58
Kuka̱na̱ ku una̱ ku mayun
1 Vuzavaguɗu u danai, <<Shika̱i n kacaꞋa, ka̱ta̱ i kpa̱ɗa̱ ba,
ɗengusa̱i a̱la̱ka̱tsu a̱ ɗa̱ adanshi ishari ɗa.
Dansukai uma a̱ va̱ adama a ugbamukaci u le,
ka̱ta̱ kpamu i sala ukuna wu unushi u kpaꞋa ku Yakubu.
2 O ci yongo ta̱ a kucikpa mu ayin tutu
ka̱ta̱ kpamu o yongo a̱ ma̱za̱nga̱ ma na e yeve nwalu n va̱,
adanshi uma o yoku a ɗa a na i ishi i ci yaꞋan ukuna u singai
ɗa kpamu a̱ kpa̱ɗa̱i kuka̱sukpa̱ wila̱ u Ka̱shile.
E ci ece mu ta̱ ciya̱ m ɓa̱nka̱ le n afada a mayun
ɗa kpamu u yaꞋin adanshi i ta̱ a̱ ma̱za̱nga̱ ma na a̱ ta̱wa̱ a cikpa Ka̱shile.
3 A danai, <Yiɗa̱i i zuwai ɗa tsu ka̱na̱i una̱,
ɗa Vuzavaguɗu u kpa̱ɗa̱i ku cikpa i na ci yaꞋin?
Ci nekei ikyamba i tsu atakaci,
ama vu kpa̱ɗa̱i kucoꞋoko?>
Vuzavaguɗu wu ushuki, <<La̱na̱i, a kanna ka na i kuka̱na̱ una̱, i ci yaꞋan ta̱ tsu na u yokpoi ɗa̱
ka̱ta̱ i takacika aza a ulinga ɗa̱ ra̱ka̱.
4 La̱na̱i, i ka̱na̱ ta̱ una̱ koci
ka̱ta̱ i yaꞋan kanananai n vishili ka̱ta̱ i lapanai n a̱kun a gbani-gbani.
Yi a̱ kuka̱na̱ una̱ tsu na i yaꞋin anana,
ka̱ta̱ i ciga a pana a̱la̱ka̱tsu a̱ ɗa̱ na ɗe gaɗi ba.
5 IcuꞋu i kuka̱na̱ ku una̱ ku nampa ku ɗa n zagbai,
kanna ke te koci adama a na vuma u bono u goyo ka̱ci ka̱ ni?
A kanna ka ɗaɗa u kuja̱lika̱ kaci ka ni tsu nkoru,
ka̱ta̱ kpamu u vaku n akashi o kokomo?
Na ɗa ili na vu ɗekushei kuka̱na̱ ku una̱,
kanna ka na Vuzavaguɗu wu ushuki n kaꞋa?
6 <<Na ɗa kuka̱na̱ ku una̱ ku na n zagbai,
adama na i shikpa aza a na i atakaci,
ka̱ta̱ kpamu i cipuka̱ a̱miki a na i e eɗeku a uma,
i zuwa aza a na i a̱ ka̱tsuma̱ ka atakaci a̱ ba̱ruwa̱,
ali i koɗo kaburakpatsu ka atakaci u uma
7 Pece ilikulyaꞋa i nu n aza a kambulu,
ka̱ta̱ kpamu i tuka̱ n aza a na i n iꞋuwa ba, a iꞋuwa i ɗa̱,
ve ene baci vuza koshomboɗi, pala yi,
ka̱ta̱ vu sokongu a̱shi a̱ nu a̱ ubuta̱ u vuza nu ba.
8 I yaꞋan baci nannai, kutashi ku ɗa̱ ki ta̱ a kakana tsu wakani wu usana,
ka̱ta̱ kpamu usa̱n u ɗa̱ u ta̱na̱ gogoꞋo,
kasingai ka̱ ɗa̱ ki ta̱ a kuwala n a̱ɗa̱,
ka̱ta̱ wishi u Vuzavaguɗu wo okpo ili i na i kinda ɗa̱ mayin.
9 Ka̱ta̱ gogo na i ɗeke, Vuzavaguɗu wi ta̱ a̱ kushuku ɗa̱,
I shika̱ adama a na u ɓa̱nka̱ ɗa̱, wi ta̱ ta na a kudana, <Mpa ɗa na.>
<<I ka̱sukpa̱ baci a̱miki a ukuna u gbani a na i caniki,
n ukuna u masapangbanai ma̱ a̱jivu koɓolo n kuyaꞋan ku kadanshi ka kavama,
10 ɗa baci i bonokoi ka̱ci ka̱ ɗa̱ tsa aza a kambulu
ɗa kpamu i ɓa̱nka̱i aza a na i o kusoꞋo atakaci,
kutashi ku ɗa̱ ki ta̱ a kakana a̱ ubuta̱ u ka̱yimbi,
ka̱ta̱ ka̱yimbi ka na ki ɗevu n a̱ɗa̱ kokpo an kutashi ku kanna.
11 Vuzavaguɗu wi ta̱ a kinda ɗa̱ ayin dem,
wi ta̱ e kuneke ɗa̱ ili na i cigai a ubuta̱ u na u canai ba,
ka̱ta̱ kpamu u dokusu ikyamba i ɗa̱ utsura.
Nannai wi ta̱ a kuzuwa yo okpo an kashina ki ishiꞋwan ka na ka̱ ciya̱i kuta̱nu mayin, n uteku tsu kuyene ku na mini ma̱ ni ma̱ tsu kpa̱ɗa̱ kuɗekpe.
12 Yi ta̱ a kumaꞋasaka likuci i cau i ɗa̱ i na yi ishi yo okpoi agali,
yi ta̱ a̱ kuɗa̱ngusa̱ kumi ka aza a na ishi lo ali n tsumani,
ka̱ta̱ kpamu e ɗeke ɗa̱ Alapuli a Nshilya n na m ɓosoi,
koɓolo n Alapuli a Uye a̱ ubuta̱ u na uma a̱ tsu da̱sa̱ngu.
13 <<I ka̱na̱ kanna ka Ashibi adama a na kokpo ciɗa,
i ka̱sukpa̱ kutono mali ma̱ ɗa̱ a kanna ka nanlo,
ama i kucukpa i pana uyo u kanna ka Ashibi ka, ka̱ta̱ i dansa ukuna u kaꞋa n a̱ɗu a̱ ɗa̱ a̱ ma̱za̱nga̱ tsu
kanna ka ciɗa ka Vuzavaguɗu.
I cikpa kanna ka Ashibi ka n ili i na i kuyaꞋan a kanna ka nanlo dem,
ka̱ta̱ i tono mali ma̱ ɗa̱ ko i dansa ukuna u kavama ba,
14 nannai ɗa i kuciya̱ ma̱za̱nga̱ ma̱ ɗa̱ a̱ ubuta̱ u Vuzavaguɗu,
ka̱ta̱ kpamu n zuwa ɗa̱ i yongo ubuta̱ u ɓati wi iɗika i gaɗi koɓolo n ka̱ɗiva̱ ɗe ubuta̱ wa agadu wa̱ esheku a̱ ɗa̱ Yakubu.>> Vuzavaguɗu ɗa u dansai nannai n una̱ u ni.