15
Pirato ẽpataka Jezu ehtopõpyry
(Mat 27.1-2,11-14; Ruk 23.1-5; Jo 18.28-38)
1 Morarame ẽmepyryme tõximõse toto Ritonõpo maro oturuketõ tuisary tomo te, juteu tamuru tõ maro te, Moeze omihpyry warõkõ maro, enara. Pata esã maro tõturuse toto tynyrirykõ waro toehtohkõme. Mame Jezu tymyhpose toto a, arotohme kowenu tuisary a, Pirato a.
2 Mame Pirato tõturupose Jezu a,
—Juteu tõ tuisary hmahno? tykase ynororo eya.
—Ỹ, ywy ase, tykase Jezu.
3 Mame Jezu tyhxirose tuhke Ritonõpo maro oturuketõ tuisary tomo a.
4 Naeroro Pirato tõturuzomopose ropa eya,
—Oty katoh toto onezuhpyra mah ohxiroryke toto a? tykase eya Pirato.
5 Yrome onezuhzomopyra Jezu kynexine. Morara kaxĩpo tyya Pirato toemynyhmase tozuhzomopyra Jezu exiryke.
Jezu ekarotopõpyry aorihmapotohme
(Mat 27.15-26; Ruk 23.13-25; Jo 18.39–19.16)
6 Morarame ãpuruhpyry tao tuhke ẽmapotyã kynexine. Mame otuhtoh konõto ae toine emapotyã tũtanohposene kowenu, jeimamyry punero, imoihmãkõ omi poe.
7 Kowenu zehno aehtyã roropa tõmapose kynexine ãpuruhpyry taka, ahno etapahpõkomo. Toiro esety Parapa kynexine.
8 Imyhpokary poko oturuse tõximõse imoihmãkõ ahtao Pirato ẽpataka,
9 ynara tykase Pirato eya xine, tõturupose,
—Juteu tõ tuisary myhpokapory se hmatou ya? tykase ynororo eya xine.
10 Tuaro kynexine ynororo. Jezu tapoise Ritonõpo maro oturuketõ tuisary tomo a ekarotohme eya zumoxike toexirykõke. Moro waro Pirato kynexine.
11 Mame Ritonõpo maro oturuketõ tuisary omi poe Parapa tũtanohpory se toehse imoihmãkomo.
12 Morarame tõturupose ropa Pirato eya xine,
—Otara mokyro juteu tõ tuisary ripõko hano? tykase ynororo eya xine repe.
13 Opore tozuhse ynororo eya xine. Kui tykase toto,
—Wewe pokona exixihmapoko! tykase toto.
14 —Oty katohme? Azahkuru pyra mana. Iirypyryme pyra roropa mana, tykase Pirato eya xine.
Oporehxo tozuhse ynororo eya xine. Kui tykase rokẽ toto,
—Wewe pokona exixihmapoko! tykase toto.
15 Mame imoihmãkõ ãkyemapory se Pirato exiryke, Parapa tutũtanohpose ropa eya. Mame Jezu typipohpose Pirato a. Moromeĩpo tokarose ynororo soutatu tomo a aorihmapotohme.
Jezu eunohtopõpyry soutatu tomo a
(Mat 27.27-31; Jo 19.2-3)
16 Morarame Jezu tarose soutatu tomo a jarakapyhpyry aka, (kowenatu tapyĩ kurã taka). Moro taka roropa imehnõ soutatu tõ toahmase. Tuhke oximõme toehse toto.
17 Mame Jezu tupohtose eya xine ezuezumã ke. Parimã sã tyrihpyry omoxino tyrise roropa eya xine Jezu zuhpokoxi.
18 Morarame taomikase eya xine.
—Moehno tamuxi. Juteu tõ tuisaryme exikehpyra mase, tykase toto Jezu a.
19 Tymerehtãtãmase toto a zupuhpyry pokona wewe pitiko ke. Ituh tykase toto Jezu pona. Mame ẽpataka tosekumurukõ po typorohse toto. Atahmãkãko rokẽ toh kynexine.
20 Morotoino ihtomakehxĩpo tupokase ropa eya xine. Ezuezumã touse ropa eya xine. Zupõ ro tamurupose ropa eya xine. Morarame tarose rahkene eya xine wewe pokona exixihmatohme.
Exixihmatopõpyry wewe pokona
(Mat 27.32-44; Ruk 23.26-43; Jo 19.17-27)
21 Mame imepỹ tapoise eya xine, wewe arotohme eya, exixihmatoh arotohme. Mokyro esety Ximão kynexine. Tupito poe pata pona ytõko kynexine repe. Xirenepõ kynexine. Ipoenõ Arexãtere kynexine Rupo maro. Mame wewe tarose eya, Jezu exixihmatopo, soutatu tõ naropohpyry.
22 Mame Jezu tarose eya Koukota pona. (Upuhpõpo esary, “Koukota,” kary.)
23 Morarame uwa epery ke Jezu tauhpase repe, toximase mira maro, karapa sã itũnety maro. Yrome onẽpyra kynexine ynororo.
24 Mame wewe pokona toxixihmase rahkene. Mame zuponỹpyry tapiakase eya xine, tupõkõme. Topu pisarara tomase eya xine upo apoitohme tyya xine.
25 Xixi tõnuhsehxo ahtao Jezu toxixihmase wewe pokona eya xine.
26 Morarame ynara tymerose Jezu exixihmatoh pokona, “Juteu tõ tuisary mosero,” katoh tymerose ipokona.
27 Morarame omato tõ toxixihmase roropa Jezu maro, asakoro, apotunuru wino, ipoozery wino, enara.
28 (Pake Ritonõpo nymeropohpyryae ro Jezu poko, “Pohnõ maro zuanohpõko toto,” katopõpyryae ro.)
29 Morarame tõsenuhnuhmase osemae ytoketomo. Jezu tounohse eya xine. Ynara tykase toto,
—Ehẽ! Otara ahtao Ritonõpo maro oturutoh kararahnõko mah? Otara ahtao imyakãmãko ropa mah oseruao tõmehse ahtao?
30 Moro waro awahtao oenupunako roropa. Eropa, wewe poe oyhtoko ropa! tykase toto.
31 Mame Ritonõpo maro oturuketõ tuisary a roropa Jezu tounohse, Moeze omihpyry warõkomo a roropa. Ynara tykase toto,
—Imehnõ poko toenupunase ynororo repe. Oty katoh tõsepynanopyry waro pyra nae?
32 Ekuhko ke, oyhtoko ropa morotoino. Ritonõpo nymenekahpyryme awahtao oyhtoko ropa, juteu tõ tuisaryme awahtao. Tyhtose ropa awahtao oenetupuhnõko ynanase, tykase toto eya.
Morarame imaro exixihmatyamo a roropa tounohse ynororo.
Jezu orihtopõpyry
(Mat 27.45-56; Ruk 23.44-49; Jo 19.28-30)
33 Morarame tãxiahtao tyarumãkapose Ritonõpo a pata tõ punero. Mame xixi tyhtosehxo ahtao tõmehse ropa.
34 Morarame opore Jezu tykohtase. Ynara tykase ynororo,
—Eroi, Eroi, rema sapahtani, tykase. Tõmiryae morara kary ynara katopo, “Ritonõpo, Ritonõpo oty katohme kurumekano?” katopo.
35 Mame enenanõ ikui etaryke tyya xine, ynara tykase toto,
—Etatoko ke! Eria kohmãko mana, tykase toto.
36 Mame imepỹ axĩ tururume toytose mauru panõ zumyhkase ikatainety aka. Wewe pitiko pokona tyrise eya Jezu ohpatohme.
—Seraximatone. Senetone. Otarãme Eria oehnõko mana mose ouse wewe poe, tykase toto, tõturuse.
37 Morarame Jezu kui tykazomose ahtao komih tykakehse. Toorihse rahkene.
38 Morara ahtao ãpuruhpyry toexihkase Ritonõpo maro oturutoh tao, kamisa risemy. Kaino toexihkase zuhkurenaka.
39 Morarame soutatu tõ esẽ Jezu ẽpataka kynexine. Jezu a komihkakepyry eneryke tyya ynara tykase ynororo,
—Ajohpe pyra ro rukuh Ritonõpo mũkurume nexiahse, tykase ynororo.
40 Morarame nohpo tõ moroto kynexine amekeino rokẽ enẽko, Maria Matarena te, Sarome te, Maria Tiaku eny, enara toh kynexine. Tiaku, Joze, enara mokyro poenõ kynexine.
41 Mokaro a Jezu tokahmase akorehmase orihpyra ro ahtao, Karirea poro ahtao. Tuhke roropa nohpo tõ moroto kynexine, ytoketomo Jezu maro Jerusarẽ pona.
Zonẽtopõpyry
(Mat 27.57-61; Ruk 23.50-56; Jo 19.38-42)
42 Morarame kokonie pukuro otuhtoh riryhtao, oserematoh pyra ro ahtao roropa Joze a tunõkase Pirato.
43 Eya toytose Jezu ekepyry ekaropose. Joze Arimateapõ kynexine, imehnõ tuisaryme exikety kynexine. Ritonõpo omipona exikety roropa kynexine.
44 Mame Pirato a tozuhse,
—Ajohpe pyra rukuh norihno? tykase ynororo. Soutatu tõ esẽ tonehpose tyya tõturupotohme Jezu orihtopõpyry waro toehtohme.
45 Mame turuse tahtao eya Jezu orihtopõpyry waro toehse Pirato.
—Ekepyry arotoko, tykase ynororo Joze a.
46 Morarame kamisa karimutumã topekahse eya Jezu ekepyry zõtotohme. Touse ahtao wewe poe tyõtose eya topu eutary risẽ aka tyritohme. Morarame topu parihmã ke okepy ẽ tapuruse eya.
47 Mame Jezu ẽmary tonese nohpo tomo a Maria Matarena a, Maria a roropa Joze eny. Enara toh kynexine enenanomo.