12
1 Isirelibɑ bɑ rɑ n mɑn weesu kuɑmmɛwɑ,
kpɑ bɑ n mɑn nɔni wɔ̃kumɔ.
Adɑmɑ Yudɑbɑ bɑ kɑ nɛ, Yinni Gusunɔ Dɛɛro sĩimɔ dee dee.
2 Isirelibɑ bɑ Eɡibitiɡibu ɡum wɛ̃ɛmɔ.
Mɑ bɑ kɑ Asiriɡibu ɑrukɑwɑni bɔkumɔ.
Nɡe mɛyɑ bɑ kɑ kpɑɑsibu kɑsu be bɑ ǹ sɑ̃ɑ ɡɑ̃ɑnu.
N sɑ̃ɑre bɑ woo nɑɑ ɡire.
Bɑ ben weesu dɑbiɑsiɑmɔ tɔ̃ɔ bɑɑtere.
Mɑ bɑ dɑɑ bɔɔbɔyɑ mɔ̀ bɑ dɔɔ.
3 Nɛ, Yinni Gusunɔ nɑ Yudɑbɑ siribu sokumɔ.
Kon be Yɑkɔbun bweseru wɔrimɑ ben dɑɑ kɔ̃sɑn sɔ̃.
Kpɑ n bu ben kɔ̃sɑn ɑre kɔsiɑ.
4 Ben bɑɑbɑ Yɑkɔbu u win mɔɔn nɑɑ tokuru nɛnuɑ
sɑɑ win mɛron nukurun di.
Ye bɑ nùn mɑrɑ u kpɛ̃ɑ,
mɑ u kɑ nɛ Gusunɔ wɔri kuɑ kɑ win dɑm kpuro.
5 U kɑ nɛn ɡɔrɑdo wɔri kuɑ, mɑ u kɑmiɑ.
U swĩ, mɑ u ɡɔrɑdo wi kɑnɑ u nùn domɑru kuɑ.
Betɛli miyɑ u kɑ nɛ Gusunɔ yinnɑ.
Mɑ nɑ kɑ nùn ɡɑri kuɑ.
6 Nɛnɑ Gusunɔ wɔllu kɑ tem Yinni.
Nɛn yĩsirɑ Wi u rɑ n wɑ̃ɑ.
7 Bɛɛ Isirelibɑ, i de i wurɑmɑ nɛ bɛɛn Yinnin mi.
I de i ɡeɑ ko kpɑ i n mɑn nɑɑnɛ sɑ̃ɑ bɑɑdommɑ.
8 Bɛɛ Isirelibɑ i sɑ̃ɑwɑ nɡe tenku be bɑ kilo weesuɡiɑ nɛni.
Bɑ rɑ ɡbɛnɑ kɑ̃.
9 Kpɑ i nɛɛ, kɑ ɡem i ɡobi wɑ, i dukiɑ bɑkɑ ɡurɑ.
Kɔ̃sɑ ɡɑɑ sɑri ye sɔɔ. Bɛɛn sɔmburun ɑreyɑ.
10 Adɑmɑ nɛ, Gusunɔ nɑ sɑ̃ɑwɑ bɛɛn Yinni
sɑɑ mìn di i wɑ̃ɑ Eɡibitiɔ.
Kon mɑɑ de i wurɑ i n wɑ̃ɑ kuu bekuruɡinu sɔɔ
nɡe sɑnɑm mɛ nɑ bɛɛ yɑrɑmɑ Eɡibitin di i wɑ̃ɑ ɡbɑburɔ.
11 Nɛn sɔmɔbɑ nɑ kɑ ɡɑri kuɑ kɑ̃sinu sɔɔ,
kpɑ be, bu mɑɑ kɑ bɛɛ ɡɑri ko.
Beyɑ bɑ mɑɑ bɛɛ nɛn himbɑ sɔ̃ɔsi yɑ kɑ ɡisɔ ɡirɑri.
12 Kɑ mɛ, Gɑlɑdiɡibu bɑ kuɑ tɔn kɔ̃sobu.
Mɑ bɑ koo kɑm ko.
Bɑ rɑ kɛtɛ kinɛ dɑbinu ɡo Giliɡɑliɔ.
Adɑmɑ ben yɑ̃ku yenu nu koo ko kpee subenu ɡbɑɑnun kpĩi sɔɔ.
13 Yɑkɔbu u kpikiru dɑ Arɑmuɔ.
Miyɑ u sɔmburu kuɑ u yɑ̃ɑnu kpɑrɑ u kɑ kurɔ wɑ.
14 Adɑmɑ sɔmɔ ɡoowɑ Yinni Gusunɔ u ɡɔrɑ
u dɑ u win bweseru Isirelibɑ yɑrɑmɑ Eɡibitin di.
Sɔmɔ wiyɑ u bu kpɑrɑ.
15 Adɑmɑ yenibɑ kpuro sɔɔ,
Isirelibɑ bɑ Yinni Gusunɔ nuki sɑnkɑ too too.
Yen sɔ̃, u koo de yɛm mɛ bɑ yɑri mi, mu wɔri ben wiru wɔllɔ.
U koo de bu yen sekuru wɑ.
Siri dɑ̃ɑki bi bɑ Isirelibɑ kuɑ