Ⅻ
Sɛnt-Ɛspri ganwʊrɛrɔ mim
Ⅰ M danyɩnɔ, kʊ *Sɛnt-Ɛspri ganwʊrɛrɔ wɔɔ mim bɩncɛ nɩ, mɔɔ lɛ taa k'awɔɔ n hɔ k'an ta a nɔ ʊ bɩ dɔ mɩŋŋa.
Ⅱ Awɔɔ dɔ a ʊ, nyɩnta k'awɔɔ ʊ basɩrakənno biisi bɩ, wosobaawɔnnɔ daʊrɛ y'a so awɔɔ ʊ, awɔɔ n a da ma an n'a bɔrɛ ŋ ʊ y.
Ⅲ Naa minto bɩ, mɔɔ lɛ taa k'awɔɔ n a dɔ mɩŋŋa, a ʊ, kʊ Woso Ɛspri a so gʊaa ʊ, a zaa nɩ meer bam, a zaa b'a dam ma an a hɩ, a ʊ: «Lerbɔrɛ kʊsɩ ɩ kan Yeezuu kɩ y.» Bɩ gɔsɩ b'a dam ma sɔ an a hɩ, a ʊ: «Zuuba m Yeezuu m,» kʊ Sɛnt-Ɛspri bɛɛ y'a ka y.
Ⅳ Sɛnt-Ɛspri ganwʊrɛrɔ wɔɔ y'a hʊnhɔ, bɩ Ɛspri deem-deem bɩ nɩ ŋ karɛ.
Ⅴ Zibəəro y'a hʊnhɔ n ta ʊ Zuuba nɩ gʊɔɔ darɛ ŋ barɛ ʊ, bɩ Zuuba deem-deem bɩ zibəə m.
Ⅵ Zibəəro zaarɔ y'a hʊnhɔ ta ʊ, bɩ Woso deem-deem bɩ n'a kam gʊɔɔ n'a dam zibəəro wɔɔ duro barɛ ma.
Ⅶ Sɛnt-Ɛspri ɩ zi bam kan gʊaa biyəə kɩ ganwʊrɛrɔ y'a hʊnhɔ m, bɩ naa ba an nawʊm k'a a da gʊɔɔ haay han.
Ⅷ Sɛnt-Ɛspri ɩ mindɔrɛ meerbaa ganwʊrɛ kam gʊaa deem ʊ. A n hɔdɔrɛ meerbaa ganwʊrɛ ka gʊaa vanta ʊ.
Ⅸ Sɛnt-Ɛspri deem-deem bɩ do ɩ sɩrakarɛ ganwʊrɛ kam gʊaa ʊ, a ɩ waarɛ ganwʊrɛrɔ kam gʊaa vanta ʊ sɔ.
Ⅹ A ɩ hoserlo barɛ ganwʊrɛ kam gʊaa vanta ʊ, an nɩ Wosolɛsinnɩsora meerbaa ganwʊrɛ kam gʊaa vanta ʊ sɔ. A ɩ ɛsprirɔ dɔ n a bɔ kʊ zi ganwʊrɛ kam gʊaa vanta ʊ, an nɩ leminno y'a hʊnhɔ hɩrɛ kam gʊaa vanta ʊ, a ɩ leminno wɔɔ duro wusigəre ganwʊrɛ kam gʊaa vanta ʊ sɔ.
Ⅺ Bɩ, naa woo… naa, Sɛnt-Ɛspri deem-deem bɩ zibəə m, an nɩ ganwʊrɛrɔ wɔɔ jinjirm gʊaa biyəə m, a hɔɔnhɔ ma.
Kristagʊɔɔ wɔɔ y'a hʊnhɔ,
bɩ, ŋ deem
Ⅻ Wɔɔ dɔ wɔɔ ʊ gʊaa mɛ deem, an bɔkarɛ a vəŋŋəro m hɔka, bɩ, gʊaa mɛ vəŋŋəro k'a bɩ to an hɔka naa, mɛ deem m bala, Krista maam sɔ.
ⅩⅢ Bala, wɔɔ haay woo… naa, Zuuba batɛm ka wɔɔ ʊ Sɛnt-Ɛspri deem-deem bɩ nɔ ʊ, k'ʊ yɩ mɛ deem zannɔ, kʊ zɩɩfʊ m wɔɔ m, gɛɛ do vantɔɔ m wɔɔ m, kʊ lɔnnɔ wɔɔ m, gɛɛ soamɩŋŋaʊzannɔ m wɔɔ m, ʊ ʊ ba deem, Sɛnt-Ɛspri deem-deem bɩ n y'a ka wɔɔ ʊ, an wɔɔ han an bra wɔɔ ra.
ⅩⅣ Gʊaa mɛ vəŋŋə bɩ deem y, ŋ hɔka.
ⅩⅤ Kʊ gʊaa gam a hɩ, a ʊ: «Kʊ wɔ bɛɛ m mɔɔ m bɩ, mɔɔ ba mɛ bɩ barla y,» naa do a da ma an a ka, a bɩ nyɩntam mɛ bɩ barla dɔ ra?
ⅩⅥ Kʊ gʊaa tʊr a hɩ a ʊ: «Kʊ mɩnyaa bɛɛ m mɔɔ m bɩ, mɔɔ ba mɛ bɩ barla y,» naa a da ma an a ka a bɩ nyɩntam mɛ bɩ vəŋŋə dɔ ra?
ⅩⅦ K'a ɩ yɩrɛ ɩ ʊ, gʊaa mɛ bɩ jilli, mɩnyaa nɩ, gʊaa tʊr nyɩntam lɛɛ ka ra ʊ? Kʊ gʊaa mɛ bɩ jilli, tʊr nɩ, gʊaa meeyaa nyɩntam lɛɛ ka ra ʊ?
ⅩⅧ Bɩ sɩra nɔ ʊ, Woso gʊaa mɛ vəŋŋəro haay cɩncɩnta a bɩncɛ ʊ, a hɔɔnhɔ ma.
ⅩⅨ Kʊ gʊaa mɛ vəŋŋəro wɔɔ jilli, vəŋŋə deem nɩ, mɛ bɩ nyɩntam ka?
ⅩⅩ Ncɩnaaʊ bɩ, gʊaa mɛ vəŋŋəro wɔɔ hɔka bɩ mɛ deem m.
ⅩⅪ Gʊaa mɩnyaa b'a dam ma an a hɩ a wɔ m a ʊ: «Ɩbɩɩ zibəə ba mɔɔ ma y.» Gʊaa mim b'a dam ma an a hɩ a gannɔ m sɔ a ʊ: «Awɔɔ zibəə ba mɔɔ ma y.»
ⅩⅫ A n lɛ da bɩ, gʊaa mɛ vəŋŋəro k'ɩ ʊ, ŋ nyɔɔdʊ ba ʊ fɩɩgaa rɔ wɔɔ, brɔɔ zibəə n ta ʊ gʊta karɛ.
ⅩⅩⅢ Wɔɔ mɛ vəŋŋəro kʊ wɔɔ nɩ dɩgarɛ ŋ ma ɩ ʊ, ŋ bɩ wɩsɩ rɔ wɔɔ, brɔɔ wɔɔ nɩ nyasʊrɛ ŋ nɩ gʊta, niŋŋoo k'ɩ ʊ nyannɩ bɩncɛrɔ m nɔ wɔɔ, brɔɔ wɔɔ nɩ nyasʊrɛ ŋ nɩ paan….
ⅩⅩⅣ Wɔɔ mɛ vəŋŋəro kʊ ŋ nɩ ta daʊrɛ m nɔ wɔɔ bɩr a kam nyasʊrɛ bɩ do ma y. Woso k'a gʊaa vəŋŋəro da bɩ, a zi bɩ ba a ʊ, kʊ vəŋŋəro kʊ ŋ ba daʊrɛ m nɔ wɔɔ n daʊrɛ yɩ gʊta.
ⅩⅩⅤ A ba a ʊ maam, kʊ gʊngʊrɛ bɩ nyɩnta mɛ b'ʊ y, bɩ kʊ vəŋŋəro wɔɔ n bɩr nyasʊm kʊ m.
ⅩⅩⅥ Kʊ mɛ vəŋŋə deem ɩ fɩr yɩm, vəŋŋəro mɩsɩrɔ wɔɔ haay ɩ fɩr yɩm kan kɩ. Kʊ vəŋŋə deem daʊrɛ yɩ, vəŋŋəro mɩsɩrɔ wɔɔ haay y'a heer nyɔɔm kan kɩ sɔ.
ⅩⅩⅦ A n bɔkarɛ, Krista mɛ n'awɔɔ m, a mɛ bɩ vəŋŋə n'awɔɔ gʊaa biyəə m, gʊaa biyəə kan a bɩncɛ kɩ.
ⅩⅩⅧ Ncɩnaaʊ nɩ, Woso n gʊɔɔ bɔ ʊ an zibəə ka ŋ ʊ, kristagʊɔɔ wɔɔ barla. Lɛɛkarɛ ma bɩ, kristazibəəzannɔ a ŋ cɩnta. A hɩɩya hɔ ma bɩ, wosolɛsinnɩsorazannɔ a ŋ cɩnta. A kaakʊ hɔ bɩ, hɔdɩndagʊɔɔnzannɔ a ŋ cɩnta. Bɩ jɛ ʊ, gʊɔɔ kʊ ŋ nɩ hoserlo barɛ ganwʊrɛ m nɔ wɔɔ m, kan yaabarɔ waarɛ ganwʊrɛrɔ zannɔ kɩ, kan daahanzannɔ kɩ, kan lɛɛzannɔ kɩ, kan gʊɔɔ kʊ ŋ nɩ leminno y'a hʊnhɔ hɩm zannɔ kɩ.
ⅩⅩⅨ K'awɔɔ dɩga a naa, awɔɔ n a dɔ a ʊ, ŋ woo… bɛɛ m kristazibəəzannɔ ra? Ŋ woo… bɛɛ m wosolɛsinnɩsorazannɔ sɔ y. Ŋ woo… bɛɛ m hɔdɩndagʊɔɔnzannɔ y. Ŋ woo… bɛɛ nɩ hoserlo barɛ y.
ⅩⅩⅩ Ŋ woo… bɛɛ nɩ yaabarɔ waarɛ ganwʊrɛrɔ nɩ y. Ŋ woo… bɛɛ nɩ leminno y'a hʊnhɔ hɩrɛ y. Ŋ woo… bɛɛ nɩ leminno wɔɔ wusigəre y.
ⅩⅩⅪ K'a ka ganwʊrɛrɔ kʊ ŋ nɩ mɩŋŋa an lɛ da rɔ wɔɔ ma, kan a heer kɩ haay.
Bɩ, kʊ m zaa k'an mɩŋŋa an cem haay bɩ hɩnka a m kɛɛrɛ.