41
Ki jiin Yennu mɔsonn nan Israel teeb po
1 Yennu yet a, “Yimm digbanbanfɔka damm na,
ii ŋmin man, ki gbiint turin.
Ii teen siir ki saan nan i maan, barbuut boor,
ki i saa la yaak ki pak.
Ŋaant ki ti lakin taan ki la wunba mɔk mɔnii.
2 “Ŋmee din nyii nan nyannu daanɔ na yondo po,
ki turɔ nyannu siaminba kur ki u saani?
Ŋmee din te ki u nyann kpanbara nan digbana?
U takoobu na chɔɔ butib nan bi tee tangbiruŋ nae,
ki u peenii yatib nan wouŋ nba tuu yat mɔɔt na.
3 U waa beeribe u yamani,
ki kakii ki u taa ki baat tiŋ fanu.
4 Ŋmee din te linba na tumi?
Ŋmee te ki bona tuun, laa tuun biaŋinba na?
Min Yennu din be pinpiik ni, ki min Yennu bia sii be li joontu.
5 “Digbanbanfɔka niib la maa tun linbawa;
bi jekire ki jat baantir nan jaŋmaanii.
Bi kur taan leebe ki baar.
6 Nuu toontunna na sommit bi leeb ki teemm parcheenn.
7 Kanpinta tuu yet saauk daanɔe a, ‘A yabira.’
Ki wunba ŋamii patir na teen wunba kpaan patir maŋ kpaŋ-n-mɔŋ.
Bi tuu yet a, ‘Li tukinu na ŋan,’ ki ji jii kpai ki kpaa patir na.
8 “Ŋaan yimm Israel teebe tee n toontunna,
ki tee niib nba ki n gann, kii tee n yɔɔk Abraham yaaboona.
9 N din nyii nani durinya na kpinii poe,
ki yiini banfɔkawa ki i baar.
Ki n yeti a, ‘Yimme tee n toontunna.’
N din ki yêti kaa, ŋaan n din gannie.
10 I daa tiin jaŋmaanii. N be nani.
Mine tee i Yennu. I daa te ki siar kɔɔnti jaŋmaanii.
N saa turi paŋ ki sommi. N saa guuri, ki tinni.
11 “Binba donn wutoor i paak na
saa bann baak fei nba tee biaŋinba.
Binba kɔn nani na saa kpo,
12 ki bot tingbouŋ na ni.
13 Mine tee i Yomdaanɔ Yennu; n teeni paŋ ki beeri a,
‘Daa tiin jaŋmaanii, n saa sommiwa.’ ”
14 Ki Yennu bia yet a, “Yimm Israel teeb nba lek ki yab
ki bia ki mɔk paŋ na, ŋaan i daa tiin jaŋmaanii,
n saa sommiwa.
Min nba tee yimm Israel teeb kasii Yennu nae tee i tinntɔɔ.
15 N saa teeni nan diboolanbana nae,
ki i sii paan ki bia porin, ki i saa boor jɔɔt ki bet,
ki kunkona saa boor ki kpant tanbiinii.
16 I saa faa donnib sanpaapo, ki wouŋ n pebirib ki yaat,
ki wonpaaruk saa yatib.
Ki i ji sii mɔk parpeenn, kimaan mine tee i Yennu;
ki i saa dont min nba tee yimm Israel teeb kasii Yennu na sann.
17 “N niib nba tee tarii na kunkɔra-i koor,
ki bi loon nyun yoo nba, min Yennu saa gat bi miaru.
Min Israel teeb Yennu na kan ban nyɔr nyikibi.
18 N saa te ki mɔka puub kunkonkoona paak,
ki nyuntona nyi baat ni.
N saa kpint kunkoot ki teenir nyundɔɔna,
ki kpint tinkooŋ ki teenir nyuntona.
19 N saa te kpekii nan kpinkpant nan kpan tiinii
nan tulaarii tiinii n pia kunkoouk paak.
Tiinii saa pia kunkoouk paak,
li foi nan naagbasukirii nan kɔɔnsaant.
20 Niib saa la nna, ki bann nan min Yennu-e tumir.
Bi saa bann nan Israel teeb kasii Yennu-e te ki li tun.”
Ki jiin Yenmɔnu nan tingbana po
21 Yennu nba tee Israel teeb kpanbar na piak a:
“Yimm digbana tingbana na, baat nan i maan man.
Baat nan i mɔna-chinchibir nba ki i mɔk.
22 Baat nna man, ki bunt linba saa tun,
ki li-i tun yoo nba, tin bann.
Want barbuut na ni, linba din tun yaayoo ni, ki bia yetit li paak.
23 Betirit linba saa tun tɔɔnn po, ki tin bann nan i tee yenniie.
Tumin toonŋansiar, koo baat nan biak.
Ii te ki jaŋmaanii nan yaar lituk n soorit.
24 Yimm nan i toona kur tee yanne,
binba jiantiri na nubir pɔie n boor.
25 “N gann jasɔɔ, ki u be yondo po.
N saa baar nanɔ ki wun tan piin gaŋ po ki lek.
U ŋmaat doo diara nan tanmaatit nae,
ki bia tee nan yɔkmaarɔ nba tuu ŋmaat yɔk tant biaŋinba na.
26 I ŋmee bunt nan linba na saa tumii,
ki tin fit yet nan u mɔk mɔnii?
I sɔɔ ki pak mɔbonn ki jiin li po. Sɔɔ ki gbat ki i pak siari.
27 Min Yennu-e tee sinsinn daanɔ nba yet Sayɔnn teeb maan maŋ.
N tun toomii Jerusalem maa wun pak a,
‘A niib kpent. Bi kpent bi doo ni.’
28 Maa got tingbana na, bi sɔɔ ki mɔk siar ki saa pak,
nan bi yenɔkɔɔwa ki fit jiin buboit nba ki n boi na.
29 Tingbana na kur ki mɔk nyɔɔti, bi kan fit teen siari;
tingbana na tee butimme, bi kaa pansiaki.”