26
Juta tõ eremiatoh Ritonõpo poko
1 Mame moro ẽmepyry toehse ahtao eremiãko Juta tõ mana, ynara ãko mã toto:
Typatake sytatose jamihmã ke!
Ritonõpo Kuewomanekõme mana, kypatarykõ apurume,
Kypynanohnekõme mã ynororo.
2 Pata omõtoh etapuruhmakatoko Ritonõpo poetory tõ omõtohme, aomipona exiketomo te, zae ehtoh poko exiketomo, enara.
3 Õmiry omipona se exiketõ rĩko mase torẽtyke pyra, oenetuputyryke eya xine.
4 Kokoro rokẽ Ritonõpo enetupuhtoko,
jũme Kuewomanekõme mana.
5 Imehnõ motye kure osekaroketõ typoremãkase eya,
ipatarykõ kaetokohxo exikety tykararahse eya,
apuru tõ pipahme tyripose eya nono pona.
6 Seromaroro tymõkomokãkara te, omise exiketõ roropa apatary ikararapyhpyry poro itũtũmãko mã toto.
7 Zae ehtoh poko exiketõ esemary tupime pyra mana;
Omoro, Ritonõpo, zae exiketõ esemary rĩko mase amimome.
8 Ritonõpo, õmihpyry omipona ehtoh poko ynanase,
oeraximãko ynanase; opyno rokẽ ynanase
awaro sehxo ynanase, opoko yna osenetuputyry se.
9 Yronymyryme amaro se ase ukurohtao koko;
yronymyryme ise oehtoh waro jexiry se ase.
Ynara exiryke, sero nono põkõ apiakaryhtao oya,
tuãnohse roropa toto ahtao oya,
zae ehtoh waro exĩko mã toto.
10 Kure ehtoh riryhtao oya popyra exiketomo a,
zae ehtoh riry anamorepara ekurehnõko mã toto.
Taro roropa zae exiketõ nonory po toto ahtao ro
popyra ehtoh poko exikehpyra mã toto, Ritonõpo Imehxo Exikety poko oty kara mã toto.
Tosẽkõme oenetupuhpyra mã toto.
11 Ritonõpo, oemary tanỹse mana ozehnotokõ wãnohtohme, yrome onenepyra mã toto.
Mãpyra opoetory tõ pyno yronymyryme oexiry eneryhtao eya xine ehxirõko mã toto.
Ah netuarimã toto, zuãnohko toto, popyra exiketõ wãnohtoh ke.
Opoetory tõ pyno yronymyryme oehtoh enepoko eya xine.
12 Ritonõpo, kure rokẽ yna rĩko mase yna emãtohme,
ynanyrityã emero tyrise oya.
13 Ritonõpo, yna Esemy, tyrohmanohpose ynanexiase imehnõ ahno tomo a, toto ritõ tomo a roropa,
yrome omoro rokẽ mase yna Esẽme nymyry.
14 Mokaro ahno toorihse mã toto,
oehpyra ropa mã toto isene toehtohkõme ropa;
zuzenume rokẽ mã toto ẽsemãpyra ropa.
Tuãnohse toto oya, tonahkase toto,
ipoko xine tuenikehse imehnõ mana emero porehme.
15 Ritonõpo, Izyraeu tõ tomãkapose oya,
yna nonory roropa zumohxo tyrise oya,
moro pokoino imehxo oehtoh enetupuhnõko imehnõ mana.
16 Ritonõpo, opoetory tõ tuãnohse oya;
yna etuarimaryhtao ynanoturuase oya.
17 Nohpo tonururuhtao kui ãko mana jetũ toexiryke;
moro sã ynanexiase opokoino, Ritonõpo.
18 Poetoẽme exikety sã sam tykase ynanexiase,
yrome arypyra, poeto enurupyra nexiase.
Sero nono põkõ onypynanohpyra ynanexiase.
Ahno onemãkapopyra roropa ynanexiase.
19 Izyraeu tõ aorihtyã ẽsemãnõko ropa mã toto;
ekepyrykõ owõnõko ropa mã toto.
Nono ao aorihtyã ekepyry tõ pakãko roropa,
atãkyemãko mã toto, eremiãko roropa mã toto.
Axitaku onenehpohpyry otyro ehxikãko,
ahtanohpõko roropa mana.
Moro sã aorihtyã ẽsemãkapõko ropa mase, Ritonõpo, nono ae itũtatohkõme ropa.
Zuãnohtopo, Ipynanohtopo
20 Wekyry tomo, atapyĩkõ taka omõtoko, omõtoh apurutoko, ikiritihmatoko; otonẽtoko axĩtao rokene, zehno Ritonõpo ehtoh otyhkatãne.
21 Tosary poe kapu ao Ritonõpo Kuesẽkõ oehnõko mana sero nono põkõ wãnohse iirypyrykõ epehpyryme. Tokare pyra ahno etapatyã ononẽpyra exĩko sero nono po mana, imehnõ etapahpõkõ sero nono po emero osenepõko mana.