ⅩⅢ
Ŋʊarɛ k'a a ga m an nyɩnta ʊ kristagʊɔɔ barla
Ⅰ Baa kʊ mɔɔ ɩ leminno haay hɩm,
gʊɔɔ hɔ kan malɛɛkarɔ hɔ kɩ,
kʊ mɔɔ ba ŋʊarɛ m, hɔsɩ bɛɛ m mɔɔ nɩ y.
Bɔ mɔɔ ʊ kʊ ʊ kan lɔmbɩr k'a nyi nɩ bɔm kɩ,
gɛɛ bɔ mɔɔ ʊ kʊ ʊ, kan sɩsaka k'a nyi nɩ bɔm kɩ.
Ⅱ A a da ma mɔɔ m wosolɛsinnɩsora meerbaa ganwʊrɛ yɩ,
m bɩr hɔdɔrɛ m haay, m hɔ k'a a nyaakʊm da haay dɔ,
a a da ma mɔɔ m bɩr sɩrakarɛ m haay,
m m dam ma m n'a kam ciro n'a gaarɛ a bɩncɛrɔ ʊ,
lɛ meerbaa tɔkkɛ ma,
kʊ mɔɔ ba ŋʊarɛ m hɔsɩ bɛɛ m mɔɔ nɩ y.
Ⅲ Kʊ mɔɔ bɩ to m m hɔnyɩ haay jir cicirzannɔ m,
m m da ma sɔ m yɛ fɩr ma, n m da sɛ rɛ,
kʊ mɔɔ ba ŋʊarɛ m, naa woo… naa, vam m.
Ⅳ Kʊ gʊaa ɩ ŋʊarɛ m, a ɩ bʊrlɛ a ma,
a ɩ hɔ mɩŋŋa bam gʊɔɔ m,
a bɩr jɩm barɛ y,
a bɩr a lɛ bɔrɛ a mɩŋŋa ʊ y,
a bɩr a mɩŋŋa busure y.
Ⅴ Kʊ gʊaa ɩ ŋʊarɛ m, a bɩr zi daŋŋada barɛ y,
a bɩr a karɛ a mɩŋŋa daahan ma y,
a nɔ bɩr maŋ ʊ zɔɔ-zɔɔ y,
a bɩr mim cɩntarɛ a heer ʊ kan gʊaa kɩ y,
Ⅵ kʊ gʊaa ɩ ŋʊarɛ m,
a bɩr a heer nyɔɔm zibʊnyaa barɛ ma y,
a heer a n'a nyɔɔm sɩra ma.
Ⅶ Kʊ gʊaa ɩ ŋʊarɛ m,
a ɩ sugur bam hɔ haay nɔ ʊ,
a ɩ sɩra kam dɔmɩm haay,
a ɩ taaheerlɛ m tee…,
a ɩ yɛm kɔrɛ do haay ma.
Ⅷ Ŋʊarɛ nyarɛ ba ʊ y.
Wosolɛsinnɩsora meerbaarɔ ganwʊrɛ nyarɛ,
leminno y'a hʊnhɔ rɔ wɔɔ hɩrɛ nyarɛ,
hɔdɔrɛ nyam sɔ.
Ⅸ Bala, wɔɔ n hɔ haay dɔ y,
wosolɛsinnɩsora zibəə kʊ wɔɔ n'a bam sɔ bɩ,
wɔɔ bɩr a barɛ an n'a gam kʊ ʊ haay y.
Ⅹ Bɩ, kʊ hɔ k'an mɩŋŋa paan… bɩ bɩ bʊr,
hɔ k'a jirə n ta ʊ bɩ nyarɛ.
Ⅺ Nyɩnta kʊ mɔɔ ʊ nyɩ bɩ, nyɩnzɛɛmbaa meer mɔɔ n'a barɛ, m nɩ m hɔɔn darɛ am nyɩ hɔ bɩ m, m nɩ nyɩbaa hɔɔn m.
Bɩ kʊ mɔɔ bɩ m ba gʊaa burgu bɩ, mɔɔ nyɩbaa zibəəro wɔɔ to.
Ⅻ Her-her naa, bɔ a ʊ kʊ ʊ, ɩ ʊ, dɩga wɔɔ nawʊm jɛtɩga ʊ,
hɔ kʊ wɔɔ nɩ dɩgam ma bɩ bɩr yɩm fasɩ y,
bɩ dɔmɩm ɩ zɛm wɔɔ m b'a yɩm garga ra haay.
Her-her naa, mɔɔ hɔdɔrɛ jirə ta ʊ, bɩ hinni bɩ do ʊ, mɔɔ hɔ haay dɔm, amba Woso mɔɔ dɔ mɩŋŋa bɩ m.
ⅩⅢ Kɛɛrɛ naa, hɔɔ kaakʊrɔ nɔɔn duro n ta ʊ, bɩ ŋ nyarɛ ba ʊ y:
Sɩrakarɛ m, bɩ taaheerlɛ m kan ŋʊarɛ kɩ,
bɩ ŋʊarɛ ɩ lɛ da ŋ nɩ haay.