25
Ritonõpo eahmary
1 Ritonõpo, Jesẽme mase.
Imehxo orĩko ase, oesety eahmãko ase,
onyrityã kure kuhse exiryke;
pake mosenetuputyase onyriry poko, zae morohne tyrise oya rahkene.
2 Yna zehnotokõ patary tõ tykararahse oya,
pata tõ topu risẽ ke tapuruse exiketõ typipahmase oya.
Tuisa tapyĩ konõto tõ tonahkase oya,
jũme moro onyrizomopyra mã toto.
3 Morara exiryke ahno jamihmãkõ oeahmãko mã toto,
imehxo oexiry enetupuhnõko pata tõ põkõ mana, zehnotokõ nonory po.
4 Tymõkomokãkara akorehmaneme mexiase,
omise exiketõ ewomaneme,
tapyime mexiase tyryrykane jamihmã maro konopo toehse ahtao,
jerutume mexiase xixi axitũ toehse ahtao.
Popyra exiketõ imehnõ zehno ehtoh
tyryrykane jamihmã sã mana, kuenime toehse ahtao,
5 axitũ sã mana xixi ao ona tonorẽ po.
Yrome yna zehnotokõ mynyhpãkapõko mase;
akurũ sã xixi jetuhkopyra tyriry samo,
moro sã popyra exiketõ kohtary mynyhme tyripõko mase.
Otuhtoh konõto poko
6 Ypy Xião po otuhtoh konõto rĩko Ritonõpo Jamihmehxo Exikety mana, emero nonory põkõ otuhtohme; tonahsẽ rĩko mana, tõsẽ kurãkomo eukuru jehnahpyry kurã roropa.
7 Mame moroto akurũ sã tãkye pyra ehtoh enahkapõko mana, ahno emero nono põkõ xitary tõkehko.
8 Orihtoh enahkãko roropa mana jũme, nono põkõ orihpyra exĩko mã toto. Toto xity korokãko Ritonõpo mana toto enuru ae, mame typoetory tõ ehxirotopõpyry enahkãko mana sero nono po. Morara tykase Ritonõpo.
9 Morarame moro ẽmepyry toehse ahtao ynara ãko mã toto emero:
— Kuesẽkõme mokyro mana. Tonetupuhse ynororo kyya xine, mame typynanohse sytatose eya. Ritonõpo Kuesẽkõme enetupuhnõko sytatose. Seremiatone eahmaryme, satãkyematone takorehmase kuexirykõke eya.
Moape wãnohtoh Ritonõpo a
10 Ypy Xião ewomãko Kuesẽkõ mana, yrome Moape nonory põkõ wãnohnõko mana, tytũtũmasẽme sã exĩko mã toto onahpoty samo pui tõ pupuru zopino.
11 Tomarykõ anỹnõko mã toto nakuae ytoketõ samo; yrome tõsewomarykõ kukuruhtao ro, osepynanohpyra mã mokaro epyrypaketomo, toto poremãkapõko Ritonõpo mana.
12 Moape patary jamihmãkõ kararahnõko mana, apuru tõ kaetokohxo exiketõ roropa, typahsẽme exĩko mã toto nono pona.