19
Ulinga u Ka̱shile n afada a̱ ni
Kadanshi a kubana u vuza vu kelime vi ishipa: Vishipa vu Dawuda.
1 La̱na̱ biꞋi tsu na gaɗi a̱da̱nga̱shile i a kusala tsugbayin tsu Ka̱shile,
la̱na̱ biꞋi kpamu tsu na eleshu i o kuyotsongu ulinga u na u yaꞋin e keteshe.
2 Kanna dem ka tsu dana ta̱ kanna ke ire tsugbayin ci ni,
kayin dem ko tsu tonuko ta̱ kayin ke ire kuyeve ku ni.
3 Babu ka̱la̱ka̱tsu ko kadanshi ka na a dansai,
babu ka̱la̱ka̱tsu ka na a panai.
4 Ama akaka e le a̱ ka̱ra̱Ꞌa̱ ta̱ aduniyan dem,
kadanshi ke le ka̱ ka̱ra̱Ꞌa̱ ta̱ a̱ ubuta̱ dem aduniyan.
Ka̱shile ka yaꞋanka ta̱ kanna kpaꞋa ɗe gaɗi,
5 Kuta̱ ku kanna ki ta̱ tsu vali vu savu a̱ ku uta̱ a̱ kunu ku ni,
n ma̱za̱nga̱ tsu vuza vu na u ciya̱i ulyaꞋi a ugulani u malamanai.
6 U tsu uta̱ ta̱ a uteku wa̱ a̱da̱nga̱shile,
ka̱ta̱ u ka̱ra̱Ꞌa̱ a kubana a kapashi ka nan ɗe,
ko ili i kusheɗeku adama a usuɗukpi u ni ba.
7 Wila̱ u Vuzavaguɗu wi ta̱ derere,
u tsu bonoko ta̱ wuma u savu.
Kadanshi ka Vuzavaguɗu ili i kutono i ɗa,
ke tsu neke ta̱ kuyeve u vuza na wi n kuyeve ba.
8 Wila̱ u Vuzavaguɗu wi ta̱ mejege,
u tsu tuka̱ ta̱ m ma̱za̱nga̱ a̱ ka̱ɗu.
Kadanshi ka Vuzavaguɗu,
ki n kadama ke kuyeve ba,
ka tsu zuwa ta̱ ka̱ɗu kuyeve.
9 Wovon u Vuzavaguɗu u tsu zuwa ta̱ ka̱ɗu ko yongo ciɗa ko wannai.
Wila̱ u Vuzavaguɗu mayun ɗa,
makyan dem wi ta̱ mejege.
10 U laꞋa ta̱ azanariya ugaꞋin,
ali a laꞋi azanariya a na a̱ luwa̱i koci,
a laꞋa ta̱ ishigi uyoꞋo,
ali a laꞋi ishigi i na a pishai.
11 We e le u ɗa kagbashi ka̱ nu ka̱ tsu ciya̱ odoki,
kutono ku wila̱ ki ta̱ n katsupu ka̱ a̱bunda̱i.
12 Yayi u kuyeve unushi u ni?
Cinukpaka mu unushi u na n yevei n e le ba.
13 Ere mu ka̱ta̱ n yaꞋan unushi wu ucigi u ka̱ɗu ba,
ka̱ta̱ vu ka̱sukpa̱ lyaꞋaka mu tsugono ba.
Ta m ko okpo vuza vu babu unushi nannai,
ka̱ta̱ n laꞋaka n kuyaꞋan ka gbani-gbani.
14 YaꞋan kadanshi ka̱ va̱ n kusheshe ku va̱,
ko okpo ili i ku isa wa̱ a̱ nu,
Vuzavaguɗu, ubuta̱ u kusheɗeku u va̱ n ka̱shibi ka̱ va̱.