4
Ludo꞉ Boasa꞉ di
1 Ludo꞉ Na꞉omilo꞉wa fa꞉la꞉doma꞉ni ha꞉nabikiyo꞉, Boas e kalu Ludbo꞉lo꞉ sio꞉ a꞉no꞉ ko꞉lo꞉ Ba꞉diliha꞉m amisa꞉n a꞉na kelema꞉ni ane. E kalulo꞉ kegea꞉sen hen a꞉na fa꞉la꞉dowa꞉sa꞉ga꞉, kalu a꞉no꞉ a꞉na yasisen. A꞉na yasisen ami, A꞉lema꞉la꞉ga꞉ ene so꞉lo꞉leya a꞉la꞉ta꞉ga꞉lo꞉ ane kalu a꞉no꞉ a꞉na fa꞉la꞉dowo꞉. Kalu a꞉no꞉ a꞉na fa꞉la꞉dowabiki, Boas e sa꞉laki, “Nao, ge towo꞉ nain nenela꞉ma꞉nigo꞉l ko꞉lo꞉, wena mesa꞉ mena.” A꞉la꞉sa꞉labiki kalu a꞉no꞉ elo꞉wa mesa꞉ mio꞉.
2 A꞉la꞉ta꞉ga꞉ Boas eyo꞉ amisa꞉n ko꞉go꞉do꞉ kalu do꞉la꞉fo꞉wo꞉ tililia꞉ga꞉, a꞉na mesa꞉ mena꞉ki towo꞉ sio꞉.
3-4 A꞉la꞉yo꞉ towo꞉ nenelakiyo꞉, Boas eyo꞉ a꞉la꞉sio꞉, “Na꞉omiyo꞉ Moabdo꞉ ane a꞉no꞉ a꞉ma꞉la꞉ mio꞉ ko꞉lo꞉, hen elo꞉wo꞉ kililia꞉no꞉ da꞉lab. Hen a꞉no꞉ nain nao, A꞉lema꞉la꞉g eno꞉ ko꞉lo꞉, go꞉no꞉n dia꞉no꞉ asulaba꞉le a꞉la꞉liki, nenelema꞉ni mio꞉. O꞉go꞉ hen a꞉no꞉ go꞉no꞉n dia꞉no꞉ asulalega, ko꞉go꞉do꞉ kalu i wema꞉ siwa꞉l amio꞉ ‘no꞉no꞉n kililia꞉no꞉ka꞉’ a꞉la꞉bo꞉ dinali sama. Mo꞉wo꞉ na꞉no꞉ A꞉lema꞉la꞉g ene so꞉lo꞉ imilise ko꞉sega, ne ha꞉lu ko꞉na꞉ dowo꞉. A꞉la꞉fo꞉ko꞉lo꞉ gemo꞉wo꞉ tamina dabu bo꞉do꞉l. Ko꞉sega ge mo꞉bealega, nelo꞉ ko꞉na꞉ma dowo꞉ ko꞉lo꞉ ni kililia꞉nigo꞉l.” A꞉la꞉sa꞉labiki kalu a꞉ma꞉ sa꞉laki, “Heno꞉ no꞉no꞉n kililia꞉nigo꞉l.”
5 A꞉la꞉gabiki Boasa꞉ kalu o꞉mo꞉ sa꞉laki, “Heno꞉ gi kililiakiyo꞉, Moab ga sa꞉ba꞉lo꞉, Lud ko꞉lo꞉ mio꞉ a꞉no꞉lo꞉, gi dia꞉ib. Kalu sowo꞉ a꞉ma꞉ heno꞉ ene so꞉lo꞉ us a꞉naka dowaki, ene wiyo꞉ sa꞉la꞉i ha꞉na꞉melea꞉ki, ga sa꞉ba꞉lo꞉ a꞉no꞉ gi dia꞉ib.”
6 A꞉la꞉sa꞉labiki kalu a꞉ma꞉ sa꞉lakiyo꞉, “Hen a꞉no꞉ ni dialega, ni so꞉waya꞉lo꞉ dabun dia꞉no꞉ dowo꞉ a꞉no꞉ mogaima꞉ib ko꞉lo꞉, niyo꞉ hen a꞉no꞉ mada mo꞉dia꞉no꞉. A꞉la꞉fo꞉ko꞉lo꞉ gi kililima.”
7-8 Kalu a꞉ma꞉yo꞉ “Hen a꞉no꞉ gi ka kililima” a꞉la꞉sa꞉lakiyo꞉, ene budi gido꞉fo꞉ amilo꞉ ko꞉lo꞉ a꞉no꞉ dugu. Budi ko꞉lo꞉ duguwo꞉ mo꞉wo꞉ we. Mo꞉luwo꞉ Isolael iliyo꞉ hen kililia꞉nikiyo꞉, to saefa꞉ a꞉no꞉ wa꞉kabiyo꞉ mo꞉dimidama꞉no꞉ a꞉la꞉li elela꞉ sa꞉lakiyo꞉, kalu a꞉ma꞉ ene gido꞉fo꞉ amilo꞉ budi a꞉no꞉ duda꞉sa꞉ga꞉, kalu o꞉mo꞉ dimian. A꞉la꞉fo꞉ko꞉lo꞉ A꞉lema꞉la꞉g e so꞉lo꞉ a꞉ma꞉yo꞉ a꞉la꞉dimido꞉.
9 A꞉la꞉dimidabiki Boas eyo꞉ a꞉la꞉sio꞉, “Gi kegeo꞉ wema꞉yo꞉ naindo꞉ dimido꞉l we ba꞉dab. O꞉go꞉ A꞉lema꞉la꞉go꞉, ene so꞉wa a꞉la꞉, Malono꞉ Kiliono꞉ ili hen Na꞉omiya꞉lo꞉ bo꞉fo꞉lab a꞉no꞉ ni kililiyo꞉l.
10 Kalu sowo꞉ a꞉ma꞉ heno꞉ ene so꞉lo꞉ us a꞉naka dowaki, ene wiyo꞉ sa꞉la꞉i ha꞉na꞉melea꞉ki, Malona꞉ inga sa꞉ba꞉lo꞉, Lud a꞉no꞉lo꞉ ni dia꞉no꞉. A꞉la꞉ta꞉ga꞉ Malona꞉ wi sa꞉sa꞉lo꞉wo꞉ ho꞉lefo꞉ ko꞉ ha꞉na꞉mela꞉ib. O꞉go꞉do꞉ nilido꞉ dimido꞉ we gio꞉lo꞉ ba꞉dab.”
11 A꞉la꞉sa꞉labiki ko꞉go꞉do꞉ kalu o꞉lia꞉ kaluka꞉isale nol a꞉namilo꞉ elen o꞉lia꞉ma꞉ sa꞉lakiyo꞉, “Gililo꞉ dimidab we nio꞉ bo꞉do꞉l. A꞉la꞉fo꞉ko꞉lo꞉ tif amio꞉ to nowo꞉ mo꞉sa꞉ma꞉ib. Tamin amio꞉ Lesol o꞉lia꞉ Lea o꞉lia꞉ma꞉yo꞉ so꞉wayo꞉ modo꞉ sa꞉la꞉la꞉sa꞉ga꞉, Isolael kaluka꞉isaleyo꞉ a꞉na fa꞉la꞉dowo꞉ ko꞉lo꞉, o꞉go꞉ Yawe eyo꞉ ga gilo꞉ diab wenamio꞉lo꞉ o꞉leau fa꞉la꞉do alifoma꞉ki asulo꞉l. A꞉la꞉ta꞉ga꞉ Ba꞉diliha꞉m amisa꞉n amio꞉ gi wiyo꞉lo꞉ mada alan doma꞉ki asulo꞉l. A꞉fla꞉ta so꞉lo꞉ gililo꞉ a꞉namio꞉ gi wiyo꞉ wabulun wa꞉la꞉b fa꞉la꞉doma꞉ki asulo꞉l.
12 Yuda o꞉lia꞉ Temal o꞉lia꞉ma꞉ inso꞉, Beles e so꞉lo꞉ amilo꞉ kaluka꞉isale modo꞉ ko꞉lo꞉ fa꞉la꞉dowo꞉ auma꞉ib, Yawe eyo꞉ Boas gilo꞉ ga diab wenamio꞉lo꞉ so꞉lo꞉wo꞉ alan fa꞉la꞉dowa꞉i ha꞉na꞉melea꞉ki asulo꞉l.” Iliyo꞉ a꞉la꞉sio꞉.
Boasa꞉ e so꞉lo꞉wo꞉ we
13 A꞉la꞉fo꞉ko꞉lo꞉ Boas eyo꞉ Ludo꞉ di. Ludo꞉ dia꞉sa꞉ga꞉ sen amio꞉, Gode eyo꞉ Lud e ege alifa꞉ ko꞉lo꞉, Lud e so꞉wayo꞉ a꞉na alelo꞉. Alela꞉sa꞉ga꞉ kalu so꞉wayo꞉ a꞉na sa꞉la꞉li.
14 So꞉wa sa꞉la꞉li a꞉no꞉ ba꞉da꞉ga꞉, amisa꞉n ka꞉isale nolba꞉yo꞉ Na꞉omimo꞉ sa꞉laki, “Niliyo꞉ Godeya꞉ wiyo꞉ dulugu sa꞉ma꞉niki, mo꞉wo꞉ Kalu Alana꞉yo꞉ so꞉lo꞉ gilo꞉lo꞉ bo꞉fo꞉mela꞉no꞉ so꞉wayo꞉ gemo꞉ sa꞉la꞉ meab. Isolael hen a꞉namio꞉ so꞉wa we wilo꞉ doma꞉ib.
15 Eyo꞉ ge sagalo꞉ mesea꞉ki ta꞉fa꞉ib a꞉la꞉ta꞉ga꞉ ge anaso꞉ ulula꞉li dowalikiyo꞉, eyo꞉ ge tili dofo꞉mela꞉ib. Ga꞉su Lud a꞉ma꞉yo꞉ ge mada alan asula꞉sa꞉ga꞉, so꞉wa we gemo꞉wo꞉ a꞉na sa꞉la꞉meab. Giyo꞉ kalu so꞉wa doma꞉la꞉fo꞉ sa꞉la꞉li kibo꞉bowo꞉, ge sagalemabe. Ko꞉sega ga Lud wema꞉lo꞉ma꞉ tiginilab.”
16 A꞉la꞉fo꞉ko꞉lo꞉ Na꞉omi eyo꞉ so꞉wa a꞉no꞉ fo꞉fo꞉lelia꞉ga꞉ ta꞉li silikiyo꞉, dinafa bo꞉fo꞉len.
17 Amisa꞉n ka꞉isale nolba꞉ sa꞉laki a꞉la꞉sio꞉, “Na꞉omiya꞉ ene so꞉waleyo꞉ sa꞉la꞉li ko꞉lo꞉ diab.” A꞉la꞉fo꞉ko꞉lo꞉ so꞉wa a꞉no꞉ Obed wikili alifa꞉. Obed eyo꞉ Ya꞉si ko꞉lo꞉ sa꞉la꞉li. Ya꞉si eyo꞉ Da꞉ibido꞉ sa꞉la꞉li.
18 A꞉la꞉fo꞉ko꞉lo꞉ Belesa꞉ eso꞉lo꞉ mo꞉mio꞉wo꞉ we. Belesa꞉ inso꞉wo꞉, Heslon.
19 Heslona꞉ inso꞉wo꞉, Lam. Lama꞉ inso꞉wo꞉, Aminadab.
20 Aminadaba꞉ inso꞉wo꞉, Nason. Nasona꞉ inso꞉wo꞉, Salamon.
21 Salamona꞉ inso꞉wo꞉, Boas. Boasa꞉ inso꞉wo꞉, Obed.
22 Obeda꞉ inso꞉wo꞉, Ya꞉si. Ya꞉siya꞉ inso꞉wo꞉ Da꞉ibid. E so꞉lo꞉wo꞉ o꞉m.