42
Ki jiin Yennu toontunnɔ na po
1 Yennu bia yet a, “N toontunnɔe na, ŋɔɔe ki n kɔɔnɔ paŋ.
Ŋɔɔe ki n gannɔ, ki n par mei u paak.
N jii n Seeke ki teen u ni,
ki u saa baar nan buut nba took digbana kur paak.
2 U kan hoot, koo ki donn kunkɔr sanpaapo,
koo ki pak nan kunkɔsaakar sɔnii ni.
3 U tan kan kɔnn lanbankɔɔnn ki tonti,
ki bia tan kan kpeen fitir nba ki di fanu.
U saa baar nan mamɔmm nba yɔɔ be-e sɔɔ kur paak.
4 U kan ŋaa tama, koo dindanni;
u saa baar nan mamɔmme durinya paak.
Digbanbanfɔka damm kpan guu u tumiiue.”
5 Yennu-e nan sanpaak ki jɔnnir,
ki ŋamm tingbouŋ na nan linba kur be li ni,
ki tur li niib kur manfoor nan foon.
Ki mɔtana, Yomdaanɔ Yennu maŋe yet u toontunnɔ a,
6 “Min Yennu-e yiina ki tura yiikoo
maa fan te ki mamɔmm-i be tingbouŋ na paak.
Li saa nyi a nie, ki n saa lor mɔlor nan nisaarii;
li saa nyi a nie, ki n saa baar nan yentu, digbana kur paak.
7 A saa munt jɔɔnii ninbina,
ki nyinn binba be bunbɔnn, dansarii ni na ki lub.
8 “Min kuukɔɔe tee a Yomdaanɔ Yennu.
Yensɔɔ ji kaa ki saa chent nanin n baakiri.
N kan te ki pata n chent nanin n dontir na.
9 Maa din yet linba na teen mɔniiwa.
Mɔtana, n saa paki bonsaanaewa, ki lin tan lian tun.”
Yaŋ nba jiin dontir po
10 Yinin yanpaaŋ ki tur Yennu, durinya kur n yin dontɔ.
Yimm nba be ŋarint ni, nyun paak na, ii dontɔ,
bonfoa nba kur be nyun ni, ii dontɔ.
Digbanbanfɔka nan niib nba kur be leŋ, ii yiin man.
11 Kunkoouk nan li doi n dont Yennu,
ŋaant ki Kedar teeb n dontɔ.
Ŋaant binba be Sela doo ni na-ii hoot nan parpeenn
kunkona yura paak.
12 Ŋaant binba be digbanbanfɔka na n tur Yennu dontir
nan baakir.
13 Yennu tuu nyi ki kɔn, nan u tee kunkɔnkɔnnɔ nae,
u teen siire, ki u nunii mɔn tɔb paak.
U tuu yikin kɔnn wuyikiniie, ki hoot tɔb hootii,
ki tan nyann u datai.
Ki jiin Yennu mɔsonn po
14 Ki Yennu yet a, “N ŋmin ki li wei bonchiann,
ki ki tur n niib gatu.
Ŋaan mɔtana, yoo baar nan man tun n toonn na;
n yikin nan poo nba tuu yaa wun mar nae.
15 N saa biir kunkona nan jɔɔt, ki te mɔɔt nan tiinii kur n koor.
N saa kpint mɔka ki teenir kunkoot, ki te nyundɔɔna kur n fɔɔr.
16 “N saa tɔkin nan n jɔɔnii na, sɔnu nba ki bi ki ban tɔkine.
N saa kpint bi bunbɔnn na ki teenir yentu,
ki naa digbangbetima na ki turib.
N mɔsonae na, ki n saa dia mɔsona maŋa.
17 Binba kur teen pata yada, ki yi bonninnant bi yennii na
saa sik tiŋ ni ki di fei.”
Biaŋinba ki Israel teeb gbar bin tumii yan
18 Ki Yennu yet a, “Yimm tuukpaa na, gbiintir man,
yimm jɔɔnii na, gotir fanu man.
19 Sɔɔ tee jɔɔŋ ki gar n toontunnɔ-ɔ?
koo ki tee tuukpaar ki gar wunba ki n tumɔ na-a?
20 Israel teeb, i la bona bonchiann, ŋaan i ki jiir ki tun toonni.
I mɔk tuba ki gbia, ŋaan i kpan gbat bee?”
21 Yennu tee Yomdaanɔ nba ki u nunii mɔn nan wun tinn niibe,
ŋanne ki u donn u sennii nan u wannu na sanpaapo,
ki loon u niib n turir baakir.
22 Ŋaan u niib na datai fatiba ki loonib dansarik ni,
ki bi nyint leŋ.
Bi jamme ki fat bi bona, ki sɔɔ kaa ki saa sommibi.
23 I sɔɔ saa gbiint linba na-a?
Laa nyii mɔtana ki saa, i sii gbiintir fanu-u?
24 Ŋmee jii Israel teeb ki tur fat-teeb na?
Li tee Yennu nba ki ti tuun biirɔ na tiɔŋo.
Ti ki be nan waa loon tii be na,
koo ki sak tumiiu nba ki u turit na.
25 Ŋanne te ki u wutoor gbatit, ki ti di tɔb wahala.
U wutoor di Israel kur po nan muu nae,
ŋaan ti din ki bann linba tuun ki tumii siar li ni.