26
Biaŋinba ki Yennu saa tur u niib nyannu
1 Daar baate ki niib maŋ tan saa yin yaŋ na Juda tiŋ ni a:
Ti doo mɔk paŋ. Yennu tiɔŋo guu li joona.
2 Lootir doo na tammɔi ki ŋaan digbann nba ki mɔk biit na n kɔɔ,
digbann nba niib tuun linba took.
3 Binba lora see fanu, kimaan bi dindann nba be a ni na,
fin Yennu-e teemm barmɔnii parmaasir.
4 Teent i dindann Yennu ni yaayoo siiyoo, u sii guut yoo kur.
5 U sikin binba tuu dont bi mɔŋ nawa,
ki biir digbanpaarir nba ki bi tuu be leŋ na,
ki yeer bi joona ki lur tiŋ ni.
6 Binba tuu di biak na ji somm li paake mɔtana,
ki bi taapant ŋmaatir.
7 Yennu, a tuu ŋamm sɔnu nba ki niŋamm tɔkii nae fanu,
sɔnu nba ki bi tɔkii naae mur-mur.
8 Ti waa a loomme, ki teen ti dindann a ni.
A kuukɔɔe ki ti loon.
9 N tuu dukii a poe nyiɔk nan n par kur.
Fi-i bu tingbouŋ na nan li niib kur buut,
bi kur saa bann ŋant paaka.
10 Faa lek ŋan ki tur biit damm na,
ŋaan bi ki bann bin tun linba tooki.
Niŋamm tiŋ na ni gbaa, ŋaan bi tuun biite;
bi yêt bin sak a yiikoo nba teewa.
11 A datai ki mi nan a saa dat bi tuba.
Yennu, kɔɔntib fei ki ŋaan bin di biak.
Ŋaant bin di biak nba ki a teen li siir na.
Wantib faa loon a niib biaŋinba.
12 Yennu, a sii teenit parmaasir;
linba kur ki ti tun, a paŋe te ki ti tun.
13 Ti Yomdaanɔ Yennu, siabe tuu diat,
ŋaan fin kuukɔɔe tee ti Yomdaanɔ.
14 Mɔtana bi kpowa, ki ji kan ban fiiri,
bi narimii kan ban fiir, kimaan a dat bi tubae ki biirib,
ki sɔɔ ki tian bi po.
15 Yennu, fine te ki ti digbann yabitir,
ki tantir li yent siar kur po, ki linba na tura baakir.
16 Yennu, a dat a niib tubae, ki bi daamii ni, ki bi miara.
17 Fin Yennu-e te ki ti bui nan poo nba tuu yaa wun mar
ki li tonɔ biaŋinba na.
18 Ti daan be tont nan daamii nie, ŋaan ti tan ki mar siar.
Ti ki la nyannu ki tur ti tiŋi; ti ki teen siari.
19 Ti niib nba kpo na saa fiira.
Bi gbanant saa jen manfoor niwa.
Binba kur gɔɔnt bi kaat ni na saa fiir ki yin parpeenn yanii.
Marin nba tuu pant tingbouŋ na biaŋinba na,
nnae ki Yennu saa fiin binba kpo sianyoowa na.
Ki jiin buut nan ŋammir po
20 N niib, ii kun i ŋei ni man, ki saa kɔɔ, ŋaan loon gana. Ii bɔr i mɔŋ waan nan yoo nba ki Yennu par tan saa maak.
21 Yennu nyii u binbeboor Yendɔuŋ ni ki baat, a wun dat tingbouŋ na niib tuba, bi biit paak. Baa bɔr ki kpii niib nba na kur maan saa nyi paanu, ki tiŋ ji kan bɔr niib nba ki bi kpiib maŋi.