ལེའུ་བཞི༌པ།
སྐྱབས་མགོན་ཡེ་ཤུའི་དད་ལྡན༌སྐོར།
1 དེ་ཡང་བདག་གིས་ཕ་ཤུལ་འཛིན་མཁན་ཞེས་བརྗོད་པ་ནི་རྒྱུ་ནོར་ཐམས་ཅད་ཀྱི་བདག་པོ་ལ་གོ་བ་ཡིན༌ཡང༌། བྱིས་པའི་དུས་སུ་གཡོག་པོ་ཞིག་དང་ཁྱད་པར་གང་ཡང་མེད་དེ།
2 རང་གི་ཕ་ཡིས་གཏན་ཁེལ་བྱས་པའི་དུས་དེ་སླེབས་པའི་བར༌དུ། དགེ་རྒན་དང་གཉེར་པའི་དབང་འོག་ཏུ་སྡོད་པ་ཡིན་ནོ།།
3 དེ་བཞིན་དུ་བདག་ཅག་ཀྱང་བྱིས་པ་ལྟ་བུའི་དུས་སུ་འཇིག་རྟེན་གྱི་ཤེས་ཡོན་ཕྲན་བུ་དག་གི་དབང་འོག་ཏུ་སྡོད༌པ་ཡིན།
4 འོན༌ཀྱང༌། དུས་ལོངས༌པའི་ཚེ། དཀོན་མཆོག་གིས་རང་ཉིད་ཀྱི་སྲས་འཇིག་རྟེན་དུ་མངགས༌ཤིང༌། བུ་མོ་ཞིག་གི་མངལ་ལས་འཁྲུངས་པ་དང་། བཀའ་ཁྲིམས་ཀྱི་ལུགས་སྲོལ་འོག་ཏུ་འཁྲུངས་པའང་ཡིན་ཏེ།
5 བཀའ་ཁྲིམས་ཀྱི་དབང་འོག་ཏུ་ཡོད་པ་རྣམས་བླུས་ནས། བདག་ཅག་ཁོང་གི་བུ་དང་བུ་མོར་མཛད་པའི༌ཕྱིར་རོ།།
6 ཁྱོད་ཅག་ནི་དཀོན་མཆོག་གི་བུ་དང་བུ་མོ་ཡིན༌པས། དཀོན་མཆོག་གིས་རང་གི་སྲས་ཀྱི་ཐུགས་ཉིད་དེ་ཁྱོད་རྣམས་ཀྱི་སེམས་སུ་མངགས༌ཤིང༌། ཨབ་བཱ་ལགས། ཡབ་ལགས་ཞེས་འབོད་པར་བསྐུལ་ལོ།།
7 དེའི༌ཕྱིར། དུས་དེ་ནས༌བཟུང༌། ཁྱོད་ཅག་ནི་གཡོག་པོ་མ་ཡིན་པར་དཀོན་མཆོག་གི་བུ་དང་བུ་མོ་ཡིན། དེ་ལྟར་ལགས༌ན། ཁྱོད་ཅག་ནི་དཀོན་མཆོག་གི་རྐྱེན་གྱིས་ཕ་ཤུལ་འཛིན་མཁན་ཡང་ཡིན༌ནོ།།
ཕོལ་ལོལ་གྱིས་དད་ལྡན་རྣམས་ལ་སེམས་ཁྲལ་བྱས༌པ།
8 སྔོན་ཆད་ཁྱོད་ཅག་གིས་དཀོན་མཆོག་ངོ་མི་ཤེས་པའི་དུས༌སུ། ངོ་བོ་ལྟར་དཀོན་མཆོག་མ་ཡིན་པ་དག་གི་གཡོག་པོ་བྱས༌པ་ཡིན་ནོ།།
9 ད་ལྟ་ཁྱོད་ཅག་གིས་དཀོན་མཆོག་ངོ་ཤེས༌ཤིང༌། དོན་དམ་དུ་དཀོན་མཆོག་གིས་ཀྱང་ཁྱོད་རྣམས་མཁྱེན༌པ་ཡིན་པས། ཁྱོད་རྣམས་སླར་ཡང་ནུས་པ་མེད་པའི་ཤེས་ཡོན་ཕྲན་བུའི་དབང་འོག་ཏུ་འཇུག་དོན༌ཅི། ཁྱོད་ཅག་གིས་སླར་ཡང་དེར་གཡོག་བྱེད་པར་འདོད་དམ།
10 ཁྱོད་རྣམས་ཀྱིས་ཚེས༌དང༌། ཟླ༌བ། དུས༌ཚིགས། ལོ་འཁོར་བཅས་གཟབ་གཟབ་ངང་ནས་བསྲུངས་པས།
11 སྔར་བདག་གིས་ཁྱོད་རྣམས་ཀྱི་ཕྱིར་བརྩོན་པའི་ལས་དེ་རྣམས་དོན་མེད་དུ་གྱུར་པ་ལ་སེམས་ཁྲལ་བྱེད་དོ།།
12 སྤུན་ཟླ༌རྣམས། དེ་སྔར་ང་རང་ཁྱོད་རྣམས་དང་འདྲ་བར་གྱུར་མྱོང་བས། ཁྱོད་ཅག་ང་དང་འདྲ་བར་གྱུར་ཅིག་ཅེས་ཞུའོ།། ཁྱོད་ཅག་གིས་བདག་ལ་འགལ་བའི་ལས་ཅི་ཡང་བྱས་མ་མྱོང༌།
13 བདག་གིས་ཐེངས་དང་པོར་ཁྱོད་རྣམས་ལ་འཕྲིན་བཟང་བསྒྲགས་པའི་དོན་དེ་ཁྱོད་ཅག་གིས་ཀྱང་ཤེས༌ཏེ། སྐབས་དེར་བདག་ལ་ན་ཚ་བྱུང་ཡོད་པས།
14 བདག་གི་ལུས་པོའི་རྐྱེན་གྱིས་ཁྱོད་ཅག་ལ་དཀའ་སྡུག་བྱུང་ནའང་ཁྱོད་རྣམས་ཀྱིས་བདག་ལ་མཐོང་ཆུང་མ་བྱས་ཤིང་ང་རང་མ་དོར༌བར། དཀོན་མཆོག་གི་ཕོ་ཉ་དང་མཱ་ཤི་ཀ་ཡེ་ཤུ་བཞིན་དུ་སྣེ་ལེན་བཟང་པོ་བྱས་སོ།།
15 དེས་ན་སྔོན་ཆད་ཁྱོད་ཅག་གི་སྤྲོ་སྣང་དེ་གང་དུ་ཡོད༌དམ། དེའི་དུས༌སུ། བསྒྲུབ་ནུས་པ་ཡིན་ན་ཁྱོད་རྣམས་ཀྱིས་རང་གི་མིག་བཏོན་ནས་བདག་ལ་སྟེར་བར་ངེས་ཤིང་། དོན་འདིར་བདག་གིས་བདེན་དཔང་བྱེད་པ་ཡིན།
16 ད་ལྟ་བདག་གིས་ཁྱོད་ཅག་ལ་བདེན་ལུགས་སྨྲས་པའི་རྐྱེན་གྱིས་བདག་ནི་ཁྱོད་རྣམས་ཀྱི་དགྲ་བོར་གྱུར་པ་ཡིན༌ནམ།
17 ད་ལྟ་ཁྱོད་ཅག་ལ་འབྲེལ་བ་འཛུགས་པར་བརྩོན་མཁན་རྣམས་ཀྱི་དམིགས་ཡུལ་མི་བཟང༌སྟེ། དེ་དག་གིས་བདག་ཅག་ཕྲལ་ནས་ཁོ་རྣམས་ལ་འབྲེལ་བ་འཛུགས་འདོད༌ཅིང་།
18 སྤྱིར་རྟག་ཏུ་དོན་བཟང་པོར་བརྩོན་པ་བྱས་ན་ལེགས། འོན༌ཀྱང༌། བདག་ཁྱོད་རྣམས་དང་ལྷན་དུ་ཡོད༌དུས་ཁོ་ནར་དེ་ལྟར་བྱ་མི་འོས་སོ།།
19 བདག་གི་བུ་ཕྲུག༌རྣམས། ཁྱོད་ཅག་གི་སེམས་ནང་དུ་སྐྱབས་མགོན་མཱ་ཤི་ཀའི་གཤིས་རྒྱུད་འཆག་པའི་བར༌དུ། ངས་ཁྱོད་ཅག་གི་ཆེད་དུ་ཕྲུ་གུ་བཙའ་བའི་ཟུག་གཟེར་ཡང་བསྐྱར་མྱོང་བ་ཡིན།
20 བདག་གི་སེམས་ནི་ཁྱོད་རྣམས་ཀྱི་ཕྱིར་ཅི་བྱ་གཏོལ་མེད་དུ་གྱུར་པས། བདག་ནི་ད་ལྟ་ཁྱོད་རྣམས་དང་མཉམ་དུ་འགྲོགས་ནས་རང་གི་སྨྲ་ཚུལ་བསྒྱུར་འདོད་དོ།།
གཡོག་མོ་ཧ་གར་དང་བདག་མོ་སཱ་རའི༌སྐོར།
21 དེ་ཡང་བཀའ་ཁྲིམས་ཀྱི་དབང་འོག་ཏུ་སྡོད་འདོད་པ་ཁྱོད་རྣམས་ཀྱིས་བདག་ལ་ཤོད༌དང༌། ཁྱོད་ཅག་གིས་བཀའ་ཁྲིམས་ཐོས་པ་མ་ཡིན་ནམ།
22 གསུང་རབ་ལས་འདི་ལྟར་བཀོད་ཡོད༌དེ། ཨབ་ར་ཧམ་ལ་བུ་གཉིས་ཡོད༌ཅིང༌། བུ་གཅིག་ནི་གཡོག་མོ་ལས་སྐྱེས་པ་ཡིན་ལ། ཅིག་ཤོས་ནི་རང་དབང་ལྡན་པའི་བུད་མེད་ལས་སྐྱེས་པ་ཡིན་ནོ།།
23 འོན༌ཀྱང༌། གཡོག་མོ་ལས་སྐྱེས་པ་ནི་ཤ་ཁྲག་གི་ཕུང་བོར་བརྟེན་ནས་སྐྱེས་པ༌དང༌། རང་དབང་ལྡན་པའི་བུད་མེད་ལས་སྐྱེས་པ་ནི་ཞལ་བཞེས་གནང་བ་ལྟར་སྐྱེས་པ་ཡིན།
24 དེ་ནི་འདྲ་དཔེའི་སྒོ་ནས་གསུངས་པ༌ཞིག་སྟེ། བུད་མེད་དེ་གཉིས་ནི་ཞལ་ཆད་གཉིས་ཡིན༌ལ། རི་བོ་སི་ནཱ་ལས་བྱུང་བའི་ཞལ་ཆད་ནི་གཡོག་མོ་ཧ་གར་ཡིན༌ལ། ཁོ་མོ་ལས་སྐྱེས་པའི་བུ་ཕྲུག་དག་ནི་གཡོག་པོ་ཡིན།
25 ཧ་གར་ཞེས་པའི་ཡིག་འབྲུ་འདིས་ཨ་རབ་ཡུལ་གྱི་རི་བོ་སི་ནཱ་བསྟན་ཅིང་དེང་གི་ཡེ་རུ་སཱ་ལེམ་མཚོན་པ་ཡིན་ཏེ། ད་ལྟའི་ཡེ་རུ་སཱ་ལེམ་དང་གནས་དེར་ཡོད་པའི་བུ་ཕྲུག་ཐམས་ཅད་ནི་གཡོག་པོ་ཡིན་པས་སོ།།
26 འོན༌ཀྱང༌། སྟེང་གི་ཡེ་རུ་སཱ་ལེམ་ནི་རང་དབང་ལྡན་པ༌ཞིག་ཡིན་པ་དང༌། བདག་ཅག་ཐམས་ཅད་ཀྱི་ཡུམ་ཡིན།
27 རྒྱུ་མཚན་ནི་གསུང་རབ་ཀྱི་མདོ་ལས་ཇི་སྐད༌དུ།
མངལ་ཡང་མ་སྦྲུམ་བུ་ཡང་མ་སྐྱེས༌ན།།
བུད་མེད་ཁྱོད་ནི་དགའ་ཞིང་རངས་པར་གྱིས།།
ཕྲུ་གུ་བཙའ་བའི་ཟུག་གཟེར་མ་མྱངས་ན།།
དགའ་སྤྲོའི་འབོད་སྒྲ་ཁྱོད་ཀྱིས་མཐོན་པོར༌སྒྲོགས།།
རྒྱུ་མཚན་ཁྱོ་ག་མེད་པའི་བུད་མེད༌ལ།།
ཁྱོ་ག་ཅན་ལས་བུ་ཕྲུག་མང་དུ༌འབྱུང༌།།
ཞེས་བཀོད་པའི་ཕྱིར༌རོ།།
28 སྤུན་ཟླ༌རྣམས། བདག་ཅག་ནི་ཨི་སཱག་བཞིན་དུ་དཀོན་མཆོག་གི་ཞལ་བཞེས་ལ་བརྟེན་ནས་ཁོང་གི་བུ་ཕྲུག་ཏུ་གྱུར་པ་ཡིན།
29 སྐབས་དེར། ཤ་ཁྲག་གི་ཕུང་བོ་ལས་སྐྱེས་པའི་བུ་ཡིས། དམ་པའི་ཐུགས་ཉིད་བརྒྱུད་ནས་འཁྲུངས་པའི་བུ་ལ་གནོད་འཚེ་བྱས་པ་བཞིན་ད་ལྟའང་དེ་ལྟར་བྱེད་དོ།།
30 དེས་ན་གསུང་རབ་ལས་ཇི་ལྟར་གསུངས་འདུག་ཅེ༌ན། འདི་ལྟ༌སྟེ། གཡོག་མོའི་བུ་ཡིས་རང་དབང་ལྡན་པའི་བུད་མེད་ཀྱི་བུ་དང་མཉམ་དུ་ཁྱིམ་རྒྱུད་འཛིན་མི་རུང༌བས། གཡོག་མོ་མ་བུ་གཉིས་ཀ་ཕྱིར་ཕུད་ཅིག་ཅེས་པ་ཡིན།
31 སྤུན་ཟླ༌རྣམས། དེའི༌ཕྱིར། བདག་ཅག་ནི་གཡོག་མོའི་བུ་ཕྲུག་མ་ཡིན༌པར། རང་དབང་ལྡན་པའི་བུད་མེད་ཀྱི་བུ་ཕྲུག་ཡིན༌ནོ།།