To Nafa We
Madiyu
E Sa꞉sa꞉lo꞉
Asuluma꞉no꞉ Towo꞉ we
Malolo꞉ to nafa we Madiyu e sa꞉sa꞉lo꞉.
Madiyu e tamin amio꞉ takis mole dia꞉likilo꞉ ta꞉seno꞉ e ko꞉sega, Ya꞉suwa꞉yo꞉ e kudu mena꞉ki ho꞉idabikiyo꞉, Ya꞉suwa꞉lo꞉ tili walama꞉no꞉ kalu nowo꞉ e ko꞉lo꞉ fa꞉la꞉dowo꞉. A꞉la꞉go꞉ko꞉lo꞉ Madiyu eyo꞉ bugo꞉ we e sa꞉sa꞉lo꞉. To alan ko꞉lo꞉ elo꞉ asulakilo꞉ walama꞉no꞉wo꞉ we. Gode eyo꞉ dinali sa꞉labikilo꞉, dinali sa꞉lan kaluwa꞉lo꞉ tamin amilo꞉ to sa꞉sa꞉lifa꞉ a꞉no꞉, Ya꞉suwa꞉ ilili alifa꞉. Gode eyo꞉ Isolael kaluka꞉isaleyo꞉ a꞉ma꞉la꞉ gasilima꞉kiyo꞉, enedo꞉ da꞉feyo꞉ kalu nowo꞉ iliga꞉fa꞉no꞉ a꞉la꞉dinali saefa꞉. A꞉la꞉ta꞉ga꞉ bugo꞉ wema꞉yo꞉ Ya꞉su E, Godeya꞉lo꞉ da꞉feyo꞉ kaluleyo꞉ o꞉m a꞉la꞉likiyo꞉ kalaba wido꞉. Ya꞉suwa꞉lo꞉ henfelo꞉ wena dowakilo꞉ dimido꞉ a꞉ma꞉yo꞉, Godeya꞉ enedo꞉ dinali sa꞉lan kaluwa꞉lo꞉ tamin amilo꞉ dinali sa꞉la꞉i mio꞉ a꞉no꞉ ko꞉lo꞉ ilili alitaki go꞉.
Madiyu bugo꞉ wenamilo꞉ to alan sio꞉ nowo꞉ we. Ya꞉su e, widan kalu alan hendeleyo꞉ e. Godeya꞉lo꞉ bo꞉fo꞉mela꞉no꞉ hen a꞉no꞉ Ya꞉su e wida꞉lab. A꞉la꞉ta꞉ga꞉ Ya꞉su elo꞉ nanog dimido꞉ a꞉namio꞉, Gode eyo꞉ Ya꞉su e kaluka꞉isaleya꞉ misa꞉ kalu alan ta꞉fo꞉.
Madiyu bugo꞉ wenamilo꞉ to alan bila꞉fo꞉ ko꞉lo꞉ sa꞉sa꞉lo꞉ da꞉labo꞉ we. To agel a꞉no꞉ (heb 5-7) Ya꞉suwo꞉ hen misio꞉wa ilikiyo꞉, kaluka꞉isalemo꞉lo꞉ to wido꞉ a꞉no꞉ ko꞉lo꞉ sa꞉sa꞉lo꞉ da꞉lab. To us a꞉namio꞉ Godeya꞉ ene kaluka꞉isaleya꞉yo꞉ ego꞉ man dimidama꞉no꞉ a꞉no꞉ ko꞉lo꞉ wido꞉. To andeb ko꞉lo꞉ Madiyu elo꞉ sa꞉sa꞉lo꞉ a꞉no꞉, heb 10 a꞉na a꞉lab. Ya꞉suwa꞉ enedo꞉ kudu sia꞉lowan kalumo꞉, ene towo꞉ kaluka꞉isale nolbo꞉ walama꞉ ha꞉nakilo꞉ dimidama꞉no꞉ a꞉no꞉ ko꞉lo꞉ wido꞉. To asol ko꞉lo꞉ sa꞉sa꞉lo꞉ a꞉no꞉, heb 13 a꞉namio꞉, Godeya꞉ ene amisa꞉n ho꞉gi fa꞉la꞉doma꞉nigab a꞉ma꞉ mano꞉ Ya꞉su eyo꞉ kaluka꞉isalemo꞉ wido꞉. To fa꞉la꞉lamel ko꞉lo꞉ sa꞉sa꞉lo꞉, heb 18 a꞉namio꞉, Ya꞉su eyo꞉ tili wido꞉ kalu hendele doma꞉no꞉ man a꞉no꞉ ko꞉lo꞉ wido꞉. To bi ko꞉lo꞉ sa꞉sa꞉lo꞉, heb 24-25 a꞉namio꞉, Ya꞉su eyo꞉ elema꞉no꞉ ho꞉len fa꞉la꞉doma꞉nigab a꞉no꞉ a꞉la꞉ta꞉ga꞉, Godeya꞉ ene amisa꞉n ho꞉gi mia꞉nigab a꞉no꞉ ko꞉lo꞉ wido꞉.
1
Ya꞉su Kelisowa꞉ e ma꞉mu i ko꞉lo꞉ mio꞉wo꞉ we
Luk 3.23-38
1 Ya꞉su Keliso e Da꞉ibid eya a꞉la꞉ta꞉ga꞉ Ablahama꞉ so꞉lo꞉wa a꞉la꞉ta꞉ga꞉ fa꞉la꞉dowo꞉. Ya꞉su Kelisowa꞉ ene so꞉lo꞉ mio꞉wo꞉ we.
2 Ablahama꞉ inso꞉wo꞉ Aisa꞉g,
Aisa꞉ga꞉ inso꞉wo꞉ Ya꞉kob
Ya꞉koba꞉ inso꞉wo꞉ Yuda, a꞉la꞉ta꞉ga꞉ ene ao i nolo꞉lo꞉ a꞉lab.
3 Yudaya꞉ inso꞉wo꞉ Beles o꞉lia꞉ Sa꞉la o꞉lia꞉.
A꞉la꞉ wema꞉ anowo꞉ Tema.
Belesa꞉ inso꞉wo꞉ Heslon,
Heslona꞉ inso꞉wo꞉ Lam.
4 Lama꞉ inso꞉wo꞉ Aminadab,
Aminadaba꞉ inso꞉wo꞉ Nason,
Nasona꞉ inso꞉wo꞉ Salamon.
5 Salamona꞉ inso꞉wo꞉ Boas,
a꞉la꞉ta꞉ga꞉ Boasa꞉ anowo꞉ Lehab.
Boasa꞉ inso꞉wo꞉ Obed
a꞉la꞉ta꞉ga꞉ Obeda꞉ anowo꞉ Lud.
Obeda꞉ inso꞉wo꞉ Ya꞉si.
6 Ya꞉siya꞉ inso꞉wo꞉ Da꞉ibid, e misa꞉ kalu alan fa꞉la꞉dowo꞉.
A꞉la꞉ta꞉ga꞉ Da꞉ibida꞉ inso꞉wo꞉ Solomon.
Solomona꞉ ano a꞉no꞉ tamin amio꞉ Ulayaya꞉ ene inga ko꞉lo꞉ elen.
7 Solomona꞉ inso꞉wo꞉ Lehoboam,
Lehoboama꞉ inso꞉wo꞉ Abiya,
Abiyaya꞉ ene inso꞉wo꞉ Asa,
8 Asaya꞉ inso꞉wo꞉ Yehosafat,
Yehosafata꞉ ene inso꞉wo꞉ Yeholam,
Yeholama꞉ inso꞉wo꞉ Usaya
9 Usaya ene inso꞉wo꞉ Yotam,
Yotama꞉ inso꞉wo꞉ Ahas,
Ahasa꞉ inso꞉wo꞉ Ha꞉sekaya,
10 Ha꞉sekaya ene inso꞉wo꞉ Manasa,
Manasaya꞉ inso꞉wo꞉ Amon,
Amona꞉ inso꞉wo꞉ Yosaya
11 Yosayaya꞉ ene inso꞉wo꞉ Yehoiakin o꞉lia꞉ ene ao nolo꞉lo꞉.
Ho꞉len a꞉namio꞉ Babilon kalu iliyo꞉ bubo꞉wo꞉ tinia꞉sa꞉ga꞉yo꞉, Isolael kaluka꞉isaleyo꞉ Babilon ili hena a꞉ma꞉la꞉ tililia꞉gane.
12 A꞉la꞉ta꞉ga꞉ iyo꞉ Babilon tililia꞉gane ho꞉len a꞉namio꞉,
Yehoiakin eyo꞉ ene inso꞉wo꞉ Seadiel a꞉na sa꞉la꞉li.
Seadiela꞉ inso꞉wo꞉ Selubabel.
13 Selubabela꞉ inso꞉wo꞉ Abiud,
Abiuda꞉ inso꞉wo꞉ Eliakim,
Eliakima꞉ inso꞉wo꞉ Asol,
14 Asola꞉ inso꞉wo꞉ Sadog,
Sadoga꞉ inso꞉wo꞉ Akim,
Akima꞉ inso꞉wo꞉ Eliud,
15 Eliuda꞉ inso꞉wo꞉ Eliesa,
Eliesaya꞉ inso꞉wo꞉ Matan,
Matana꞉ inso꞉wo꞉ Ya꞉kob.
16 Ya꞉koba꞉ inso꞉wo꞉ Yosa꞉b, ko꞉lo꞉ Maliaya꞉ ino꞉ e.
Malia eyo꞉ Ya꞉su ko꞉lo꞉ sa꞉la꞉li. Ene wiyo꞉ nowo꞉ Keliso a꞉la꞉sio꞉.
17 A꞉la꞉fo꞉ko꞉lo꞉ so꞉lo꞉ agela꞉i mio꞉wo꞉, Ablahama a꞉la꞉ta꞉ga꞉ Da꞉ibid elo꞉ fa꞉la꞉dowo꞉ ho꞉len a꞉namio꞉ so꞉lo꞉ agelo꞉wo꞉ do꞉la꞉ta꞉ga꞉ fa꞉la꞉da꞉in fa꞉la꞉dowo꞉. A꞉la꞉ta꞉ga꞉ Da꞉ibid eya a꞉la꞉ta꞉ga꞉ Isolael kaluka꞉isale ko꞉lo꞉ Babilon hen a꞉namilo꞉ tililia꞉gane a꞉no꞉lo꞉ so꞉lo꞉ agelo꞉wo꞉ do꞉la꞉ta꞉ga꞉ fa꞉la꞉da꞉in fa꞉la꞉dowo꞉. A꞉la꞉ta꞉ga꞉ Babilon hen a꞉namilo꞉ tililia꞉gane a꞉na a꞉la꞉ta꞉ga꞉ Keliso elo꞉ fa꞉la꞉dowo꞉ ho꞉len a꞉namio꞉lo꞉ so꞉lo꞉ agelo꞉wo꞉ do꞉la꞉ta꞉ga꞉ fa꞉la꞉da꞉in fa꞉la꞉dowo꞉.
Malia eyo꞉ Ya꞉suwo꞉ sa꞉la꞉li
Luk 2.1-7
18 Ya꞉su Keliso sa꞉la꞉liyo꞉ we au fa꞉la꞉dowo꞉. Ene ano Malia a꞉no꞉ Yosa꞉bo꞉ samefo꞉len. A꞉la꞉yo꞉ semo꞉ sili alifa꞉ a꞉lab a꞉namio꞉, Godeya꞉ Mamaya꞉ halaido꞉wa a꞉la꞉ta꞉ga꞉yo꞉ Malia e so꞉wayo꞉ alelabo꞉lo꞉b a꞉la꞉bo꞉ iyo꞉ a꞉na ba꞉ba꞉.
19 Elo꞉ samefo꞉len kalu Yosa꞉bo꞉ mada digalo꞉ kalu ko꞉lo꞉, eyo꞉ ga a꞉no꞉ kalab amio꞉ sendelo alifa꞉no꞉wo꞉ mo꞉asulaki, eyo꞉ ga a꞉no꞉ ha꞉sa ta꞉fa꞉no꞉ asulo꞉.
20 Ko꞉sega Yosa꞉b e a꞉no꞉ ko꞉lo꞉ kele asula꞉liki elen amio꞉, Kalu Alana꞉ ma꞉mul kalu nowo꞉ elo꞉ amio꞉ ofo fa꞉la꞉dowakiyo꞉ a꞉la꞉sio꞉, “Yosa꞉b gi ma꞉muwo꞉ Da꞉ibid. Giyo꞉ ga we dia꞉no꞉wo꞉ tagila꞉so꞉bo. Mo꞉wo꞉ Malia e so꞉wa sab a꞉no꞉ Godeya꞉ Mamaya꞉ eya fa꞉la꞉do alifa꞉ ko꞉lo꞉ ge tagila꞉so꞉bo.
21 Eyo꞉ kalu so꞉wa sa꞉la꞉lia꞉ib ko꞉lo꞉, giyo꞉ so꞉wa a꞉no꞉ wiyo꞉ Ya꞉su wikila꞉bi. A꞉la꞉do꞉ so꞉lo꞉lo꞉ mo꞉wo꞉ we. So꞉wa a꞉ma꞉yo꞉ kaluka꞉isale enedo꞉ma꞉lo꞉ mogago꞉ dimida꞉lab a꞉no꞉ halaki, iyo꞉ asuwa꞉taki a꞉ma꞉la꞉ gasilia꞉ib.” Ma꞉mul kalu eyo꞉ a꞉la꞉sio꞉.
22 Kelego꞉ fa꞉la꞉dowo꞉ a꞉ma꞉yo꞉, tamin amilo꞉ Kalu Alana꞉lo꞉ ene tolo꞉ dinali sa꞉lan kaluwa a꞉la꞉ta꞉ga꞉lo꞉ sio꞉ a꞉no꞉ kolo꞉ ilili alitakigab. Dinali sio꞉ to a꞉no꞉ we.
23 “Ga we, kalu o꞉lia꞉yo꞉ mo꞉ali amio꞉ so꞉wayo꞉ alela꞉sa꞉ga꞉, kalu so꞉wa sa꞉la꞉lia꞉ib ko꞉lo꞉,
iliyo꞉ so꞉wa a꞉no꞉ Imanuel wikilima꞉ib.”
To wema꞉ ha꞉go꞉ we, Godeyo꞉ ni o꞉lia꞉ dofo꞉lab.
24 Yosa꞉b e dasilia꞉ga꞉yo꞉, Alana꞉ ene ma꞉mul kaluwa꞉lo꞉ to saefa꞉ o꞉leauka kudu ane. Eyo꞉ Maliayo꞉ ene aya tililia꞉ga꞉ ane,
25 ko꞉sega Malia eyo꞉ sowa꞉yo꞉ semo꞉ sa꞉la꞉li amio꞉, Yosa꞉b e Malia o꞉lia꞉yo꞉ do꞉mo꞉ imiligo꞉ modo꞉wo꞉. A꞉la꞉ta꞉ga꞉ Malia eyo꞉ kalu so꞉wa a꞉no꞉ sa꞉la꞉liabikiyo꞉, Yosa꞉b eyo꞉ so꞉wa a꞉no꞉ Ya꞉su wikilo꞉.