པེ་ཏྲོས་རང་གི་འཕྲིན་ཡིག་དང་པོ་ལས་གསུངས་པ་བཞིན་དུ་འཕྲིན་ཡིག་འདི་ཐོབ་མཁན་ནི་ཁ་ཐོར་དུ་ཕྱིན་པའི་ཡེ་ཤུའི་ཆོས་ལུགས་པ་རྣམས་ཡིན་ལ། སྐབས་དེར་དགེ་རྒན་རྫུས་མའི་རིགས་ཀྱིས་ཁོ་རྣམས་མགོ་འཐོམ་དུ་འཇུག་པའི་ཉེན་ཁ་ཡོད་པ་རེད།

འཕྲིན་ཡིག་འདི་ཡི་གེར་འགོད་མཁན་གྱིས་རང་ཉིད་ནི་སི་མོན་པེ་ཏྲོ་ཡིན་པ་གསལ་བཤད་བྱས་ཡོད་པར་མ་ཟད། ཁོང་གིས་ལེའུ་གསུམ་པའི་ཚིག་རྐང་དང་པོ་ནང་དུ་འདི་ནི་ཀློག་པ་པོ་རྣམས་ལ་ཕུལ་བའི་འཕྲིན་ཡིག་གཉིས་པ་ཡིན་ཞེས་བདེན་དཔང་ཡང་མཛད་ཡོད་ལ། ལེའུ་གསུམ་པའི་ཚིག་རྐང་བཅོ་ལྔ་པར་ཕོལ་ལོལ་ནི་བདག་ཅག་གི་སྙིང་ནས་བརྩེ་བའི་སྤུན་ཟླ་ཡིན་ཞེས་ཀྱང་བརྗོད་ཡོད། དེ་ཡང་འཕྲིན་ཡིག་འདིའི་ཁྱད་ཆོས་ལས་ཀྱང་འཕྲིན་ཡིག་འདི་ཡི་གེར་འགོད་མཁན་པེ་ཏྲོ་ཡིན་པ་ཤེས་ཐུབ་ལ། འཕྲིན་ཡིག་འདི་ནི་སྤྱི་ལོ་66ལོའི་ཡས་མས་སུ་ཡི་གེར་བཀོད་པ་ཡིན།

པེ་ཏྲོ་ནི་སྐྱབས་མགོན་ཡེ་ཤུ་མཱ་ཤི་ཀའི་ལུག་རྣམས་ཀྱི་རྫི་བོ་ལྟ་བུ་ཡིན་ལ། ཁོང་གིས་ཆོས་ཚོགས་ལ་འོངས་པའི་དགེ་རྒན་རྫུས་མ་དང་ངན་པ་སྤྱོད་མཁན་རྣམས་ལ་སེམས་ཁྲལ་ཆེན་པོ་བྱས་ཤིང་། ཆོས་ཚོགས་ལ་དགེ་རྒན་རྫུས་མ་རྣམས་ཀྱི་གནད་དོན་ཇི་ལྟར་ཐག་གིས་གཅོད་དགོས་པར་ཁྲིད་སྟོན་གནང་བར་མ་ཟད། ཀློག་པ་པོ་རྣམས་ལ་ཡེ་ཤུའི་ཆོས་ལུགས་པས་ཡང་དག་པའི་དད་པ་དང་སྤྱོད་ལམ་བཟང་པོ་བྱེད་པར་སྐུལ་མ་བཏང་ཞིང་། ཡང་གཙོ་བོ་ཡེ་ཤུ་དངོས་སུ་ཕྱིར་ཕེབས་པར་འགྱུར་བས་དད་ལྡན་རྣམས་ཀྱིས་དེ་ལ་གཟབ་གཟབ་བྱེད་དགོས་པ་བཅས་བརྗོད་ཡོད།

1. ངོ་སྤྲོད། ༼1:1-2༽

2. ཡེ་ཤུའི་ཆོས་ལུགས་པའི་སྤྱོད་བཟང་ཇེ་ལེགས་སུ་གཏོང་བའི་སྐོར། ༼1:3-11༽

3. པེ་ཏྲོའི་འཕྲིན་བཟང་གི་སྐོར། ༼1:12-21༽

4. དགེ་རྒན་རྫུས་མ་རྣམས་ལ་ཉེན་བརྡ་གཏོང་བ། ༼2:1-22༽

5. སྐྱབས་མགོན་ཡེ་ཤུ་ཕྱིར་ཕེབས་པའི་སྐོར། ༼3:1-16༽

6. མཇུག་སྡོམ། ༼3:17-18༽