྱུད་ཡ་ཝཱེར་བསྟོད་པ༌ཕུལ། །ཀྱེ་ཀྱེ་ཡ་ཝཱེར་གུས་ཤིང་འཇིགས་པ༌རྣམས། །ཁྱོད་ཚོས་ཡ་ཝཱེར་བསྟོད་པ་འབུལ་བར༌གྱིས།།
21 ཡེ་རུ་སཱ་ལེམ་ནང་དུ་བཞུགས་པ༌ཡི། །ཡ་ཝཱེར་ཛ་ཡན་ཡུལ་ནས་བསྟོད་པར༌གྱིས། །ཁྱོད་ཚོས་ཡ་ཝཱེར་བསྟོད་པར་གྱིས་ཤིག༌ཨང༌།།