13
1 Yellu Efɑrɑimubɑrɑ bɑ dɑm bo Isirelibɑ sɔɔ.
Bɑ̀ n bwese kɛri yi yi tie ɡɑri sɔ̃ɔwɑ,
bɑ rɑ nɑndewɑ.
Adɑmɑ bɑ bũu wi bɑ mɔ̀ Bɑɑli sɑ̃wɑ,
mɑ bɑ ɡu.
2 Wee sere kɑ tɛ̃, bɑ durum mɔ̀ bɑ dɔɔ.
Bɑ tii bwɑ̃ɑroku sii ɡeesuɡinu kuɑ.
Ben tiiwɑ bɑ bwisikɑ
mɑ bɑ nu sekɑ kɑ ben nɔmɑ
nu kɑ nɑɑ binu weenɛ.
Mɑ bɑ ɡerumɔ nin sɔ̃ bɑ mɔ̀,
be bɑ yɑ̃kuru nɑ,
bu yiiro bu nɑɑ bii ni sɔ̃su.
3 Yen sɔ̃nɑ bɑ koo doonɑ nɡe bururun kɑkoru
ǹ kun mɛ nɡe dirum.
Bɑ sɑ̃ɑ nɡe yɑkɑ si bɑ ɡurɑ bɑ yɑri doo soo yerun di
su kɑ woo doonɔ
ǹ kun mɛ nɡe wii si su yɑrimɔ ɡbɑburun di.
4 Adɑmɑ nɛ, nɑ sɑ̃ɑwɑ Gusunɔ ben Yinni
sɑɑ mìn di nɑ bu yɑrɑmɑ Eɡibitin di.
Bɑ ǹ mɑɑ Yinni ɡoo mɔ mɑ n kun mɔ nɛ.
Fɑɑbɑ kowo mɑɑ sɑri nɛ bɑɑsi.
5 Nɑ bu kpɑrɑ sɑɑ mìn di bɑ wɑ̃ɑ ɡbɑburɔ
mi ɡɑ̃ɑnu ku rɑ kpi.
6 Sɑnɑm mɛ bɑ duɑ tem mɛ sɔɔ,
bɑ di bɑ debɑ nɡe yɑɑ sɑbe ni bɑ kpɑre,
mɑ bɑ tii suɑbu toruɑ bɑ mɑn duɑri.
7 Tɛ̃, ko nɑ n sɑ̃ɑwɑ nɡe ɡbee sunɔ
nɑ n bu mɑrɑ swɑɑɔ nɡe musuku ɡbeeku.
8 Kon bu wɔrimɑwɑ nɡe ɡbeeku yɑɑ ɡɔbɑ
yèn binu bɑ mwɑ.
Kpɑ n ben toronu bɛsuku.
Mɛyɑ kon bu kɑsuku
nɡe mɛ ɡbeeku yɛɛ yi rɑ yɑɑ kɑsuku,
kpɑ ɡbee sunɔ niu ɡu bu tem.
9 Isirelibɑ, wee i kɑm kuɑ
yèn sɔ̃ i mɑn seesi nɛ wi kon kpĩ n bɛɛ somi.
10 Mɑnɑ bɛɛn sinɑ boko u wɑ̃ɑ.
I de u bɛɛ fɑɑbɑ ko bɛɛn wusu kpuro sɔɔ.
Mɑnɑ bɛɛn kpɑrobɑ wɑ̃ɑ be i bikiɑ i nɛɛ,
bu bɛɛ sinɑmbu kuɑ.
11 Nɑ rɑɑ bɛɛ sinɑ boko wɛ̃ kɑ mɔru.
Mɛyɑ kon mɑɑ bɛɛ nùn mwɑɑri kɑ mɔru.
12 Nɑ Isirelibɑn durum yoruɑ nɑ yii sere sɑɑ ɡɑɑ.
13 Isirelin bweseru tɑ sɑ̃ɑwɑ nɡe bii wìn mɑrubun sɑɑ yɑ turɑ
mɑ u kpɑsɑ wɔri mɔ̀,
ɑdɑmɑ bii wi, u yinɑ u yɑrimɑ.
14 Kon bu wunɑ sɑɑ ɡɔribun wɑ̃ɑ yerun dɑm di.
Kpɑ n bu yɑkiɑ ɡɔɔn nɔmɑn di.
Gɔɔ, ɑ nɑ kɑ wunɛn bɑrɑ te ɑ rɑ kɑ tɔnu ɡo.
Gɔribun wɑ̃ɑ yeru, ɑ nɑ kɑ wunɛn kɑm kootiɑ.
Domi nɑ ǹ mɑɑ ben wɔnwɔndu mɔ̀.
15 Bɑɑ Isirelibɑ bɑ̀ n kuurɑ ɑmɔ,
beɡibun suunu sɔɔ,
yibɛrɛbɑ bɑ koo nɑ nɡe woo sum sɑɑ sɔ̃ɔ yɑri yerun di.
Nɛ, Yinni Gusunɔ nɑ kon bu seeyɑmɑwɑ ɡbɑburun di,
kpɑ bu dɔkɔbɑ ɡberɑsiɑ.
Kpɑ bwii yi nim kpe.
Gɑ̃ɑ ni nu ɡeɑ sɑ̃ɑ kpurowɑ bɑ koo ɡurɑ bu kɑ doonɑ.