25
Dontir yaŋ
1 Yennu, fine tee n Yomdaanɔ,
n saa tura baakir ki dont a sann.
A tun yaarlituk toonawa;
a gbeen lora nba ki a din lor sianyoo nawa.
2 A te ki doi kpant langbent, ki bia yeer li ŋapaara.
Ti datai nba din maa naan ŋei nba na bote yaayoo siiyoo.
3 Digbanjaana niib saa tura baakir;
bi saa tina jaŋmaanii, nibiit doi ni.
4 Talas damm nan tarii chiar ki baar a boor,
ki be bi yamani daamii yoo.
Fine turib gungurboor sajakper yoo,
ki bia turib maasu, wɔruk yoo.
Nɔɔnbiit damm tuu lek nan wonpaaruk nae,
5 ki bia lek nan kunkoouk paak yonkoonin na,
ŋaan fin Yennu-e muu ti datai mɔi.
Fine te ki nɔɔnbiit damm ŋmin fuut
nan sanpagbouŋ nba tuu maan wɔruk daar biaŋinba na.
Ki jiin Yennu jaamm po
6 Sayɔnn kunkonn na paake ki Yabint Yennu saa teen jaamm, ki tur durinya na ŋaak digbana kur, jaamm nba mɔk jeŋant nan daŋanin.
7 Leŋe ki u saa pian biak sanpagbouŋ nba jɔɔn digbana kur yur paak na.
8 Yabint Yennu saa biir kuun yaayoo siiyoo. U saa fiar sɔɔ kur ninnyuut, ki boon fei nba ki u niib yɔɔ di durinya na ni. Yennu tiɔŋo pak na.
9 Li-i tun nna yoo nba, sɔɔ kur saa yet a, “Ŋɔɔe tee ti Yennu. Ti teen ti dindann u nie, ki u fatit. Ŋɔɔ-i tee ti Yomdaanɔ. Ti teen ti dindann u nie, ki mɔtana ti mɔk parpeenn nan kpinkpammuk, kimaan u tinnita.”
Ki jiin Moab teeb tubdatu po
10 Yennu saa guur Sayɔnn kunkonn, ŋaan bi saa ŋmaat Moab niib tiŋ ni nan nei nba tuu ŋmaat kauk, ki lin teen koorin na.
11 Bi saa tant bi kpinkpant nan bi yaa bin duk nyun nae, ŋaan Yennu saa sikinib tiŋ ni, ki bi tatuŋ saa te bi nii n sɔnn.
12 U saa biir Moab ŋapaara nan bi joonfɔkit na, ki sikinir tanbiinii ni.