57
1 Vuma vu usuɓi u tsu geshe ba,
ama babu vuza na u keɓecei,
a̱ pura̱ ta̱ aza a usuɓi ra̱ka̱,
ama babu vuza na u yevei.
Mayun a yaꞋan ta̱ nannai
adama a na e pece le a̱ ubuta̱ u kuyaꞋan ka gbani-gbani.
2 Aza a na a walai derere i ta̱ o
kuyongo m ma̱ta̱na̱,
i ta̱ kpamu a̱ kuciya̱ wuvuki a ayin a na baci a̱ kuwa̱i.
3 <<Ama a̱ɗa̱ ta̱wa̱i na,
a̱ɗa̱ muku mo olobo mo oboci, a̱ɗa̱ ntsukaya ma aza a tsugbani koɓolo n ashakanlai.
4 Yayi yo o kuzoꞋosoko?
Yayi i ɓa̱yuwa̱ka̱i una̱ ɗa kpamu
yi a̱ kumeɗeke una̱?
Ashe a̱ɗa̱ muku mu ugbamukaci n ɗa yi ba?
Kumaci ka aza a aꞋuwa?
5 Yi a kucikpa a̱ma̱li a̱ ɗa̱ m mali ma gbani-gbani
asuvu a nɗanga n oku koɓolo n ubuta̱ wu nɗanga n na n kimba̱i dem,
ɗa i kiɗai muku n ɗa̱
punu a̱ a̱ra̱Ꞌa̱ n angu a akpanlai.
6 Vi ɗikai atali a ugbori a̱ ka̱ra̱Ꞌa̱ ɗa vu bonokoi a ɗa a̱ma̱li o kutono a̱ nu,
ele ɗa i na vi ciya̱i.
Mayu, we le u ɗa i nekei kuneꞋe ki ili kusoꞋo
koɓolo n kuneꞋe ki ili i kashina.
Ɗa i kudana m pana uyoꞋo ba?
7 Gaɗi ɗe zuva a kusan ku leku ɗa vu poloi ɗe kajiba ka̱ nu,
ɗa vu banai ɗe a̱ ubuta̱ wa adama a na vi yaꞋan alyuka a̱ nu.
8 A̱ kucina̱ ku utsutsu u nu koɓolo n iga̱Ꞌin a̱ utsutsu a̱ nu a
ɗa vu zuwai ɗe urotu wa̱ a̱ma̱li a̱ nu dem.
Vu ka̱sukpa̱i mu ɗa vu vaki a kajiba koɓolo n a̱ma̱li a unata a nanlo,
ɗa vu nekei ka̱ɗu ka̱ nu we le,
ɗa vi yongoi a kucikalasa
vi inda ciyampa ci le.
9 Vu banai u ka̱ma̱li Moleki m maniꞋin ma zaitu
ɗa kpamu vu doki ili i ma̱gula̱ni i nu.
Vu suki alingata a̱ nu daꞋin,
ɗa avu a̱ ka̱ci ka̱ nu vu cipa̱i a̱ ubuta̱ wa asaun.
10 Vo oꞋusoi ka̱ci ka̱ nu n ukuna u kutoni u nu dem,
ama vu dana, <Mo oꞋwo ta̱ ba>
Vu ciya̱ka̱i ka̱ci ka̱ nu utsura u savu,
ɗaɗa ta na vu kpa̱ɗa̱i kuka̱sukpa̱.
11 <<U yayi vi e kujeꞋeke ikyamba n wovon,
ali ɗa vi yaꞋankai mu aꞋuwa,
ɗa kpamu vi cinukpai nu mpa
ɗa vu kpa̱ɗa̱i kuciɓa nu mpa.
Adama a na n yaꞋan ta̱ megeshe mpa bini?
i ɗaɗa i zuwai ɗa i kpa̱ɗa̱i kupana wovon u va̱?
12 Mi ta̱ a̱ ku uta̱ka̱ usuɓi u nu n i na vi yaꞋansai e keteshe,
ama i ɗa yi o kudoku wu ili ba.
13 Ayin a na baci vu lapai una̱ adama a̱ uɓa̱nki,
yaꞋan a̱ma̱li a na vu ɓolongi va a isa wu.
Wunla̱i wi ta̱ a ɗika le ra̱ka̱,
ka̱ta̱ ayinviki feu a̱ pura̱ngu le.
Ama a̱yi na u la̱nsa̱i ubuta̱ u kusheɗeku wa̱ va̱,
wi ta̱ a̱ kuka̱na̱ iɗika ya yo okpo i ni
ka̱ta̱ kpamu wo okpo vuza na u kuka̱na̱ kusan ku ciɗa ku va̱.>>
Ka̱shile ka cinukpakai aza unushi
14 Ka̱shile ka danai,
<<Lapulai, lapulai, lapulai uye mayin.
Takpai a̱guli a na i lo a uye u uma a̱ va̱ dem.>>
15 Na ɗa ili i na vuza na wi a̱da̱nga̱shile n ucikpi,
a̱yi na wi n wuma ko wannai, vuza na kula ku ni ki ciɗa u danai.
<<Mi ta̱ ida̱shi na gaɗi n ubuta̱ u ciɗa,
koɓolo kpamu n uma a na i n ka̱ɗu yuwu babu a̱ra̱ɗi,
adama a na n zuwa aza a na i n una̱mgbi wa̱ a̱tsuma̱ e reme a̱ɗu
ka̱ta̱ kpamu n dokusu aza o yoku utsura wa̱ a̱ɗu.
16 Mpa mi a kulyaꞋa kelime n kushila̱ka̱ n a̱ɗa̱ ba,
ko n yongo a wupa ayin tutu,
nannai wi ta̱ a kuzuwa ka̱ɗu ka vuma kuyongo ulimi a̱ kuta̱wa̱ wa̱ va̱,
ayinviki a vuma a na mpa n yaꞋin n ekiye a̱ va̱.
17 N yaꞋin wupa adama a̱ unushi u ni,
n takacikai ni ɗa kpamu n zuwakai ni kucina̱ adama a wupa,
ama n nannai dem u lyaꞋi kelime n kuyaꞋan ili i kavama i ni.
18 Mpa mene ta̱ nwalu n ni,
ama mi ta̱ o kupotsotongu yi, mpa n kutono ta̱ n a̱yi ka̱ta̱ m bonoko yi n ida̱shi i ma̱ta̱na̱,
19 a̱ kutuka̱ n kadanshi ka kucikpa Ka̱shile a̱ una̱ u le.
YaꞋan a̱ ciya̱ ma̱ta̱na̱ ma̱ a̱bunda̱i, ali na ɗe a̱ mpulu n ɗevu dem,>>
Vuzavaguɗu u danai, <<Mpa n kupotsotongu le ta̱.
20 <<Ama aza a na a ci yaꞋan ili i wuya i ta̱ tsu mala ma na mo ci yongo a kuvuzukpa,
babu kupaɗa bini,
aɓau a̱ ni a̱ tsu utuka̱ ta̱ n kolyon koɓolo n cilili.
21 Ka̱shile ka̱ va̱ ka danai, <<Ma̱ta̱na̱ mi lo adama a vuza vu kawuya ba.>>