68
Vishipa vu lyaꞋi va aza a Isaraila
Kadanshi a kubana u vuza vu kelime vi ishipa: A yaꞋan vu ɗa n ka̱la̱ka̱tsu ka <<Lili>> Vishipa vu Dawuda.
1 YaꞋan Ka̱shile ka̱ ɗa̱nga̱,
yaꞋan irala i ni i wacuwa,
ka̱ta̱ aza a na a iwain ni, a suma e kelime ka̱ ni.
2 Tsu na ka̱nga̱ ka̱ tsu puwa̱nka̱,
yaꞋan vu zuwa le a̱ puwa̱nka̱ nannai.
Tsu na kabashi ki ishigi ke tsu derikpe akina,
yaꞋan una uma a gbani-gbani nannai e kelime ka̱ Ka̱shile.
3 Ama aza a usuɓi i ta̱ a kuyaꞋan ma̱za̱nga̱,
ka̱ta̱ a̱ za̱nga̱na̱ e kelime ka̱ Ka̱shile.
YaꞋan a pana uyoꞋo ka̱u.
4 Cananai ishipa u Ka̱shile,
yaꞋin ishipa i kucikpa kula ku ni,
lapulai uye adama a̱ ni, vuzana wi e ku wala eleshu.
Kula ku ni ku ɗa Vuzavaguɗu,
i za̱nga̱na̱ e kelime ka̱ ni.
5 Ka̱shile vuza na wi a ida̱shi a̱ ubuta̱ u ciɗa u ni,
esheku a mkpaꞋan a ɗa,
n ke eri ka agapa a̱ma̱ci.
6 Ka̱shile ke ci neke ta̱ aza a na i a ida̱shi endeꞋin iꞋuwa,
u tsu utuka̱ ta̱ aza a ugbashi a kubana a̱ ubuta̱ wu ida̱shi i ba̱ri.
Ama aza a ugbamiwasuvu,
i ta̱ a̱ kuda̱sa̱ngu a iɗika i na yi lekeɗi.
7 Ka̱shile, ana vu uta̱i e kelime ka uma a̱ nu,
ana vu walai a̱ ka̱pula̱ka̱,
Kuvuka
8 aduniya a̱ gba̱ɗa̱i
ɗa gaɗi u tuka̱i n mini,
ali n kusan ku Sinai ku gba̱ɗa̱i,
e kelime ka̱ Ka̱shile ki Isaraila.
9 Ka̱shile vu yoꞋi mini ma̱ a̱bunda̱i,
a iɗika yi uka̱ni i nu,
vu bonokoi ka̱pula̱ka̱ ubuta̱ u tsuta̱.
10 Ta ɗe uma a̱ nu a̱ da̱sa̱ngi,
Ka̱shile, vu yaꞋankai aza a unambi kasingai.
11 Vuzavaguɗu u nekei kadanshi,
ka̱kuma̱ ka̱ a̱ma̱ci ka na ka salai ukuna wa ki ta̱ n a̱bunda̱i.
12 <<Ngono mo osoji n sumai kpakaru.>>
A̱ma̱ci a na i a iꞋuwa e peciki ucanuku u na a̱ pura̱i gbani.
13 A̱ɗa̱ na i tsu asa a ushiga wu nlala,
yi ta̱ a kufuɗa kupala ka̱ci ka̱ ɗa̱,
tsu na evelyu o moɗoi a tsu pala yi,
n ucanuku wa azurufa n azanariya a kutasa.
14 Makyan ma na MalaꞋimili dem,
u zuwai ngono a iɗika,
yaꞋan egele sa̱ruwa̱ a kusan ku Zalimonu.
15 Avu kusan ku gbayin, kusan ku Bashan,
kusan ku ugaɗi, kusan ku Bashan!
16 Yiɗa̱i i zuwai avu kusan ku ugaɗi,
vi o kugoyo kusan ku Ka̱shile?
Kusan ku na Ka̱shile ki a mali,
adama a̱ ubuta̱ wu ida̱shi i ni,
ta ɗe Vuzavaguɗu u kuda̱sa̱ngu ko wannai.
17 Ekeke odoku o kuvon a̱ Ka̱shile
a laꞋa ta̱ ku kece,
a̱kpa̱n-a̱kpa̱n.
Vuzavaguɗu u ta̱wa̱i n e le,
a kusan ku Sinai ubuta̱ u ciɗa u ni.
18 Vu gaɗukpai gaɗi,
vu tonoi n ka̱bunda̱i ka agbashi a na vu ka̱na̱i,
a ku isa kuneꞋe kakau a̱ ubuta̱ uma,
ali aza a ugbamiwasuvu,
adama a na avu Vuzavaguɗu Ka̱shile vu kuda̱sa̱ngu ɗe.
19 Una̱singai u Vuzavaguɗu,
a̱yi na u ci ɗika a̱miki a̱ tsu a kanna dem,
a̱yi ɗa Ka̱shile vuza na u wawai tsu.
Kuvuka
20 Ka̱shile ka̱ tsu, Ka̱shile ka wishi kaꞋa,
a̱yi ɗa Vuzavaguɗu, Vuzavaguɗu vu tsu,
vuza na u tsu zuwa tsu laꞋaka a̱ ubuta̱ wu ukpa̱.
21 Mayun Ka̱shile ki ta̱ o kuɓoso aci a irala i ni,
n okolokolo aza a na a gbagbalai kutono uye wu unushi u le.
22 Vuzavaguɗu u danai, <<Mi ta̱ a̱ kuta̱wa̱ n irala a Bashan,
mi ta̱ a̱ ku kuta̱wa̱ n ele a mala ma uga̱vi.
23 Adama a na i wala a gaɗi va even a ikyamba irala i ɗa̱,
nsheꞋe n ɗa̱ feu m peɗe mpasa tsu na a cigai.>>
24 Ka̱shile uma ene ta̱ nwalu n nu mu ulyaꞋi,
nwalu n Ka̱shile ka̱ va̱, mogono ma̱ va̱, a kubana ubuta̱ u ciɗa.
25 Aza a ishipa e kelime,
aza a tsuwaꞋi tamkpamu ka̱ca̱pa̱,
e mere me le nkere a ku waꞋa nka̱la̱.
26 <<Cikpai Ka̱shile a̱ ka̱tsuma̱ ko koɓolo ka uma,
cikpai Vuzavaguɗu a̱ ɗa̱ aza a Isaraila.>>
27 Kumaci ku Bayami, ku na ku laꞋi n kenu ele ɗa kelime,
aza e kelime a Yahuda tankpamu n ka̱tsura̱ ke le,
ɗa aza e kelime a Zabalun n aza a Nafutali o kutono le.
28 Ka̱shile, ɗa̱ngusa̱ utsura u nu,
Ka̱shile yotsongu utsura u nu adama a̱ tsu,
29 A̱Ꞌisa̱ a gbayin a̱ nu a Urushelima.
Ngono mi ta̱ a̱ kutuka̱ wu n kuneꞋe.
30 Ɓarangu nnama n na mi a̱ ka̱ga̱Ꞌin ka̱ mini,
ɓarangu uduniyan u na u buwai,
koɓolo ko obomburon nu ndendem n le.
Ali a̱ kuɗa̱ngu ka̱ta̱ e neke wu azurufa e le,
vu wacuwa uduniyan,
u na u tsu ciga kuvon!
31 Anan taji uta̱i a Masar,
aza a Itopiya i ta̱ a̱ ku ɗa̱ngusa̱ ekiye e le gaɗi u Ka̱shile.
32 Cananai ishipa u Ka̱shile, a̱ɗa̱ tsugono tsa aduniyan,
yaꞋin ishipa i kucikpa Vuzavaguɗu,
Kuvuka
33 a̱yi vu na u kumbai gaɗi vu a̱da̱nga̱shile a ayain a cau,
zuwakai n ka̱la̱ka̱tsu ka utsura ka̱ ni.
34 Salai utsura u Ka̱shile,
vuza na tsugbayin ci ni ci a Isaraila,
vuza na utsura u ni wi a gaɗi vu eleshu.
35 Ka̱shile ili i wovon i ɗa a ubuta̱ u ciɗa u ni,
Ka̱shile ki Isaraila,
ki ta̱ e kuneke utsura a uma a̱ ni.
Una̱singai u Ka̱shile.