ལེའུ་ལྔ༌པ།
སྐྱབས་མགོན་མཱ་ཤི་ཀའི་ནང་གི་རང་དབང༌སྐོར།
1 དེ་ཡང་སྐྱབས་མགོན་མཱ་ཤི་ཀས་བདག་ཅག་རང་དབང་ནང་དུ་གནས་པའི༌ཕྱིར་གྲོལ་བར་མཛད༌པས། ཁྱོད་རྣམས་བརྟན་པོར་ལངས་ནས་སྡོད་པ་ལས་སླར་ཡང་བྲན་གཡོག་གི་གཉའ་ཤིང་འོག་ཏུ་འཛུལ་མི་འོས་སོ།།
2 ལྟོས་དང་། ཕོལ་ལོལ་ངས་ཁྱོད་རྣམས་ལ་འདི་ལྟར་སྨྲ་བར་བྱ༌སྟེ། ཁྱོད་རྣམས་ཀྱིས་མཚན་སྐྱི་གཅོད་པའི་ལུགས་སྲོལ་བཞིན་དུ་བྱས༌ན། སྐྱབས་མགོན་མཱ་ཤི་ཀ་ནི་ཁྱོད་ཅག་ལ་ཕན་ཐོགས་ཅི་ཡང་མེད།
3 ཡང་ངས་མཚན་སྐྱི་གཅོད་པའི་ལས་ལ་ཞུགས་མཁན་ཐམས་ཅད་ལ་བདེན་པར་སྨྲ༌སྟེ། ཁྱོད་རྣམས་ཀྱིས་བཀའ་ཁྲིམས་ཐམས་ཅད་སྲུང་བའི་འགན་འཁུར་དགོས།
4 བཀའ་ཁྲིམས་ལ་བརྟེན་ནས་མི་རྣམ་དག་ཏུ་བརྩི་བར་འདོད་པ་མཐའ་དག་ནི་སྐྱབས་མགོན་མཱ་ཤི་ཀ་དང་ཁ་གྱེས༌ཤིང༌། ཐུགས་རྗེ་ལའང་རིང་དུ་བྲལ་ཏོ།།
5 འོན་ཀྱང་། བདག་ཅག་གིས་དམ་པའི་ཐུགས་ཉིད་བརྒྱུད་ཅིང་དད་པ་ལ་བརྟེན་ནས་མི་རྣམ་དག་ཏུ་འགྱུར་བར་རེ་སྒུག་བྱེད༌པ་ཡིན།
6 རྒྱུ་མཚན་ནི་མཱ་ཤི་ཀ་ཡེ་ཤུའི་ནང་དུ། མཚན་སྐྱི་གཅོད་མིན་ལ་སྙིང་པོ་ཅི་ཡང་མེད༌དེ། བྱམས་བརྩེའི་སྒོ་ནས་མཚོན་དགོས་པའི་དད་པ་ཁོ་ནར་དོན་སྙིང་ཆེན་པོ་ལྡན་པའི་ཕྱིར༌རོ།།
7 སྤྱིར་ཁྱོད་རྣམས་རྒྱུགས་པ་མགྱོགས་ནའང་སུ་ཞིག་གིས་ཁྱོད་རྣམས་བདེན་པ་ཉིད་ལ་བསྟུན་པར་བཀག་རྒྱ་བཟོས༌སམ།
8 སྐུལ་སློང་དེ་ནི་ཁྱོད་རྣམས་ལ་ཞལ་འབོད་གནང་མཁན་དེ་ཉིད་ནས་བྱུང་བ་མིན༌ནོ།།
9 སྐྱུར་རྩི་ཉུང་ཙམ་གྱིས་བག་ཕྱེ་ཚང་མ་སྐྱུར་ལང་དུ་འཇུག་པ་ཡིན།
10 བདག་གིས་གཙོ་བོ་ལ་བརྟེན་ནས་ཁྱོད་རྣམས་ལ་ཡིད་རྟོན་བྱེད༌དེ། ཁྱོད་རྣམས་ཀྱིས་བསམ་ཚུལ་གཞན་མི་བཅང་མོད། འོན་ཀྱང་ཁྱོད་རྣམས་ལ་གནོད་འཚེ་བྱེད་མཁན་སུ་ཞིག་ཡིན་ཡང་དེ་ལ་ཉེས་ཆད་གཅོད་ངེས་ཡིན།
11 སྤུན་ཟླ༌རྣམས། ངས་ད་ལྟའང་མཚན་སྐྱི་གཅོད་འོས་པའི་བཀའ་བསྒྲགས༌ན། ཅིའི་ཕྱིར་ད་དུང་བདག་ལ་མནར་གཅོད་བྱེད༌དམ། གལ༌སྲིད་དེ་ལྟར་ཡིན༌ན། ཤིང་རྒྱ་གྲམ་གྱིས་མི་སར་འགྱེལ་དུ་འཇུག་པའི་དོན་ནི་མེད་དོ།།
12 དེའི༌ཕྱིར། ཁྱོད་རྣམས་ལ་གནོད་འཚེ་བྱེད་མཁན་དེ་དག་ནི་རང་གིས་རང་ཉིད་ཉུག་རུམ་པར་བཟོས་ན་ཅི་མ་རུང༌།
13 སྤུན་ཟླ༌རྣམས། ད་ལྟ་ཁྱོད་རྣམས་རང་དབང་ལྡན་པར་ཞལ་འབོད་གནང༌བ་ཡིན། འོན༌ཀྱང༌། རང་དབང་དེ་ནི་ཤ་གཟུགས་ཀྱི་འདོད་ཆགས་ལ་གཡེང་བའི་གོ་སྐབས་ཤིག་ཏུ་མི་འཛིན༌པར། དུས་རྒྱུན་བྱམས་བརྩེ་ལ་བརྟེན་ནས་ཕན་ཚུན་ལ་ཞབས་ཕྱི་བྱ་འོས་སོ།།
14 རྒྱུ་མཚན་ནི་བཀའ་ཁྲིམས་ཐམས་ཅད་ཀྱི་ནང་དོན་གཅིག་ཏུ་བསྡུས་ན་འདི་ལྟ༌སྟེ། ཁྱོད་ཀྱིས་ཁྱིམ་མཚེས་ལ་རང་དང་འདྲ་བར་གཅེས་ཤིག་ཅེས་གསུངས་པ་འདི་ཡིན་པའི་ཕྱིར༌རོ།།
15 འོན༌ཀྱང༌། ཁྱོད་ཅག་གིས་མཉམ་འཇོག་དགོས་པ་ཞིག༌ནི། ཁྱོད་རྣམས་ཀྱིས་ཕན་ཚུན་ལ་སོ་བཏབ་ནས་གསོད་རེས་བྱས༌ན། མཐའ་མར་ཐམས་ཅད་བརླག་པར་འགྱུར་བ༌དེའོ།།
དམ་པའི་ཐུགས་ཉིད་ལ་བསྟུན་པ།
16 ཡང་བདག་གིས་འདི་ལྟར་སྨྲ་བར་བྱ༌སྟེ། ཁྱོད་རྣམས་ཀྱིས་དམ་པའི་ཐུགས་ཉིད་ལ་བསྟུན་ནས་སྤྱད་པ་སྤྱོད༌ན། ཤ་གཟུགས་ཀྱི་འདོད་ཆགས་ཀྱི་དབང་དུ་མི་འགྲོའོ།།
17 ཅིའི་ཕྱིར་ཞེ་ན། ཤ་གཟུགས་ཀྱི་འདོད་ཆགས་ཀྱིས་དམ་པའི་ཐུགས་ཉིད་ལ་འགྲན་རྩོད་བྱེད་པ༌དང༌། དམ་པའི་ཐུགས་ཉིད་ཀྱིས་ཀྱང་དེ་ལ་འགྲན་རྩོད་བྱེད༌པ་ཡིན། དེ་གཉིས་ནི་འགལ་བ་ལྟག་སྤྲོད་ཡིན་པས་ཁྱོད་ཅག་གིས་རང་གི་འདོད་བློ་ལྟར་བསྒྲུབ་མི་ནུས་པའི་ཕྱིར༌རོ།།
18 འོན༌ཀྱང༌། དམ་པའི་ཐུགས་ཉིད་ཀྱིས་ཁྱོད་རྣམས་འཁྲིད་པར་མཛད༌ན། ཁྱོད་ཅག་ནི་བཀའ་ཁྲིམས་ཀྱི་དབང་འོག་ཏུ་མེད་དོ།།
19 ཤ་གཟུགས་ཀྱི་འདོད་ཆགས་ཀྱི་ལས་རྣམས་ནི་མངོན་གསལ་ཡིན༌ཏེ། ལོག་གཡེམ༌དང༌། མི་ཚངས༌སྤྱོད། འཆལ་སྤྱོད།
20 ལྷ་སྐུར་བརྟེན༌པ། རྫུ༌འཕྲུལ། ཞེ༌འཁོན། འགྲན༌རྩོད། ཕྲག༌དོག ཞེ༌སྡང༌། སྒེར་སེམས། དབྱེན་འབྱེད། ལོག༌ལྟ།
21 འགྲན་སེམས། ར་རོར་གྱུར༌པ། གསོལ་སྟོན་ལ་བག་མེད་དུ་ཞུགས་པ་སོགས༌ཡིན། བདག་གིས་སྔོན་ཆད་ཁྱོད་རྣམས་ལ་སྨྲས་མྱོང་ཞིང་ད་ལྟའང་སྨྲ་བར་བྱ༌སྟེ། ལས་ངན་པ་འདི་ལྟ་བུ་བྱེད་པ་རྣམས་ལ་དཀོན་མཆོག་གི་རྒྱལ་སྲིད་ནམ་ཡང་མི་འཐོབ་བོ།།
22 འོན༌ཀྱང༌། དམ་པའི་ཐུགས་ཉིད་ལས་སྨིན་པའི་འབྲས་བུ་ནི་འདི་ལྟ༌སྟེ། བྱམས་པ༌དང༌། དགའ༌སྤྲོ། ཞི༌བདེ། བཟོད༌བསྲན། སྙིང༌རྗེ། གཤིས་བཟང་། ཡིད་རྟོན་རུང་བ།
23 ཞི༌འཇམ། རང་ཚོད་ཟིན་པ་བཅས་ཡིན། དོན་འདིའི་ཐད་ལ་བཀའ་ཁྲིམས་ཅི་ཡང་མེད།
24 མཱ་ཤི་ཀ་ཡེ་ཤུར་གཏོགས་པ་རྣམས་ཀྱིས་ཤ་གཟུགས་ཀྱི་ཕུང་བོ་དང་དེར་འབྲེལ་བའི་འདོད་ཆགས་དེའང་ཤིང་རྒྱ་གྲམ་གྱི་སྟེང་མཉམ་དུ་བརྡབས༌པ་ཡིན།
25 བདག་ཅག་དམ་པའི་ཐུགས་ཉིད་ལ་བརྟེན་ནས་འཚོ་ཞིང་གཞེས་པ་ཡིན༌ན། ངེས་པར་དམ་པའི་ཐུགས་ཉིད་བཞིན་སྤྱད་པ་སྤྱོད་དགོས་པ༌ལས།
26 རང་གི་མཚན་སྙན་གྲགས་ཙམ་ལ་བརྩོན་པ༌དང༌། ཕན་ཚུན་ལ་ཁོང་ཁྲོ་སློང༌བ། ཕན་ཚུན་ལ་ཕྲག་དོག་བྱེད་པ་བཅས་ནི་མི་རུང༌ངོ༌།།