20
“Onoky omi poe urutõme mah?” katopõpyryjuteu tomo a
(Mat 21.23-27; Mak 11.27-33)
1 Morarame Ritonõpo maro oturutoh tao Jezu kynexine, morotaõkõ amorepãko Ritonõpo omiry kurã poko. Mame Ritonõpo maro oturuketõ tuisary tõ tooehse eya Moeze omihpyry warõkõ maro, tamuximãkõ maro.
2 Ynara tykase toh eya,
—Onoky omi poe moxiã amorepãko mah? tykase toto. —Onoky omi poe mokaro maropoase ropa sero tapyi tahe, tokykõ ekamonanomo? Yna zuruko, tykase toto Jezu a.
3 Ynara tozuhse toto Jezu a,
—Morararo toiro joturupory se ase oya xine. Kuezuhtoko aporo.
4 Onoky omi poe ahno tõpurihkase João a? Ritonõpo omi poe? Ahno rokẽ omi poe? Kuezuhtoko, tykase Jezu eya xine.
5 Mame oxime rokẽ tõturuse toto. Ynara tykase toto,
—Otara ãkohxo keh sytatou? “Ritonõpo omi poe João toehse,” karyhtao kyya xine ynara ãko mana, “Morara ahtao oty katohme aomiry onenetupuhpyra matou?” ãko mã kyya xine.
6 Mãpyra, “Ahno omi poe rokẽ kynexine,” karyhtao kyya xine, kuetapatorỹko mã imoihmãkomo, Ritonõpo omi poe urutõme João ekaroryke eya xine, tykase toto oseya rokene.
7 Naeroro ynara tozuhse eya xine,
—Zuaro pyra ynanase. Onoky omi poe João toehse otarãme? tykase rokẽ toto Jezu a.
8 Mame ynara tykase Jezu eya xine,
—Morararo ase onekaropyra ase oya xine onoky omi poe morara ãko ha, tykase Jezu eya xine.
Uwa esary esã ehtopõpyry poko
(Mat 21.33-46; Mak 12.1-12)
9 Mame Jezu tõturuse typoko, toto osenetupuhtohme Ritonõpo omi poe toexiry poko. Ynara tykase ynororo eya xine,
—Tutupi po uwa tarykase ahno a. Morotoino tutupi tokarose imehnomo a eraseme toto ehtohme epery apiakatohme tyya. Morotoino myã toytose ynororo. Moroto ehse. Moroto ehse. Moroto ehse. Okynã moroto ehse.
10 Mame uwa epery ahpirãsasaka ahtao typoetory tonyohse eya tutupi pona ropa, erase zurutohme uwa epery apiakatohme. Mame ipoetory toytose morotona, pore, tupito pona. Yrome mokyro eneryhtao tyya xine typipohse eya xine. Mame tonyohse ropa rokẽ eya xine. Uwa epery anaropopyra tokurehse toto. Tomahpõke pyra taropose ropa ynororo eya xine.
11 Moromeĩpo typoetory imepỹ tonyohse ropa uwa esemy a. “Utupi pona ytoko. Uwa epery enehta jokurume,” tykase typoetory a repe. Mame toytose ynororo. Yrome morararo mokyro typipohse roropa eya xine. Tyyryhmase roropa eya xine. Mame tonyohse ropa eya xine tomahpõke pyra.
12 Moromeĩpo typoetory imepỹ tonyohse ropa esemy a. Mokyro roropa tyyryhmase erase tomo a pitiko rokẽ pyra. Mame tomapose eya xine tupito poe.
13 Mame ynara tykase tupito esemy tyya rokene, “Otara ãkohxo ke hano? Otarãme umũkuru nymyry enyohnõko ase. Ipyno ase ipunaka. Mame umũkuru eneryhtao eya xine otarãme zuno exĩko mã toto. Aomipona exĩko roropa mã toto,” tykase ynororo rahkene.
14 —Morarame tumũkuru tonyohse eya rahkene, tutupi pona. Toytose ynororo. Mame toeporehkase, pore. Yrome mokyro eneryhtao tupito erase tomo a, ynara tykase toto oseya rokene, “Moky kuesẽkõ mũkuru. Setapatone imõkomohpyry apoitohme kyya xine. Itupi roropa kutupikõme ehtohme,” tykase toto.
15 —Mame tomase ynororo eya xine tupito poe. Morarame totapase ipunaka eya xine. Toorihse roropa ynororo, tykase Jezu eya xine.
—Morara exiryke oty rĩko otarãme nae tupito esemy tutupi erase tõ maro? tykase Jezu, tõturupose.
16 Arypyra, tutupi pona ytõko mana. Erase tõ etapãko mana. Mame mokaro ajoajohpãkõ enahkaxĩpo, imehnomo a tutupi ekarõko mana eraseme toto ehtohme, tykase Jezu eya xine.
Morara kary etaryke tyya xine ynara tykase toto,
—Ko! Morara tokoh tyrĩko na Ritonõpo?
17 Mokaro eneryhtao ro ynara tykase Jezu,
—Morara exiryke ynara tymerose ypoko Ritonõpo omiryme,
“Moro topu turumekase tapyi rinanomo a.
‘Popyra mana,’ tykase toto oseya.
Typahse roropa eya xine repe.
Yrome inypapyhpyrykõ tapoise ropa eya xine kurãme kuhse exiryke.
Ipoe rokẽ tapyi jamihme mana,”
me tymerose Ritonõpo omiryme.
18 Naeroro moro topu pona aepukahpyry osexiõko mana. Yrome moro topu epukaryhtao ahno pona, mokyro akurihmõko mana. (Ywy topu pahsẽ sã rokẽ ase. Tuhkãkõ jenetuputyry se pyra. Popỹme sã jekarõko mã toto. Morara exiryke etuarimãko mã toto sero nono po. Mame sero etyhpyrypo toto enahkapõko Ritonõpo mana. Jũme etuarimaketõme exĩko mã toto, tykase Jezu eya xine.)
Jezu kuhtopõpyry kowenu epehmary poko
(Mat 22.15-22; Mak 12.13-17)
19 Morara kary etaryke tyya xine, Jezu apoiry se toehse toto, Moeze omihpyry warõkomo, Ritonõpo maro oturuketõ tuisary tõ maro. Typoko xine Jezu oturuto waro toh kynexine. Naeroro Jezu ryhmary se toehse toto. Yrome imoihmãkõ kurũke anapoipyra tokurehse toto.
20 Naeroro Jezu apoitoh eraximãko rokẽ toh kynexine. Enenanõ topehmase eya xine Jezu enekunohtohme repe.
—Kure sã oturutoko imaro. Oturupoko roropa eya. Mame yronymyryme aomiry etatoko. Otarãme azahkuru ynororo mana. Otarãme kowenu kerekeremãko mana. Morara ahtao kowenatu a ekarõko sytatose. Kowenatu omi poe rokẽ etapãko sytatose, tykase toto Jezu poko.
21 Morara exiryke enenanõ toytose Jezu ekahmase. Ynara tykase toto Jezu a,
—Amorepatõ mase, zae rokẽ yna amoreparyke oya. Imehnõ zuno pyra mase. Ritonõpo omiry zae ekarõko mase imehnomo a, tykase toto. Kure sã tõturuse toto eya repe.
22 —Toiro ekaropory se ynanase oya. Ynara ãko romano tomo, “Otinerũkõ apiakatoko ekarotohme yna tuisary konõto a, Seza a, ãko toto. Yrome oty zae na oya? Yna tinerũ epehmary Seza a?” Onepehmara yna exiry? Oty zae oya nae? tykase toto, tõturupose Jezu a.
23 Yrome ajoajohpe toto exiry waro Jezu kynexine. “Ukuhnõko matose,” tykase ynororo tyya rokene.
24 —Tineru enepotoko ya, tykase eya xine.
—Seny, tykase toh tonepose.
Mame ynara tykase Jezu,
—Onoky ekuhtopõpyry ipoko nah? Onoky esety roropa tymerose ipoko nah? tykase, tõturupose eya xine.
Ynara tykase toto,
—Romano tuisary konõto mose, Seza, tykase toto.
25 Mame ynara tykase Jezu eya xine,
—Seza kyryry ekarotoko Seza a. Yrome Ritonõpo kyryry ekarotoko Ritonõpo a, tykase Jezu eya xine.
26 Mame aomiry onezuhpyra toehse toto zae rokẽ exiryke. Jezu onyhxiropyra tokurehse toto imoihmãkõ rãnaka. Onyporemãkapopyra tokurehse toto. Naeroro mynyhme rokẽ toehse toto tõsenuruhkarykõke.
—To! tykase rokẽ toto.
Aorihtyã ẽsemamyry ropa poko sero
(Mat 22.23-33; Mak 12.18-27)
27 Morarame satuseu tõ tooehse Jezu a. Juteu tõ mokaro. Ynara ãko mã toto azahkuru, “Aorihtyã ẽsemãpyra ropa mana. Orihnõko rokene,” ãko toh mã repe. Ynara tykase toto Jezu a,
28 —Amorepatõ mase. Etako pahne. Ynara tymerose Moeze a Ritonõpo poe, “Orutua toorihse ahtao tumũkue pyra ro ahtao, kure zakorõnỹpyry a ipytỹpyry apoiry typytyme, emũkuatohme, turuĩpyry poenõme, aorihtyã myakãme toto ehtohme,” me tymerose, tykase toto.
29 —Etako pahne, 7mãkõ kynexine atakorõmãkomo. Morarame osemazupu typytase. Morotoino toorihse tumũkue pyra ro tahtao.
30 Mame ĩkaponato a turui pytỹpyry tapoise eya typytyme. Mame toorihse roropa ynororo emũkuara ro tahtao.
31 Mame ĩkaponato a turui pytỹpyry tapoise roropa. Toorihse roropa ynororo emũkuara ro tahtao roropa. Morararo 7mãkomo, tumũkue pyra toorihse toto.
32 Mame etyhpyryme toorihse nohpo roropa, ipytỹpyrykomo.
33 Naeroro aorihtyã ẽsemãkatoh po onoky pytyme exĩko mokyro nohpo nae 7mãkõ pytyme toehse exiryke, tykase toto Jezu a.
34 Morarame Jezu a tozuhse toto, ynara tykase,
—Serõkõ pytãko mã toto, niotãko roropa mã toto.
35 Yrome tyyrypyrykõ rumekahpõkõ ẽsemãkapõko ropa Ritonõpo mana jũme tymaro toto ehtohme. Mame pytazomopyra kapu ao toh mana. Morararo nohpo tõ niotazomopyra mã toto.
36 Ritonõpo nenyohtyã sã orihzomopyra exĩko mã toto ẽsemãkapotyamo. Ritonõpo poenõme mã toto, tõsemãse ropa toexirykõke orihxĩpo.
37 Azahkuru matose ynara karyhtao oya xine, “Aorihtyã ẽsemãpyra ropa mana, orihnõko rokẽ mã toto,” karyhtao oya xine azahkuru matose. Ẽsemãnõko ropa toh mana. Moeze a roropa tutuarõtanohpose aorihtyã ẽsemamyry ropa poko. Pika zatyry poko ekaroryhtao ynara tymerose eya, “Ritonõpo Aparão esẽme mana, Izake esẽme roropa, Jako esẽme roropa,” tykase Moeze, mokaro poko aorihtyã poko.
38 Aorihtyã ekepyry esẽme rokẽ pyra Ritonõpo mana. Isene exiketõ esẽme roropa mana. Morara exiryke aorihtyã ẽsemamyry ropa enetupuhnõko sytatose. Ritonõpo a emero isene mã toto, tykase Jezu eya xine.
39 Morarame ynara tykase Moeze omihpyry warõkõ Jezu a,
—Emese kure kuezuhtou. Ajohpe pyra mase, tykase toto.
40 Typenekehse toto Jezu ekaropory poko orẽpyra Jezu exiryke. Mynyhme rokẽ toehse toto.
Ritonõpo nymenekahpyry Tawi parỹpyrymeehtoh poko
(Mat 22.41-46; Mak 12.35-37)
41 Mame ynara tykase Jezu eya xine,
—Oty katohme ynara ãko matou, “Tawi parỹpyryme mã Ritonõpo nymenekahpyry,” ãko matou?
42 Ynara tymerose exiryke Tawi a eremiatoh tymerose ahtao eya,
“Ynara tykase Ritonõpo Jesemy a,
‘Oporohko seino, japotunuru wino.
43 Ozehnotokõ esẽme orĩko ase.
Opupuru apõme sã oepe tõ kara rĩko ase,’ tykase Ritonõpo,”
me tymerose Tawi a.
44 Morara exiryke, “Jesemy,” karyke Tawi a Ritonõpo nymenekahpyry poko, otara Tawi parỹpyryme exiry? tykase Jezu eya xine.
“Tomeseke ehtoko Moeze omihpyry warõkõ poko,” katopõpyry Jezu a
(Mat 23.1-36; Mak 12.38-40)
45 Ynara tykase Jezu typoetory tomo a, 12mãkomo a emero toto netaryme,
46 —Tomeseke ehtoko Moeze omihpyry warõkõ oenekunohpyra xine ehtohme. Toepyryparykõ se mã toto typoko xine. Toytorykõ se toh mana upo kurã ao. Pata rãnao tahtao xine, “Taro mah Tam?” kary etary se toh mana. Ritonõpo maro oturutoh tao imehxo exiketõ apõ po rokẽ porohnõko mã toto. Morararo otuhtoh konõto htao kurã rokẽ apoĩko mã toto tosarykõme.
47 Pytỹpo tõ mõkomory apoĩko roropa mã toto tykyryrykõme, itapyĩkõ apoĩko roropa mã toto, iniokõ toorihse ahtao. Mame okynã sã oturũko toh mã repe Ritonõpo a imehnõ neneryme, “Kure moxiamo,” kary etatohme typoko xine imehnomo a. Yrome imeĩpo itamurumehxo toto wãnohnõko Ritonõpo mana apotoimo htaka toto pahnõko mana, tykase Jezu eya xine.